飛甩老土

成個八月停飛, 無非為咗專注醞釀一件大事 👊👊👊  

點解唔撈 ? 馬雲講得好, ' 不爽 ' 囉 !

不爽

不爽

啲人成日話要增值自己, 但喺呢間公司, 只覺得愈做愈霉, 每日不停被貶值, 我唔要好似啲喺度踎咗十幾廿年嘅鹹魚 ( 同事 ) 咁, 不思進取同外界脫晒節, 毫無競爭力.

咩撚 ad 嚟㗎 ?!

今年五月踏入 5 週年當刻, 一啲都唔興奮.  反而, 同自己講, 無論如何, 都一定 fxxking 唔可以喺呢個鬼地方渡過第 6 年 !   

尤其見到呢季 ad campaign ( 附圖 ) - 醜陋 ! 低俗 ! 色情 ! 簡直不知所謂, 對公司徹底失望, 完全死心 !  

絕對唔可以忍受及認同呢啲佢哋覺得 fashionable, 但其實超級過時老土冇品味同 cheap 嘅風格.  呢劑唔開行 turbo 走人都唔係人.

做埋下面個問卷, 1000% 肯定自己撇得啱.

睇清楚, 呢個 model , 係女人嚟㗎 !

 

 

 

 

 

 

 

 

 

 

 

 

 

 *** 我回答 underline 顯示

工資福利

Q1 : 公司給的薪資與我覺得自己應得的是否匹配？ A : 不匹配, 所以要縮減辦公時間, 一星期只返 2-3 日工去 ' 和果 ' ( balance )

Q2 : 公司提供的福利制度是否優於業界水平？A : 完全比唔上, director grade 嘅 medical 竟然仲 ' yap ' 過舊公司我做 manager grade 嗰份

Q3 : 薪資有令人期待的成長空間 A : 唔會有期待, 公司自我封閉, 逆潮流, 反通漲, 不會有成長空間
Q4 : 當我表現出色時能獲得相應的獎勵 A : 公司會壓落嚟比更多嘢你做
Q5 : 薪資是否能支付現階段可接受的理想生活開銷？ A : 如果一星期只返 2-3 日工, 慳番交通費還可以

學習成長

Q6 : 我在這份工作中還有學習與成長的空間  A : 學習迂腐, 同喺迂腐環境下成長
Q7 : 部門裡有值得學習的同事或主管  A : 冇, 個個士氣低落, 額頭鑿住 ' 冇癮 ' 兩個字

Q8 : 完成工作中的任務能讓我得到成就感  A : 完全冇面話比人知, 啲設計過時守舊老土嘅鋪, 係自己做嘅
Q9 : 公司願意提供更多學習資源 A : 冇

Q10 : 在公司能接觸到不同領域的人事  A : 有, 過時守舊老土, 逆潮流, 自我封閉領域的人或事

情緒人際

Q11 : 工作時，我是愉悅的 A : 冇蠢人阻住嘅時候還好
Q12 : 在工作中能與主管溝通順暢 A : OK
Q13 : 與同事相處融洽愉快、私下關係佳 A : OK
Q14 : 下班時，想起工作不會感到負擔 A : 會, 同埋半夜醒咗諗起會嬲到瞓唔番
Q15 : 工作狀態不至於影響睡眠品質 A : 會 x infinity !

未來發展

Q16 : 公司的前景和未來發展性佳 A : 不良公司, 行政混亂, 決策差, 總部高層不團結, 前景和未來發展堪虞
Q17 : 在公司內部有升遷機會 A : 0
Q18 : 公司內部教育訓練制度完善 A : 有咩 ?
Q19 : 這份工作符合自己未來生涯規劃  A : 再喺度做, 代表未來生涯規劃真正玩完

Q20 : 之前在自己職位的人，後來發展佳  A : 因為離開咗呢間公司, 所以發展變佳

生活方式

Q21 : 在公司工作的生活模式符合自己期待 A : OK

Q22 : 在公司工作的生活模式符合家人期待 A : OK

Q23 : 跟朋友提起工作時還算滿意 A : 工作性質 OK, 公司 NOT OK

Q24 : 能拿捏工作與生活之間的平衡 A : CAN
Q25 : 公司的地點和環境理想 A : 鬼地方, 非常不理想, 公司樓下食餐晏要過百 ! 區內連銀行都冇間, 得一千零一間嘅 Seven, 因太冇人幫襯去貨慢, 連啲奶都壞㗎 !!

忽然 ( 食 ) 英國

社會動蕩, 但飯始終要出街食. 尋日七月十四盂蘭佳節, 適逢其會 double trouble 打孖上, 去銅鑼灣某英國菜 private kitchen 大吃一頓.

雖然喺殖民地長大, 不過對英國認識甚淺 = 正所謂識條鐵, 成世人踏足英國次數五隻手指數得晒, 印象最深, 除咗污天黑地, 就係餐廳難食指數極高 👎👎👎 , 難怪英國咁多酒鬼, 比我喺嗰邊寧願日劈夜劈都唔食啦.

呢間年初開業私房菜一晚只招待 12 人, 佢哋千叮萬囑, 勞煩客人 7:30pm 準時到達, 同步開席.  點知最後都係要成棚人呆等兩條遲到, 成 8 點先現身嘅狗男女 😠  
同返工做嘢一樣, 當你想全速前進之時, 永遠總會出現啲無謂人拖你後腿咁囉.

話說回頭, 因為想盡食, 所以當日早上開始留肚, 希望以饑餓狀態迎戰.  

廚房設備極度簡約, 一男兩女施展渾身解數, 煮出 17 度好菜.

每碟都有諗過踱過, 以英國菜嚟計, 超越好食 level ! 

飯局尾聲, 我哋班人瘋狂劈檳, 飲到痴呆階段, 因此比其他人客表現冷漠, 同廚師互動極少, 好彩最後同行加燦 ( Canadian Chinese ) 出盡飲奶之力唧出話題, 問咗廚師一啲同食物完全無關嘅嘢 😂  講真, 就算冇劈爆, 都諗唔到有乜可以交流啦, 我哋又唔係廚神, 嚟食好西之嘛, 食完過咗癮就算㗎啦, 唔駛認真談論嘅.

唔搭飛機去機場做乜

明明已經立秋, 唔知點解都仲係熱到成個熔爐咁, 空氣又渾濁, 如果呢刻香港大停電冇冷氣, 我應該會立即熱死.
  
今朝入機場開會 ( 唔係集會 😆 ), 下晝因有人會疊友去接 < 范宋忠 > 同 < 梁知 > 機, 無啦啦離境大堂 check-in counter 行段同之後嘅範圍, 竟然要出示機票或機場職員證先比入喎, 冇嗰樣整嗰樣.

一個送機一個接機, 河水不犯井水, 搞啲離港旅客做乜啫, 完全低級思維, 不知用意何在 ! 
 
晨早溜溜無謂勞氣, 橫掂我張 < 期間限定 > 職員證就到期, 不如趁早喺機場四圍攞吓著數仲好.  

有乜 jetso ?   食嘢同買嘢都平啲啲囉 (10-20% off ), 有餐廳仲有員工餐牌, 但比起出面其實一啲都唔平, 例如今朝 < X 斗 > 食嘅早餐 : 魚片粥加豆漿 ( 仲要賣晒, 要轉檸水添呀 😕 ) 都成 40 蚊 !  但望番佢餐牌啲正價成 80-90 蚊碗嘅粥, 已經平咗半.  好彩 < 正 X > 個魚片粥好 " 正斗", 都值得嘅.

另外, 買化妝品, 酒, 零食, 雜誌, 外幣找換, 連 massage 都有 10% off, 下禮拜工程完畢要還咭了, 一於拖埋個拉篋入去掃貨, 唔好蝕.

七月的打風日

起飛前空姐比我狂飲兩杯檳

七月最後一日, 出糧日, 仲 8 號風球添 !  臨上機知香港打大風, 擔心返到嚟冇車走, 不過諗多無謂, 到時先算啦. 

飲大兩杯大覺瞓, 瞓醒已經差不多要降落.  機長明明叫晒啲 crew 坐低準備 landing, 跟住又突然宣佈香港天氣極為惡劣, 落唔到要盤旋多 30 分鐘, 架機又震晒.   

KA901 玻璃窗外的風暴

機師大佬, 唔得唔好呈強, 千祈咪夾硬嚟 🙏, 我唔介意你調頭走飛返北京, 嗰度天氣咁好.  

好彩最後安全着陸, 做咗空中飛人廿年, T8 飛原來第一次, 係會驚嘅.

今次北京之行好充實, 除咗公幹, 仲有兩個 bonus :

1. 到埗第一天喺三里屯見到一條巨大嘅 🌈  --  仲要好近, 超讚 !

大到阿媽都唔認得嘅彩虹

2. 無意中發現咗個好搞嘢嘅 ' 胡同泡泡 '.   乜料 ?  係北京火紅建築師馬岩松嘅杰作, ' Hutong Bubble ' = ' 胡同裡面嘅一個銀色反光氣泡 ', 明 lu 掛 😆

去到先知係私人地方, 但門冇鎖, 搏懵入去𥄫下, 最多咪比人趕出嚟 ?!

銀色 bubble

點知唔止冇被趕, 裡面啲人仲好 nice 帶我哋參觀.  原來嗰度係北京 Burgundy 種類最齊全嘅酒窖 ! Burgundy 係賣飛佛, 太驚喜了.  

佢哋定期舉辦品酒會同派對, 比啲酒友聯誼吓交流心得, 啱啱先搞完 DRC tasting, 兩萬八人仔一位, 十位名額晨早 fully booked, 你話而家啲大陸人幾有錢吖.

樓梯內部

個銀色 bubble, 其實係條上天台嘅樓梯, 上到天台, 我不禁嘩一聲大叫出嚟 !

做乜嘩 ?  因為 exac7ly 係我嘅 dream setup 囉.  夢幻劈酒格局 : 超 privacy / 美景 /高人一等 / wooden deck / 露天.

張長枱有個水溝, 原來係 recessed 冰桶, 用嚟放冰 chill 啲白酒香檳,  非常有氣勢.  落番地面, 原來佢哋仲有個茶館, 不過我興趣不大.

天台劈場

莫 (無) 奈花園

上月巴黎之旅其實仲有嘢寫, 不過太懶, 拖咗幾個禮拜到今日先出手.

Claude Monet

話說原本打算參觀圖書館, 點知撞正法國假期閉館, 懶 artistic, 臨時改行程出城去咗離巴黎市中心 1.5 小時車程, 法國印象派大師畫家 < 莫奈 Claude Monet > Giverny 故居睇吓.  有乜好睇 ? 靚囉.  同埋好想搵番廿幾年前 ( 1996 ) 同同學仔一齊去嗰種無憂嘅情懷.

請問邊度有 ' 大把車 ' 呢 ?

當年點去冇晒印象, 而家上網摷話好方便大把車, 搭完火車轉乘巴士或的士就得.   果然不出所料, 中伏 ! 唔知法國 < 大把車 > 係乜定義, 總之出到站水淨鵝飛小 la Sing 一架巴士的士都冇 !  好彩𥄫到另一邊有架 petit train ( 小火車 ), 照殺啦, 慢啲好過冇.  

小火車

等開車期間突然 ' 澎 ' 一聲成架車震咗吓, 驚魂未定, 嚇見一對中年港人夫婦登車坐咗我後面.   聽佢哋對話, 應該係啱啱退休一齊遊阜, 做乜 ' 澎 ' 一聲 ?  因為佢哋每人帶咗個超過 25 kg 嘅大拉篋, 打算行完立即趕火車去第二度.  

心諗, 佢哋癩嘢喇...... 因為我好肯定 < 莫奈故居 > 冇行李存放服務, 亦都一定唔會比拉篋入, 好唔好擰轉頭講佢聽呢 ?  最後冇, 你一番好意啫, 可能人哋唔領情喎, 無謂多事乞鬧.

小火車到站原來落車仲要行成 200 米落斜, 再加 300 米上山先到景點, 我孭個袋仔都行到氣喘, 佢哋拖兩個重到可以車震嘅拉篋, 真係祝佢好運, 千辛萬苦拉到去先話唔比入, 唔知點收科呢 ?  ( 答案下面找 )

Le jardin de l'artiste a Giverny - 油畫 ( 1900 )

< 莫奈故居 > 充滿住各式各樣嘅花, 現在一年只對外開放幾個月, 每月不同花期, 今次就有五六月盛開嘅 Iris, 同埋一年四季日本花園. 
 
莫奈由 1883 年開始, 用咗 40 幾年時間喺呢度寫生, 直到 1926 過身為止.

Giverny Garden - photo ( 2019 ) 😍

話到明靚, 要 show 兩張相證實吓.  講真, 實景係仲要靚過相 N 倍咁多.  

Japanese Garden - photo ( 2019 )

可惜公眾假期遊人太多行花市咁, 比人迫多兩迫, 開始扯火, 都係摩打腳行快兩步, 光速離場睇吓趕唔趕到早一班 petit train 轉火車返巴黎.  

去到站頭, 見到拉篋夫婦目無表情呆坐 😱.  噢...... too bad......  < 莫奈故居 > 參觀路線全是 one-way, 佢兩個拖住篋冇理由會扒到我頭, 好明顯一早喺門口已經被 KO 拒絕入場, 所以呆坐站頭等咗兩粒鐘 ( 小火車回程班次唔頻密 ).

真係慘豬, 但亦都有啲覺得個老公太高估自己, 低估人哋, 出發前冇查清楚, 雖然做咗 research 都會比人跣, 但一啲都唔 check 就會落得如此下場吧 ( < 莫奈故居 > 官網寫明行李唔比入) !