東京

Tokyo Tower from Roppongi Hills

十二月標尾會, 竟可以公事為由, 走轉東京三日兩夜, 心中暗喜. 

乘機叫埋上海隻馬同大鼻孔判頭 (蘇德華) 去, 一石二鳥.

上海隻馬少出國, 從未去過日本, 今次可以去東京公幹, 都唔知幾 happy, 當正我係大恩人. 

點解叫埋蘇德華 ?  
畫公仔唔駛畫出腸, 唔通佢型英帥靚正, 可以保護我咩? 緊係貪佢疏爽, 出發前從來唔準備做任何 research, 去到目的地等你發板. 最重要係佢永遠都要威, 爭住找數.

問佢兩個有乜地方想去 / 想買 / 想食.  呵, 答案竟然係 : 唔知 / 冇所謂 / 都冇乜特別.   咁冇要求, 一於話之你, 唔貴唔食, 出街直頭唔攞地圖, 的士去到邊截到邊, 一個字講晒 : 豪 !

Omotesando

蘇德華 噏得就噏, 成個日本通咁.   好奇問吓, 原來條友對上一次去日本喺廿幾年前, 仲要係跟團去大阪咋.   

從來未去過東京, 都可以作到咁大, 第日唔做判頭, 可轉行做作家, 編劇, 娛樂記者, 靈媒.

佢唔知我同隻馬都學過日文, 家陣就算唔識聽, 單睇字 <平假名 ひらがな > <片假名 カタカナ > 加埋 <漢字>, 起碼都估到大意係乜.  佢乜七都唔識竟喺我哋面前班門弄府, 太好笑喇.

終極騎呢, 就係每次坐上的士, 都問我去緊嘅地方遠唔遠, 近邊度.  你當我係 Google Map 咩!

大佬, 咁抽象. 每個人對遠近嘅定義都唔同, 15 分鐘車程對我嚟講算近, 可能你會覺得好遠呢 ?

近邊度 ? 你又唔識東京, 根本噏乜地標對你嚟講都係冇意思啦.  

最後耍佢, 答咗等於冇答 : 唔塞車15 分鐘到, 塞就成個鐘都唔到.

懷石料理 . 秋冬版

今次再去食念念不忘嘅兩個晚飯 : 雞泡魚全餐 & 懷石料理, 大家都食到成個豬頭咁, 好滿足.

其實都好期待朋友介紹嘅一個 lunch 地方, 點知去到太晏, missed 咗 last order, 真嬲 !

之後蘇德華 話求其吃, 銀座咁多餐廳, 都比佢揀到間專做大陸遊客生意嘅大型鏈鎖啤酒屋, 最恐怖裡面周圍可以抽煙.   哇, 唔得呀, 寧願紮炮唔食, 自己返酒店, 等佢哋食完再 meet up.


最後, 想講今個 trip 深刻感受到嘅兩件事 :

1)   東京實在有太多野買, 有選擇困難症同密集恐懼必須作好心理準備, 可能會發癲.  例如同一個 item 香港有 5 隻色, 喺東京你就會見到 5 隻色 x 百九幾個 variations.

去到啲靚貨比香港多 N 倍嘅店, 不其然雙眼放光, 心跳加速, 極度抗奮.  多得杜如風 (我唔認識佢, 只係喺雜誌睇到佢嘅推介), 知道日本有 Lanvin 副線, 設計 chic 得嚟又唔太貴, 入咗啲貨, 勁得 !
 

Lanvin en Bleu 收穫

2)   東京餐廳 / 商場廁所超級潔淨, 企理到好似屋企廁所咁 (雖然回港後發現自己屋企廁所都冇東京嗰啲咁乾淨).   

喺東京入到任何廁所, 我都唔駛閉氣, 可以正常呼吸. 因為啲人唔會好似香港人咁缺德, "啡 " 到一地 / 成塊廁所板都係, 洗手整到成地成枱濕晒, 廁紙四圍拋.

上艇

品牌新上任 CEO 出巡到港, 公司高層大為緊張, 扭盡六壬, 施展渾身解數, 曬冷, 竟然厚顏到同某地產大亨借船, 要成班管理層一齊出海 " 與 CEO 進餐 " .   

My 吉!   睇到通告當刻, 個心一沉, 真心覺得好唔開心.  

遊船河係高危公務, 最易賴嘢, 有乜 '依郁' 暈浪作嘔喺 CEO 面前出醜, 以後點見人?

( 咁多年, 好僥倖, 只係暈過一次船浪.   

回想嗰次, 天漩地轉不在話下, 由好想嘔 --> 嘔唔出 --> 正在嘔 --> 到嘔完, 每一刻, 隻船都不停搖晃, 坐又唔係瞓又唔係.  
隔一陣, 整個嘔嘅程序又再循環. 唔係誇, 黃膽水都嘔埋, 直到上到岸為止  ).

如果唔暈浪, boat trip 應該係好開心好 free , 一班 friend 吹水劈酒, 曬太陽, 跳海游水.  

( 要由頭到尾坐直條腰, 食風仲要扮留心, 聽啲完全聽唔明嘅生意經, 笑啲所謂 '笑話 ' ?  不幸地, 尋晚全中 ! )

明明天文台話尋日落雨, 諗住有機 cancel.  唉 ~ 最後點解一滴雨都冇㗎 !

上到艇, 好彩有酒飲, 總算可以自得其樂 / 麻醉.  

某同事演技超班, 雖然成晚一粒聲冇出, 但就不停猛力點頭, 明確示意認同高層講話, 識 do !  唔似我同另一同事咁, 一路聽一路反白眼.   

嗰位某同事仲竟然為咗呢個飯局, 食完 lunch 一早閃咗去搵人用咗 3 粒鐘專業化妝 !   藝高人膽大, 為求可以高一啲 (雖然著咗都仲係 5 呎掙 1 吋), 冒仆街之險, 踩對 4 吋高跟長靴上船, 好有鬥心.

人哋咁搏咁揼本, 睇嚟我都要攞番幾草嘢, 報工聯會, 睇吓有冇周星馳套喜劇之王成日提嗰個 "史坦尼斯拉夫斯基" 嘅課程, 提升吓 "由外到內，由內到外" 演技先.

繡花拖鞋 (續)

公司大革新, 由年頭計, 到目前為止, 已經兜咗 3 個冗員 (包括我部門之前嗰件極品).  

不約而同, 佢哋都係做咗 6+ 年以上. 

嗰啲所謂老臣子 (平時擺晒款日日喺度渣流灘, 返工等放工, 不思進取, 有事 A 字膊, 要交 report 就攞 sick leave), 仲敢周圍同人講, 話公司炒晒啲舊人, 無人情味.

無人情味 ? 真好笑 !  問心嗰句, 自己有幾多本錢 ? 做乜錯乜, 閉關自守, 外面發生緊乜都唔知.  冇 network, 冇學歷又冇 added value, 咁嘅質素表現仲有得留低, 公司其實已經對佢哋好關愛.  



......  咁長嘅引子只係想帶出, 喺可見將來, 即 2016 結束之前, 會再 out 多件.

答案, 呼之欲出......   登登登凳 !

想郁佢單料, 早有傳聞, 但多個月嚟毫無動靜, 月頭 HR 收 order 叫佢唔好再喺 office 著繡花拖鞋, 以為擺平咗.

前幾日 HR 同事小小聲, 原來 '繡花拖鞋' 最後都冇得留低, 仲要係被即時死亡嗰隻, 為乜?  原來GM 話唔想人哋年尾流流12月31日收大信封, 所以早啲通知喎. 正一多舊魚.

敢做唔敢認, 唔知驚乜, 多多藉口, 又話 jet-lag 又話要開會, 總之炒魷儀式當日就設法不在場, 龜縮, 叫HR 同 '繡花拖鞋' 搞掂, 話之後會打電話同人交代.

搞錯呀, 咁都想閃......  人哋跟你咁多年, 唔係連親自講句 bye 都冇嘛 ? 

最狗係明知即炒, 就唔好隊HR 去嘈人對繡花鞋啦, 製造分裂, 搞到 '繡花拖鞋' 而家當正HR 係仇人, 面阻阻.

啲咁婆媽老土嘅事, 好快傳到大老闆耳中, 我估佢聽到後一定反咗幾轉白眼.   

End up 大老闆下令條GM 要親自出馬兜 '繡花拖鞋', 自己的事自己做, 唔得假手於人.   

避無可避, 最終都係要做番醜人.  GM, 你要爭氣呀, 千祈唔好比我估中你要埋人單當日請病假囉.

繡花拖鞋

今日食晏, HR 同事好懊惱同我哋講, 收到 GM order, 聽日要同某 director 級要員表態, 提醒佢嘅衣著品味, 尤其一定唔可以再喺 office 著繡花拖鞋.

哈哈, 真好笑, 條八婆 GM 就係咁, 永遠唔做醜人.  明明朝見口晚見面自己條𡃁, 點解唔直接講, 要借 HR 把口 ?

不過諗起 director 嗰對繡花拖鞋, 被佢肥胖身軀, 日積月纍下踩到 "噠" 晒.   有時佢出咗街, 我哋喺佢位望到嗰對又梅又扁嘅拖鞋屍, 確實嘔心.

繡花拖鞋, 一係名門淑女喺自己深閨裡面著, 一係就喺鬼故廁所某格條罅先會見到, 冇諗過一間所謂 MNC office 會有肥人敢著住嚟行出行入.

調較吓, 係時候.



有口話人, 冇口話自己......  我都發現自己條小鮮肉 (工作條𡃁), 衣著品味有問題.

最怕佢嘅休閒 look : 著鞋唔著襪 (我諗其實好多人都知, 著鞋唔著襪對腳會好嗅), 都唔緊要, 仲要著條貼身牛仔褲 + 摺腳 (下圖左).  

My god, 摺腳呢吓好難頂, 唔知佢喺邊度學番嚟, 成件事根本錯晒 !

好人好者, 無啦啦做乜著窄腳褲, 男人之家, 想 show 啲乜?  同埋窄腳褲, 如果唔係腳長, 唔好搞啦.

唉, 可能我都要學條八婆咁, 搵 HR 幫助吓手.

剝牙

大約 5 - 6 年前, 發現右邊面下顎智慧齒蛀咗個細窿, 自始得閒無事就用條俐頂吓佢, 日子有功, 愈頂愈大.

今年個窿已經變到粒綠豆咁大, 食嘢成日攝咗啲食物碎入去, 雖然唔痛, 但好麻煩.  其實未變到咁大嗰陣, 上年年頭已經想去剝, 但畏疾忌醫, 終於上禮拜牙痛, 非常困擾, 唔搞唔得.

實在好耐冇睇牙醫, 對上一次剝牙係 10 年前, 仲要間牙醫診所因為拆樓, 唔知搬咗去邊.
迷茫中, 剛好同肥仔 consultant 食飯, 佢女友原來做過 10 幾年牙科護士, 喺佢幫忙之下約咗佢舊老闆睇牙.  

聽佢講呢個牙醫好多人幫襯, 去到起碼要等個幾鐘; 佢叫我最好早上睇, 因為就算返屋企止唔到血, 都可以立即去醫院, 仲提醒我食飽啲先好去, 咁驚 ?

原本都 ok, 點知剝之前嗰日條肥仔 consultant whatsapp 問我驚唔驚, 比佢嚇一嚇, 之後又手痕search 吓, 原來剝智慧齒可以有好多 complications, 跟住真係淆底有啲驚 .

出發前最後衝刺上網 check, 好彩網上啲人對呢個牙醫評價幾好, 唯一投訴就係要等好耐. 

加上肥仔 consultant 話佢上次登記咗, 姑娘叫做佢去附近行吓, 輪到佢就 call 佢返嚟, 點知一等等咗兩個鐘 !   所以做定資料搜集, 睇吓診所附近有乜做, 可以打發時間, 結果係冇嘅.


尋朝去到, 竟然唔駛半個鐘就有得睇, 而且牙醫好 nice, 講解非常清晰.  照咗 X 光片, 解釋隻牙嘅狀況, 拔牙手術過程, 風險, 價錢.

問我做唔做, 我 9 秒 9 答  " 做 ~ ! " 
嚟得呢度, 就係要決心剷除隻牙嘛.

我隻智慧牙打橫生, 牙腳好肥, 又粗又圓.  牙醫用咗超過 20 分鐘先可以徹底移除, 其間雖然個口做咗麻醉, 但始終身體其他哋方如視覺, 聽覺, 嗅覺如常運作. 

頭頂手術燈照住, 眼見條膠管 '索索' 聲吸緊啲紅色血水出嚟, 聽見機器高速磨牙發出嘅吱吱聲, 聞到牙齒嘅金屬打磨味, 色香味俱全.  雖然姑娘醫生不斷叫我 relax, 咁搞, 睇怕超人先 relax 到.

手術做完返家休息, 一廂情願, 諗住黎緊幾日冇牙咬, 食少啲, 乘機減磅, 飲咗罐罐頭湯, 唔夠一個鐘, 已經極度飢餓.  頂 ~ 電視又不停播飲食節目, 最大鑊係手術 24 小時內唔可以飲酒.  唉...... 你哋點解唔提我除咗食飽啲, 仲要飲夠啲先去呢 ?

嚟緊今晚仲好笑, 判頭請食飯, 同佢講我剝咗牙咬唔到嘢, 點知收到佢 whatsapp, 今晚去食 ICC Ritz-Carlton 自助餐.

大佬, 你玩嘢 ?!