啪啪聲生蠔

已經兩個禮拜, 仲未接受到 0 bonus, 條氣都係頂住頂住.  聽聞老闆努力中, 同 HQ 拗緊用 gratitude 方式派番少少. 

唉 ~ 慳啲啦 baby, 總部班人冇得救㗎喇......  佢哋根本同現實脫咗節, 仲覺得個牌子至高無上, 以為全世界會爭住做.  

香港失業率 2.9%, 人人有工開, 東家唔打打西家, 唔會好似意大利咁, 失業率 11%, 啲意粉搵到嘢做有公司肯收留就當正皇恩大赦, 任你魚肉. 

間 cheap 公司雞毛鴨血, 七國咁亂, 人工低, 福利少, 個朵又臭, 認為唔比錢我哋仲會同你做義工 ?  收皮啦.

條氣唔順, 出 trip 盡情發洩, '蠔' 飲 '蠔' 食話之你, claim 足公數.

香港較少食蠔, 因為又貴又唔新鮮, 喺外地近海嘅地方, 反而會食吓, 今次 Sydney 食足兩餐.

啲人話澳洲蠔要喺有 R 串法嘅月份食先正 ( 即 May - August 唔得), 所以要趁四月水尾嚟個 last call.  哈哈, 果然仲上得切尾班車, 當地啲蠔除咗 " 平, fresh, 口味極有層次 " 之外, 就真係冇乜其他特別 😆

最想講, 反而係一齊食嗰個同事, 即我隻馬.  

佢不嬲都係文靜嗰隻, 但嗰日唔知係咪食咗屎, 碟蠔上枱嗰陣, 好似比人點咗穴咁, 呆 L 咗, 雙眼冇神望實啲蠔.  問佢係咪祈緊禱, 佢話唔係, 咁我叫佢唔好等, 快啲食, 佢 slow motion 食咗隻, 跟住停晒手, 再定形.  

天呀 ~ 又係佢話 order 蠔個喎......  再問佢係咪唔好食, 佢陰聲細氣答 : " 唔係呀, 我好鍾意食㗎 ".   陰功, 啲雄風呢 ? 去晒邊呀 ?!

乜蠔唔係壯陽聖品, 男人食完會 " 啪啪聲 " 咁勁嘅咩 ? 佢個頭耷耷密密食慘樣, 簡直將 < 食生蠔 = 壯陽 > 呢個概念完全徹底摧毀 😂😂😂.

黑色四月

實在太嬲, 足足要成個禮拜先可以平服心情, 寫呢個 blog.
 
前世唔知做錯乜事, 報應, 入咗呢間公司 !  

自從上年合併, 霸王硬上弓要哽埋亞太區, 裁咗部門一半人, 但工作量 double, 人工就加得雞碎咁多, 老闆話唔係咁少, 其實預咗個勁 bonus 比我, 做 incentive. 

但話口未完, 總公司就立即改制 - 無論做得幾好, 就算 appraisal 老闆比晒滿分, 如果公司業績達唔到預期嘅 90%, 所有 bonus 會化為 0 ! 

同 HR 投訴, set 個咁唔公平嘅 tollgate, 擺明搵笨 7, 鋪路唔派 bonus 啦 !  當時 HR 安撫我話  :  ' 唔會嘅, 公司咁多年都未試過 hit 唔到 90%, 如果真係, 咁就執笠都得喇. '

結果, 上星期四, 老闆喺亞太區 VC 宣佈, 公司業績唔達 90%, management level 嘅 bonus 係 0 蚊 !

你老味唔係嘛, 打咗廿年工都未試過有公司咁樣衰比 0 bonus.

嗰刻, 腦海一片空白, 好想起身拍枱大嗌 : ' 你間仆街公司, 好心唔好獻世, 執 9 咗佢啦 !!!!!!! '

老闆補飛, 叫大家唔好失望, 佢會努力再同總部爭取. 
呵  ~ 竟然有人咁天真, 覺得仲有機會 !  如果一早可以爭取, 就唔駛咁樣衰企喺度啦. 

從得知 bonus 係 0 蚊當刻, 立即 shut down, 跟住開嗰個幾鐘頭 VC, 同以前返學上堂一樣, 淨係聽到聲, 內容一句聽唔入耳 !   

心諗, 好彩冇先洗未來錢豪買, 唔係仲大 L 鑊 !

不過如果有下次 ( ie. 仲留喺間 cheap 公司 ), 睇怕要好似陳法拉咁飛去 NYC 上演技提升課程.  如果唔係, 真係唔鬥唔過嗰啲全身都係戲, 聽到 0 bonus 仲可以假到爆扮大愛, 大聲喺老闆面前扮好 care 自己個 team 問 : ' oh, what about my staff, do they have bonus ? ' ,  ' 有...... ?  咁都好啲 ! '

嘩, 啲戲出晒嚟.

計過喇, 如果要對額抵銷原有嘅 bonus, 每月要返少 6 - 8日, 即每個禮拜返 3 日放兩日. 你哋咁對我, 我一啲都唔需要同你客氣囉.

食咗先算

如果出外旅遊食嘢都有警示嘅話, 今個 trip 一定係黑色.  

唔係明知山有虎, 偏向虎山行, 既然一場去到, 食咗先算啦, 起碼唔好食, 返香港都可以有排鬧嘛 !  冇理由好似啲明星咁, 寧願自己帶幾廿個杯麵出埠, 都唔肯出街食咁寸吧.

NYC 一共留咗 5 1/2 日, 不如嚟個 recap.

D2 lunch - Wagyu Burger

DAY 1 : 冇嘢寫, 因為係屋企住家飯.


DAY 2 : 前世未食過漢堡 😆 , lunch 特登叫和牛 burger.   都 ok 吖, 不過 portion 大, 食到好飽.

D2 dinner - ABC 炸雞

晚飯喺間 friend 想去咗好耐, 但又冇 special occasion 去嘅餐廳, 今次終於去得成, 話同我洗塵暨慶祝佢老公生日喎.  

唔好以為間嘢叫 ABC 就當佢流, 嗰度啲嘢真係有驚喜, 佢個炸雞, 係人生中食過至好味嘅炸雞 !  上網起底, 原來 ABC 係法國知名廚師旗下餐廳嚟嘅, 唔怪得啦.

D3 lunch - Salad

DAY 3 : 喺 Tribeca 一間 Robert de Niro 有份嘅意大利餐館吃午飯, 講真, 味道一般, 個沙律得陣白醋味, 酸到爆.

 
都係嗰句, 99% 喺意大利境外嘅意大利餐廳, 都係靠唔住嘅.  好在食完啲酸沙律, 夜晚有餐住家飯中和番......

D4 lunch - 牛肉 pho

DAY 4 : 平時好少會想去唐人街, 今次例外, 因為聽過太多故事, 想見識吓.  

喺間過咗食飯時間都仲有成條人龍嘅越南餐廳, 整碗牛肉河, 唔知餓定係外國月光特別圓, 覺得湯底好得.

D4 dinner - Oysters & Clams

太晏食 lunch 啲河粉落唔到隔, 夜晚只係食咗兩隻東岸生蠔.  
咁就飽, 你話我係咪好易養呢 😂 ?

D5 lunch - Ribs

DAY 5 : 去咗潮點 Williamsburg Brooklyn 搵到間好嘢, 米芝蓮一星.  終於可以食到當地嘅 ribs 喇 !  啲肉唔黐骨, 竟然入口即溶...... 點解可以咁㗎 ?

D5 dinner - Hamachi

Friday night 出街吃, 結果去咗間雷聲大雨點小嘅西班牙 tapas 餐廳, 招呼唔掂, 食物唔得, 啲菜仲鹹到苦, 飲酒埋單一杯當一支, 好彩我哋 check 單. 一至通過, 呢間冇下次.

D5 1/2 - Salmon Avocado Pancake

DAY 5 1/2 : 臨搭機返香港嗰朝最後衝刺, 去 West Village 食 brunch, 又係嗰句, 做乜美國人食咁多㗎 ?  我留 5 日已經食咗平時 5 個禮拜要食嘅嘢, 夠喇 !
去完呢個 trip, 我會將 NYC 食嘢警示降番到黃色 : 有癩嘢機會, 但可接受水平. 

原來就係咁簡單

老 'app app', 兩個禮拜前先第一次踏足美國 😜, 一落機立即扁頭痛, 唔係機場風水唔好, 或者劈得太多, 而係聽到周圍啲人講嘢, 嗰啲美國 accent - 好煩.

打的去紐約市中心冇難度, 點知去到酒店, 下晝成 3 點間房都仲未 ready,  reception 話有房會用 email 通知.  吓, email...... 唔係打電話或者 send 短訊 ?!  真係第一次聽 😳   咁唯有四圍行吓, 等運到.  

完全掌握唔到紐約街道嘅 scale, 唔知行得快, 定其實唔係想像中咁大, 亂行, 行咗唔夠一粒鐘, 已經可以經過晒喺 midtown 原本諗住用半日完成嘅幾個景點.

同 friend 講, 咁快睇完唔掂喎, 佢話 : 車 ~ 去多次, 睇夜景咪得囉 !  哈, 又係喎, 點解而家會變到咁蠢.

出外靠朋友, 個 friend 真係唔話得, 一連 5 日早午晚三陪 (飲 - 食 - 玩 ).  全靠佢, 個行程先可以咁充實, 順暢, 最緊要地鐵 / 巴士任我行, 走少好多冤枉路.  仲跟據我嘅 wish list, 帶去當年喺巴黎時期想去影嘅 iconic locations 拍沙龍.
 

Flatiron

首先最想講呢個 ' 熨斗大廈 '  Flatiron.

唔知點解, 自從 6 歲, Flatiron 就喺夢中間歇出現, 但 background 永遠都係污天黑地打仗前夕, 希望夢境唔會成真.

Vapour on the streets

睇戲以為街頭蒸汽係拍戲搞氣氛, 原來係堅, 有實用價值.  好白痴走去聞, 唔識形容, 當然唔係香㗎啦, 但又未至於臭.  有樣好肯定, 聞完變蠢, 因為覺得返嚟後蠢咗.

Water Tower

紐約天台水塔周圍係, 但如果冇部長鏡, 真係好難 capture 到個 good shot.   啲水塔用木造, 幾世唔洗, 積落好多菌, 飲用嘅人最好自求多福.

Brooklyn Bridge

睇旅遊書, 話條橋要成粒鐘先行晒, no la !  連停低影幾次相 + 食風, 過橋時間係 18 分鐘, 不過條橋設計的確好靚, 非常 like 👍

Manhattan Bridge from Dumbo

< 秋天的童話 > 裡面嗰條 Manhattan Bridge.

等影呢張相真係把火 !

人山人海, 成條街企滿冒名而來嘅人, 唔明點解有人會企喺路中心傾偈, kiss, 擋住晒. 好難先喺啲人罅中 9 秒 9 影到呢張.

Manhattan in the rain

下雨天, 凍, 大風, 大霧 - 係 Manhattan 先可以咁型 😆

好想同番巴黎美國領事館 reject 我 visa application 嗰條八婆講, 我去 NYC 就係為咗影呢幾張相㗎咋, 完全冇遐想.

你估我會係留低做黑工, 跟住搵條美國佬嫁咗佢, 搏入籍, 賴死唔走嗰啲 ?  慳啲啦八婆 !

芥蘭不老傳說

同美國廿幾年恩怨, 終於要去紐約化解.  有 friend 認為我唔會鍾意, 話又貴又污糟, 所以出發前將期望 set 到 0, 旅行目的為探吓當地朋友算.

為求將 < 貼錢買難受 > 嘅風險減低, 事前出咗啲力做好 research, 務求一擊即中, 希望喺紐約順利做到想做嘅事, 去鍾意嘅地方.

為咗更投入, 仲好白痴咁重溫咗幾套喺 NYC 拍攝嘅殘片 :  秋天的童話, 這個殺手不太冷, 9 1/2 weeks, etc. 😂

橫掂都係, 對自己好啲, 用多年嚟辛苦儲落嘅 mileage 換咗套好抵嘅機票. 點解抵 ? 套票原價廿幾皮, 而家免費坐, 就算紐約真係唔好玩, 感覺上都有廿幾萬補償啦 😆

上到機, 一如所料, 啲客全部阿爺級, 好多年前 Sammy 同任賢齊嗰套 < 嫁個有錢人 > 喺頭等艙識後生靚仔, 焜人吧 !  真正高富帥, 坐晒私人飛機啦.

記得 N 年前, CX 竟然請我去頭等客坐談會, 因好奇出席, 去到先知出事.  席間幾位好明顯係頭等常客, 而我就係 CX 搞錯而出現嘅一條茂里, 格格不入......  既然去到, 咪聽吓人噏乜囉.

後來領悟咗兩件事 :

1. Wants are unlimited
2. 吹毛求疪 - 上得床來牽被冚

有外籍人士話 CX 唔掂, 因為幾次班機 full 咗淨係 upgrade 佢上 first class, 老婆冇份, 佢認為 upgrade 應該要 up 埋同行嘅人, 闔家嘅.

另一香港名媛, 投訴飛機餐啲菜唔翠綠 😒.  心諗 ...... 你係咪痴㗎 ?  條菜由煮好至上機侷咗咁多粒鐘, 變黃係正常喎.

結果多年後, 竟然喺飛十幾粒鐘嘅機上見到咁翠綠嘅芥蘭, 咬落仲好爽添, 唔知搞咗啲乜呢 ? 好驚呀 !

First 屎都唔代表一定好

人哋裝修咗成兩年, 上星期先有機會入 CX first class lounge 見識.  

唉, 做呢間把鬼公司, 出埋啲至至至 cheap 機票, 飛極都儲唔夠分升呢做高級會員.

入 lobby 嗰刻有啲期待, 點知唔夠兩秒就 feel 到唔對勁.

啲人幾乎唔講嘢個喎, 死氣沉沉, 個 lounge 靜到成間圖書館咁, 搞到我連行都唔敢咁大步, 費事嘈親人.

晨早 7 點幾, 冇理由蒲吧㗎......  去餐廳食嘢打底先. 

同另一個鬼佬客同時到達餐廳門口, 哈, 條 staff 眼尾都唔望我, 竟然淨係招呼鬼佬.  頂佢, 好叻咩, 自己入去搵位坐.

幾個後生仔 staff 車輪轉, 掛住 serve 周圍啲鬼, 完全冇人理我, 問攞餐牌一尾話等等, 見到鬼揖手就助跑式衝埋去, 烚熟狗頭 sir 前 sir 後, 擺明種族歧視.  

一齊入 lounge 嗰個都有嘢食喇, 我都仲喺度呆等.  終於, 有個個樣善良少少嘅中年職員發現我, 不過已經谷鬼氣, 食龍肉都冇味, 叫咗碗粥, 劈咗兩杯檳就走人.  

今次所謂 first class lounge 體驗, 非常差勁, 下次真係請都唔入, 寧願喺普通 lounge 同人迫, 起碼 self service, 唔駛睇人面口.

去完個 trip 返嚟, 同事問喺美國有冇比人歧視, 呵, 完全冇喎, 連入境嗰陣, 海關都係問咗 3 條簡單問題就放人.  我又唔係著得寒酸, 唔明點解喺香港反而會比香港人歧視囉.