酒店見聞

講開酒店, 好多都會 offer corporate rates 特惠價比啲 MNC (國際化商業機構), 因一般嚟講, MNC 員工日理萬機, 個個公幹飛完又飛, 咁啲 jet-setter 住密啲, 酒店就可以跑量, 提升營業額.

最近同事口中得知, 公司喺中國大陸 book 酒店, 已經再冇任何 corporate rate, 應該係入住率太低, 被取消資格.

對我嚟講, 反而有好處, 因為只要 within budget, 而家想住乜都得, 唔駛再住埋公司個 list 嗰啲狂潮年代裝修, 老套噏耷酒店.

最近走灰色地帶, 喺 booking.com 執到筍嘢, 住咗兩個地方 : 上海國金軒 (IFC Residence) 同 廣州文華東方 (Mandarin Oriental).

新鴻基嘅 IFC 國金軒, 留意咗好耐, 因當年喺 service apartment 樓下商場店舖做工程, 聲浪過大 "嘈" 親佢哋嘅貴客, 所以被邀請同佢哋揸 fit 人對話.  

𨋢門打開, 看見眼前景象, 心諗 : "啲裝修做乜得咁靚, 好多 art pieces, 有氣派得嚟唔俗氣, 喺上海, 實屬難得". 

 

IFC apartment lobby 其中一角

Apartment 信箱

當時都幾羨慕啲貴客, 有咁好地方住.

近年可能生意唔好, 要面對現實, 變通, 拆開嚟賣.   
估唔到而家, 竟然可以逐晚嚟租住.  90 m2 apartment 每晚都係人民幣 1,500 左右.
   

好彩地被 upgrade 咗去間 127 m2 open kitchen , 兩房兩廳, 兩廁, 仲冇鬼添.

窗外仲有浦東景致.

Friend 叫我一定要游吓頂樓個特色泳池, no 啦, 前嗰晚劈得咁勁, 點游?

下次去上海如果呢度再做特價, 必定要再試, 同埋游泳.

以前文華東方走成熟路線, 廣告揸得把扇嘅都係 35+ 嘅明星 / 明人. 但近年好似有革新, modern 番啲.  通常房價人民幣 2300 以上, 唔知今期做乜賣大包, booking.com 1300 就得. 

廣州, 有啲奇怪, 到底幾時講國語, 幾時講廣東話呢 ?  同的士司機講廣東話, 佢會用國語重複一次你要去嘅目的地;  到你講國語, 啲人又會用廣東話應你.

講番文華東方, 今次入住印象特別, 有幾個細節覺得好好.  

Front Desk

Check-in 時候, 前枱真係比到 warm welcoming 感覺.

同期 check-in 兩個男人 classy 又有 manner, 明顯係 corporate 客.  但前枱對我嘅服務態度係一模一樣咁好, 冇歧視我呢啲 booking.com 客.

因第一次住, staff 陪我上房介紹房間設備, 講咗 wifi 密碼後, 建議我攞部手機出嚟, 等到我連到線, 佢先離開, 好細心.  最厲害臨走前講 : " 我哋好多客人住過一次, 之後都會再返嚟 ". 
暗示式催眠 !? 有啲料到.

Hotel Entrance Lobby

放低行李要即刻趕去開會, 酒店門口一架的士都冇, bellboy 話放工時間好難有車, 如果唔介意, 佢用自己戶口幫我 call 滴滴 (大陸 uber), 估唔到服務可以咁 flexible.
 

窗紗係由下向上拉嘅, 好搞野

最細嘅房都有 60 m2, 房間設計似曾相識.

噢, 原來都係出自以前上海常住嘅 Park Hyatt 設計師 Tony Chi 手筆. 

無論街外幾咁混沌 (chaos), 一踏入酒店門口, 就完全唔覺自己喺大陸, 神奇嗎 ?

第二朝要搭早班火車返香港. 唉, 如果早知間嘢咁正, 一定 book 下晝車, 歎埋早餐, 做完 spa 先撇.
落樓下, 喺 front desk 見番昨天介紹房間嘅 staff, 佢好熱情咁同我打招呼.  

跟住有位講廣東話嘅靚女 (唔係整容樣, 係航空公司廣告好 exotic, 啲牙好齊, 有女人味嗰種) 幫我 check-out.  最煞食, 係佢埋完單, 用親切嘅眼神加上好靚嘅笑容, 溫婉但又好 firm 嘅語調, 同我講  "真係好希望好快再見到你 "

我心裡默默回應  "唉, 我都好希望快啲可以再返嚟 ...... 唔知仲攞唔攞到咁平嘅 rate 啫 "

YES YOU CAN !!!

酒店見聞

幾廿歲人, 公幹加埋去玩, 住過嘅酒店不下 300 間,
咁多酒店, 大部份好不濟, 只有少於 1/10, 會住完想再住.

用國家分類, 新加坡最差, 咁衰, 要開名:

1. Grand Hyatt (Room service 寸爆 ) - 我點牛扒想食生啲 (blue), 點知條八婆話 : " You want very rare? Why don't we just send you raw meat and you cook yourself ?" 

2. 都係Grand Hyatt (Reception) - Check out 嗰陣, 條眼超超嘅波妹,見我 LV account, 問我 :   "How's LV business in Singapore?"   我話 : "ok", 條木咀話 : " I don't think so, I think Gucci is doing better !"

都痴嘅 ! 我同 LV 打份工啫, 有糧出就得啦, 你認為我會在意公司生意好唔好咩 ?

3. Meritus Negara (改咗名, 而家叫 Pan Pacific Orchard) - 一句講晒, 有鬼 ! 仲喺房影到添 !

4. Fullerton Hotel - 都係有鬼, 猛嗰隻. 我同 friend 都親身感受到.





第二高危, 中國大陸. 
鬼就冇, 但我真係住過啲完全冇窗嘅密室, 或冬天零下 28 度, 半夜會冇熱水仲涼嘅 5 星級酒店. 

而家好咗啲, 十幾年前去大陸, 成打員工企晒喺 reception counter 閑聊, 只有兩個人做嘢, check-in 至少要等 15-20 分鐘先攞到房.

明明話係無煙房間, 一開𨋢門已經煙霧瀰漫, 成間睹廳咁. 入到房, 每個角落都散發強烈煙味, 就算唔食, 啲味都會喺冷氣口自動噴出嚟. 
呢啲房, 住一晚就 '被' 吸咗成包煙 !


第三危, 意大利. 

當年喺羅馬讀書, 住嗰度冇鬼真夠運.  因為之後去, 喺羅馬啲酒店有三次唔同型式 '撞' 嘢, 重型嗰隻.

意大利酒店唔止鬼, 仲有鹹濕鬼. 

試過喺西西里島 (Sicily) 一間旅館, 比個 50 幾歲阿叔太子爺, 喺一個預先喺牆開咗嘅窿 "裝" (偷窺) 我嘔 ! (佢以為我沖涼, 但其實下晝食錯嘢, 所以喺廁所狂嘔).

黃昏佢請我同 friend 落樓下客廳飲嘢, 禮貌上到一到, 點知比佢借醉行兇, 咀咗啖. 

跟住發現成間旅館原來只得我同 friend 兩個客入住, 大驚之下, 火速返房.  點知隔咗陣佢發酒癲, 喺房外走廊大吵大鬧, 又喊...... 嘈咗個幾鐘.  

直到夜晚 11 點幾, 忽然鴉雀無聲, 靜晒.  

以為可以鬆一口氣嘅時候, 突然有人用鎖匙開我哋房門 !  噢, 原來係佢 80 幾歲嘅老母搵仔, 問個仔係咪喺我哋房度. 哇 ~ 咁即係佢個仔有搞啲客嘅前科啦 !

呢次真係驚嚇極限, 成晚心慌慌, 冇覺好瞓, 執定嘢等天光, 第日大清早極速走人.

快活一夜

我份人超心急, 近年興起嘅 "慢活" lifestyle, 對我有如洪水猛獸, 難以想像.

估唔到, 前晚會喺台北一個標榜慢活嘅地方, 過咗快活一夜.

嗰度叫 <樂埔町>, 一所台灣日治時期建成嘅老房子, 喺台北大安區, 唔難搵.   入到去, 我同個 consultant 不禁同步講咗聲 : "好~ 靚~ 呀 !".

樂埔町外貌

左邊屋仔 : 廚房  /  右邊 : 餐廳

日式花園

lucky bastards - window with a view

真係好羨慕隔離, 屋企個窗對住個日式庭園呢家人.

通去大庭嘅迴廊

坐低第一件事, 當然係 order 酒啦.  個侍應話等等, 轉頭會有負責酒水嘅同事過嚟介紹.

等咗兩個字, 冇嘢發生, 忍唔住自言自語 : "嘩, 乜咁耐㗎......"    可能自己唔覺, 原來自言自語得好大聲, 周圍啲人望咗我一眼, 跟住先睇到枱面張咭寫住 :

             ...... 您的輕聲細語

                    請您耐心等候 ......

Oh no ~ 真係失禮死人.

'shhhhhhhhhhhhh......' 同 '慢'

法 / 日 fusion 料理, 點咗 8 度菜嘅 tasting menu , 每人都係 2,000 台幣(488 港幣) 咋 !   

我哋文化水平低劣, 淨睇餐牌字面, 真係 get 唔到 "青春正美豆" 原來就係青豆.  台灣人, 果然有詩意, 文采.

明明餐牌個個中文字都識,  但串埋一齊就完全唔識解, 侍應見我哋有啲迷網, 走埋嚟解釋, 點知仲衰, 佢講十個字, 大約只聽到兩三個單字.

唔好理喇, 食咗先算, 好彩啲嘢好味不特止, 仲堅鮮味, 有驚喜.  唔似香港嗰啲所謂私房菜, 每樣比得幾粒, 噴吓乾冰噴吓煙就算.

Eggplant puree + miso + peanuts (可能我少食茄子花生, 覺得呢個一般)

salmon + beet root + tomato gel (好精緻, 啲透明水珠係番茄味㗎 !)

Chicken skin + neck + sweet corn (從未食過咁好味嘅雞頸同碳烤雞皮!)

Tofu + pea + mushroom chips (舊豆腐真係... 好有, 好有豆味!)

Charcoal fish + deep fried burdock (全晚至愛! 特別係碟豆花做嘅藍色汁, 侍應話好似條魚喺深藍色嘅海洋喎)

Charcoal short rib + scallion (唔知邊度搵嘅和牛, 超嫩 ! 不過啲勁濃綠色蔥汁唔係人人頂得順)

Clay pot rice with seasonal veg (餐廳招牌菜, 兩個人份量六個人吃都夠)

食到呢味我已經好飽, 但啲米好 "Q 彈", 係實在太太太好食, 我食咗兩碗 !!

台北學藝

呢輪唔知搞乜, 驛馬星動 trip 出不停, 有同事好羨慕, 話去大陸好正, 心諗 : 大陸你都恨去, 痴嘅 !

跑咗 N 轉大陸, 終於都輪到一次台北. 
做舊公司嗰陣成日去, 曾經幾熟呢個城市. 但呢幾年少去, 變化好多, 昔日蒲開嘅地方, 大部份已不存在.

近期公事較忙, 臨出 trip 前冇時間做 research, 唯有上機前即食, 喺 lounge 上網摷料. 
哈 ~ 又摷到好嘢 : 想去咗成年嘅 誠品松菸 (煙) 店.

誠品松菸店周邊文化區

呢個地方對香港人嚟講一定唔會陌生, 因四周撞口撞面都係啲先聲奪人, 喺書店裡面嗌生晒 : "呢度有好多精靈捉呀 !" 嘅港人.  
唉, 唔好講班蛋散, 講吓人哋個生活館有乜.

嗰度其實係由一間荒廢咗嘅煙廠, 改裝活化之後嘅文化新地標.

除咗誠品酒店, 誠品生活館, B/F food court, G/F 賣衫同 2/F 賣書外, 1/F 有好多手工藝比你學 (當然要錢, 唔係免費). 

最想試就係吹玻璃, 可惜約咗人, 唔夠時間整.  
個價錢牌列出唔同形狀花紋, 最平 2,200 台幣 (HK$ 537) ~ 最豪 2,800 (HK$ 683).  雖然花墟見過好多差唔多款式, 但自己親手做, 又唔同咁講啦 .

Price List

Glass blowing

行行吓, 感覺好似時光倒流, 一個個 workshop, 直情去番我喺 TI (即而家 IVE) 讀設計嘅年代.

陶瓷班

木工班

銀器班

皮藝班

參觀完, 真係好想向香港班冇能, 不知所謂, 搞 "保育 / 活化" 嘅 <專家 - 顧問 - 官員> 問吓, 乜嘢叫做 "誠意" : 係唔係攞個 PMQ , 美其名保育, 與民共享, 然後又租晒比啲 world class 食店, 每人成千蚊埋單先出到門口嘅呢 ?

怪癖

上得山多終遇虎, 原來 trip 出得密, 亦會遇虎 !

繼上次大鼻孔判頭 (蘇德華) 同小鮮肉 <北京核突短褲> 事件後, 尋晚喺上海又賴嘢.

下晝去完人間煉獄 (熱到爆嘅傢俬廠) 驗收傢俬, 流咗我一個禮拜會流嘅汗. 走嘅時候, 基本上成個人已經收咗皮, 散晒, 謝過謝老四.  

喺塞緊車去食飯途中, 蘇德華忽然 verbal diarrhea, 一路冇停口, 猛同我講嘢, 當刻深切體會心力交瘁嘅真確感受.  搞到要瞌埋眼扮瞓覺, 唔啋佢, 佢先收聲.

塞咗成個鐘, 去到餐廳坐低, 以為有好日子過. 原來煉獄有好多層, 而真正嘅煉獄, 先喺呢度 !  

間房完全密封, 竟然有人思覺失調話凍, 要關冷氣, 係熄晒, 唔係較細.   跟住啲人就開始食煙, 煙駁煙, 最大鑊係我, 坐正傢俬廠老板隔離, 因為冇人食嘢, 個 focus 去咗我度, 佢不斷夾象拔蚌比我, 成盤象拔蚌刺身, 我至少食咗一半.
後尾佢話一共叫咗兩條象拔蚌, 咁我咪即係自己一個人食咗成條 ?!

吸二手煙 + 成條象拔蚌都未算, 最奇怪係我間歇又隱約地聽到啲不明嘅 "胳胳" 聲.   

後尾發現, 原來係斜對面條友飲水發出嘅聲音.

佢幾乎食幾啖就飲一次水, 而每次都會先含住啖水, 好似擦牙啷口咁 "胳胳胳胳" 完, 再吞落肚.

實在太唔衛生, 太恐怖了! 飲自己啷完口嘅水? 呢種行為令人極度反胃, 當刻唔止條象拔蚌, 連隔夜飯都想嘔埋出嚟.

以後作嘔, 嘔唔出, 一諗佢呢吓 "胳胳胳", 實 work.

大迷信 2

我好迷信, 好多人都知. 

李居明呢位人兄搞作多多, 年過 30 嘅, 一定有聽過佢套千萬票房, 叫 <大迷信> 嘅戲, 當年我都有入場.    <作邪, 作鬼 !> ( "捉邪,捉鬼!" 鄉音 ) 亞婆勁打細路經典一幕, 諗起笑爆咀.

前幾年北角新光戲院差啲執笠, 唔知點又比佢以劇團創辦人身份同個業主搞番掂. 

上年亞視就執, 又話有辦法扭轉乾坤, 走去葉家寶間房 set 風水陣, 結果唔得囉.   鬼咩! 葉家寶係基督徒, 佢個神一定唔會比啲風水野喺自己地頭顯靈啦.

講咗咁多李居明, 其實係想 share 吓佢近年比嘅風水改運貼士.

有好幾個, 不過我覺得有兩項對我嚟講比較易實行, 因為唔駛用錢買風水道具, 改少少生活習慣就得. 所以跟主去試, 大致係 1. 屋企擺放錢箱方位;  2. 餓命學 (如果真係好想知, 上網可以摷到).

可能咁啱得咁橋, 做咗後大發就冇喇, 但整體又好似順咗啲啲.

最弔詭係財富增長方面, 竟然破天荒地由 -100% 變 0% !  雖然離 + % 仲有好遠, 但每個月唔再洗凸, 可以唔借而仲有剩錢去交下年嘅稅, 對呢十年嘅我嚟講, 係個奇蹟.

仲有, 我儲咗差唔多成年嘅 50 蚊紙, 終於夠 $10,000 喇 !   前晚食完飯返屋企, 用咗半粒鐘排好個陣影大合照.  

影完, 好滿意.  啤啤夫諗住返房瞓第朝先執, 點知回頭望, 唔知係咪燈光關係, 啲錢攤哂喺地下成堆陰司紙咁 ! 勁驚 ! 天漩地轉, 死死氣要執埋佢.

男人都係長好過短

朋友話, 最怕男人著短褲, 當時不以為意, 心諗...... 都唔係好核突啫.

直到前日喺北京, 晨咁早大鼻孔判頭 (蘇德華) 一身休閒打扮 : 超薄, 半透明, 超貼身白色 tee + 三個骨短褲 + 著鞋唔著襪.  

我當場有生理反應 : 作嘔.

蘇德華 雖然未至於肥, 但人到中年, 唔做運動又冇 keep, 喺熱辣辣環境下出晒汗, 件 wet tee 貼晒身, 搞到佢對 B cup 胸同豬腩肉現晒形, 遠睇, 仲透點添 ! Yuk ~~~~~ !

以為有備而戰, 帶咗冰感毛巾, 風扇仔同香薰精油入地盤 (因有人預先警告我嗰度有好多佬, 好臭), 點知棋差一着, 比條 蘇德華 KO 咗.  

睇完 site, 開車去食飯途中, 蘇德華 露出腳膝頭, 白雪雪光蛻蛻, 加埋佢滴緊汗嘅上半身, 唔知點解, 我感到有種前所未有嘅嘔心感覺, 好難受.

最攞膽係尋朝, 叫新請嘅 "小鮮肉" check out 後喺酒店大堂集合, 一齊打的去機場.  
佢嘅現身, 嚇 Q 我一跳, 當刻, 真係想打爆佢!  

唔係嘛...... 又係短褲 ! 做乜啲男人會有咁多短褲㗎 ?  話晒都係 business trip, 會唔會 casual 咗啲呀?

最驚嚇係 "小鮮肉" 後生, 皮膚白裡透紅, 平時冇室外運動又唔去 gym 操肌, 所以副偈勁嫩, 但原來佢啲腳毛頗有睇頭, 坐的士望到佢條腿, 成隻女人腳生晒毛咁, OMG, 又再想嘔.

原先見我哋第一次一齊出 trip, 諗住用 mileage 請埋佢入 lounge, 哎也佢咁樣, sorry...... 唔得啦.