東京大食の走後門

同蘇民峰前後腳去東京, 佢嬲豬喺 fb 投訴某米芝蓮 3 星只得 7 樣嘢食, 食佢唔飽 😆

就個人經驗而言, 米芝蓮星愈多就愈冇驚喜, 通常 1 星嗰啲仲靠得住, 因為班人仲有團火去 make bigger efforts,  施展混身解數希望擇更多星, 反而 3 星嗰啲已經上晒神檯, 穩穩陣陣唔做唔錯 keep 住唔跌 watt 就得.

今個 trip 至好食, 係間喺東京車站對面 Midtown 八重洲 3/F, 乜星都冇嘅壽司店.  2023 年從千葉搬到東京, 貴精不貴多每晚只做 6 個客, 壽司師傅好手勢之餘價錢合理, 至少可以一定吃飽先 !

同枱兩 pair 日本人, 咁啱得咁橋都係 [ 有米 50+老男 x 周身名牌 20+嫩口靚女 ] 組合, 我哋兩條衣衫襤褸茂利坐中間做電燈膽 😂.  8pm - 10:30pm 兩個半鐘食足 20 道菜, 份量十足, 師傅手勢實在一流, 調味非常出色, 引爆魚生鮮味 !  

雖然早在 9pm 已經飽到上天花, 但咁好食唔食晒佢又對唔住自己, 同埋個師傅企正喺面前望住, 想搏大霧俾 friend 食埋自己嗰份都唔得.  所以 9:05pm 之後上嘅每一度菜, 我都用意志 💪 去 KO, 結果成功食晒全部 😆😆😆

餐廳設計相當搞嘢, sushi counter 旁有道半高暗門, 原來係餐廳人客通往商場廁所嘅捷徑, 其實行餐廳正門都去到廁所, 不過就要行多 20 步 😄😄   見啲日本人捐得咁過癮, 我哋死跟捐吓囉, 哈哈.

東京大食の飽到嘔

飽到嘔, 原來真係會發生.

東京之旅最後一晚, 一試百年歷史老字號壽喜燒 https://autoreserve.com/zh-hk/restaurants/mKfSRWxvPV1k2ZpewVrw. 去之前, 朋友問我食普通定係肥牛餐, 呵 ~ 肥餐啦梗係.

餐廳玄關氛圍有啲奇怪, 冇人接待, 企咗幾分鐘, 終於有個好 kawaii 嘅混血女侍應出嚟帶我哋上樓上包廂. 

望真, 包廂非常有歷史, 有韻味, 但加埋神壇再整個人形擺設, 如果要我喺度過夜真係驚驚. 

估唔到間店除咗歷史悠久, 連侍應都係歷史級 😆  同我哋煮壽喜燒嘅係個阿婆. 朋友話呢啲 ' 鎮店之寶 ' 個個都係後生做到老. 

Haha...... 所以阿婆 N 年前可能有混血女侍應咁 kawaii 都唔出奇 😜. 

明明聽唔明廣東話, 但我哋笑嗰陣阿婆又會跟住一齊喺度呵呵呵咁偷笑, 真係超搞嘢 😂😂

以為自己好醒 order 嘅霜降肥牛餐, 3 大片上到枱先知終極賴嘢, 目測油花佔整塊肉 7-8 成大比數 😱😱😱 ! 入口根本就係超級肥膏, 勁 heavy 半片肉已經徹底 KO 我.  雖然成晚食得唔多, 但真認覺得好飽, 其餘兩片肥牛要靠朋友幫手食埋.

 

席間, 朋友不斷強調呢間好食過 [ 今半 ]  http://shirliek.blogspot.com/2019/03/blog-post_24.html  不過, 我就覺得幾年前去嗰間 [ 今半 ] 啱我口味啲.

呢個壽喜燒好滯, 食完滯住返酒店. 瞓瞓吓瞓到 1 點半忽然想作嘔 ( 澄清 : 唔係醉, 係飽到嘔 😂 ), 衝入廁所根本都唔駛用力, 耷低頭開口就自然吐出霜降肥牛碎片 😂😂😂, 原來成晚啲霜降牛完全消化唔到, 無福消受, 嘥料 😒

東京大食の熱到暈🔥

東京之旅, 食食食食 💪💪  

肥...... 食咗先減 !

朋友細佬東京住咗好多年流利日文, 有佢照住, 真係想撞板都難.

第一晚去西新宿食爐端燒 https://robata-sho-shinjuku.com/. 嘩正, 因為成世人都未食過爐端燒㗎 😂   遇著東京酷熱天氣, 晚黑 8 點幾都仲成 38 度 🔥 條街又侷 🔥, 由地鐵站行去餐廳 5 分鐘, feel 到啲汗一滴滴由背脊經過股罅再流落大脾 😆😆😆 

餐廳位處地牢, 我哋有間私家房, 自成一角, 可惜房冷氣唔夠, 應該話係幾乎冇 😆   朋友細佬話每次都係冬天幫襯, 唔知餐廳夏天原來會咁熱 🔥  唔緊要喎, 㷫烚烚 🔥 咪仲好氣氛.

終於學識欣賞 sake, 若然今次嚟東京都唔搏老命就真係唔係人 !  我哋飲完一壺又一壺, 店長好好招呼笑到見牙唔見眼.

除咗飲, 當然就係食啦.  

打頭炮超鮮味魚生拼盤, 接住係來自北海道嘅深海魚 Kinki 喜知次 [ キンキ ] ( 圖左下角橙紅色嗰條 ), 用木炭烤, 魚脂四溢, 簡直好味到唔識形容 😍😍😍

食完條 kinki 已經飽咗 9 成, 之後嘅多碟蔬菜 ( 我唔食菜嘅 ) 同另一條魚, 都只係揸流灘象徵式觀賞 😆  不過憑朋友嘅食相同表情, 得知應該係相當美味的. 

一如以往磨爛蓆, 坐到人哋打烊, 臨走整個開心大合照, 哈哈, 構圖係咪非常日本呢 ?!

藝術呢啲識條鐵

食過番尋味, 六月尾整咗個 quickie, 快閃曼谷 3 日兩夜.  

今次認真歎記, 完全躺平唔駛用腦, 交晒俾朋友安排, 仲有佢哋車出車入, 簡直帝王式享受 😆, 成個 trip 真係連一滴汗都冇流過.

密集飲飲食食之餘, 朋友提議去 2024 年曼谷好火, 位於唐人區附近嘅一個藝術場地 Bangkok Kunsthalle, 我問佢乜嚟㗎, 入面有乜睇 ?  朋友支吾以對, 唉...... 算啦, 當見識吓泰式藝術都 ok 嘅.

去到街口, 遠眺館外已經聚集大量年輕群眾 ( 年齡應該係我 1/3 😂 ), 個場果然十分火 🔥🔥🔥 

雞同鴨講, 好彩工作人員非常友善, 耐心教我哋點 scan QR code 登記, 話排隊要排大約 45 分鐘 😨 ( thanks god 好彩有櫈坐 ). 身為全場唯一老嘢, 唔等都等咗咁多年, 45 分鐘又算係乜吖.

點知, 一排就排咗成差不多個半鐘先輪到我哋 😒 心諗, 等咁耐, 如果一陣壇嘢流, 朋友跟住就知味道.

原來我哋係嚟體驗一個 [ brustalist 頹廢空間 + 超勁低頻聲響 ] 嘅裝置藝術, 參觀者亦成為藝術品嘅其中部份, 成件事拍照效果超爆, 非常非常之 dramatic ! 

不過除咗參觀者, 我仲 sense 到有啲阿飄 ( 馬後炮 : 其實排隊嗰陣已經耳鳴 ), 即場冇同朋友講, 怕嚇親佢哋, 只係不斷催谷自 J 拍照中嘅佢哋加快速度, 務求儘速撇 !

其實個場幾特別, 睇完成個人好似多咗啲氣質同藝術修養咁 😂  哈哈, 收貨, 朋友最後當然亦冇被我詐型.

點解而家啲人唔出街食飯

剛剛星期四上海朋友來港, 話想見面, 我提議不如搵個好地方食個靚飯, 點知朋友叫我唔駛搵, 因為可以去佢香港私人會所.  哈哈, 乜私人會所咁巴閉 😆 ?!

收到飯局地址上網一 check, oh 咁得意嘅...... ?  港島半山新落成豪宅頂樓特式戶, 奇怪在嗰座啲盤全部都未開售個喎.

去到終於水落石出, 原來朋友錢多, 每月俾幾廿皮租咗個連天台 7 千幾呎豪宅玩具, 攞嚟自己去香港嗰陣招呼客人 😜, 認真有霸氣 !  工廈私竇就聽得多, 租間屋平時唔住人, 剩係用嚟做飯堂, 我第一次見.

當晚仲請咗中環米芝蓮中菜前大廚連助手到場, 煮出度身訂造私人菜單, 加埋兩位阿姨侍候, 成件事十分土豪.

大陸人飲酒作風豪邁, 好在飯局酒水方面比較收斂, 只有香檳同陳年威士忌供應, 全晚就算不停地車輪 ' 隊 ', 都冇出大事.  最後 5 男 4 女當中只得兩位男士飲到趴喺度, 好彩走嗰陣仲識醒, 自己行得郁唔駛人抬 😂😂😂   

激戰意國中菜

今趟意國之旅, 因為同行朋友唔係咁習慣食西餐同長途旅行, 所以好例外地安排食吓唐餐, 慰藉佢哋思鄉之苦.  

非當年真實拍攝圖片

其他大城市唐人街啲中餐好食, 但我到今時今日都未夠壇數去欣賞意大利嗰啲, 佢哋太 creative, 亂咁嚟, 九唔搭八大兜亂 Q 炒埋一碟 !  

回想起 N 年前喺羅馬, 當地朋友對中國文化極之好奇, 見我係中國人就當我公仔咁玩 😆  基本上見面除咗飲酒, 耐唔耐就捉我去一齊食中餐睇我表演揸筷子.  當年嘅我, 做咗廿幾年人先第一次見識中菜原來係有沙律嘅 : 牙菜撈橄欖油 + 黑醋 ( 注意 : 牙菜係生食, 冇煮過架 😂😂😂 ).

非當年真實拍攝圖片

另一道令人畢生難忘, 非 ' 蒙古炸田雞腿 ' 不可 !  賣相味道就好似攞啲風乾咗 20 日嘅麥當勞薯條去翻炸翻炸再翻炸一樣, 班意大利 friend 竟然話正 😓 當刻差啲拍枱尖叫要同啲田雞平反, 因為真正田雞肉好滑, 唔係嗰啲柴皮咁㗎 😂😂😂😂😂😂 

廿年中菜陰影耿耿於懷, 今次再戰羅馬, 朋友第一印象不容有失 !  決定搵間 upscale 啲嘅 DAO https://www.daorestaurant.it/, 網上評論似乎唔錯, 雖然離市中心遠少少, 不過我識搭巴士嘛.  去到整體感覺良好, 裝修有格調, 除咗口門有金髮意大利妹接待, 最驚喜係有位女侍應識講廣東話, 令點菜毫無難度.  

食物方面相當有水準 ( 如果對鑊氣呢方面冇特別堅持嘅話 ) *我俾 70 分, 再加服務 10 分 = 80 分 👍.  女侍應話習總 2019 到訪羅馬都喺度吃, 不過對我呢個唔係賣點 😆.

米蘭中餐係臨時加插, 到達當日天雨關係, 加上友人連日舟車勞頓有點疲態, 結果去咗酒店隔離街一間中菜小館, 等佢哋可以喺冇負擔 / 壓力嘅環境下醫肚. 入到餐廳, 笑咗, 因為樓面係餅印一家四口 ( 爸媽姐妹 ) 複製人 😄

食物如何呢 ? 除咗碟炒菜正路啲, 全部賣相都有啲似曾相識但又有少少變種, 味道其實還可以的. 

不如試吓看圖估吓我哋食咗乜 ?  [ 下面開估 😜 ]

左上 : 肉碎蒸水蛋 ( 原本應為蜆肉蒸水蛋, 不過蜆肉賣晒 )

左中 : 水煮牛娃 ( 唔好意思, 或者啲牛蛙太瘦, 睇落酷似簷蛇斷肢 😨 我發誓唔會再喺意大利食蛙類食品 )

左下 : 燒賣 ( 大種 ? )

右上 : 蒜蓉蒸蝦 ( 調味非常重手衾晒蝦嘅鮮味 )

右中 : 炒菜芯 ( 正常 )

右下 : 排骨粟米湯 ( 我冇飲 )

*個人評分 : 食物 50 分 + 服務 8 分 = 58 分

羅馬巧驚驚

 

無驚無險, 五月又走咗轉意大利, 托賴今次冇乜特大驚險, 除咗香港起飛嗰晚因為睇錯時間差啲 miss 咗班機 --> 00:50am 起飛我懵盛盛 00:28am 仲喺 lounge hea 緊... 猛然驚醒 😱😱😱 由 63 號閘喪跑 1.1km 去 15 號閘 ( 見下圖 : 紅色奔跑路線 ).

努力飛奔途中仲要接電話, 因為空服狂 call 打鑼摷我, 好彩最後 00:38am 跑到登機位置 😅, 魚翅航空都算係咁, 如果比着外國啲航空公司, 一早就已經 offload 行李踢我落機 !  

 

成世人除咗中小學 PE 堂都冇乜再跑, 赤鱲角呢一跑殺死我唔少細胞, 上到機坐低個心都仲係咁跳, 要跳到派餐先慢到落嚟.

 

因同行友人第一次去意大利, 為免帶俾佢哋太重口味回憶, 所以今次安排行程為 [ BB 入門級 ], skip 晒一向本人非常喜歡嗰啲 K 型騎呢景點.  不過人算不如天算, 最後都比羅馬嚇咗佢哋兩劑, 陰功 😆

 

1 ) 羅馬鬥獸場 Colosseum 

廿幾年前入過一次之後完全冇打算再入, 因為感覺不佳, 鬥獸呢個 idea 太殘暴, 古時羅馬人仲竟然可以將殺戮當為娛樂, 認真變態 !  同埋裡面死過咁多人 / 獸, 唔駛問都知陰氣勁, 所以多年來都係 ' 到此一遊 ' 式喺外圍行個圈算. 今次破例, 諗住帶朋友入裡面打個咭, 點知就賴嘢.

 

朋友話入完鬥獸場回酒店突然感到天旋地轉, 仲話參觀嗰陣其實已經覺得周身唔自然 ( 雖然我去到都有起晒雞皮, 但好在冇後着 ), 可能陰氣太重頂唔順啦.  心諗, 唔係就咁玩完嘛, 嚟緊仲有成 6 日行程喎 😓, 好在食完飯返酒店, 唞咗晚第朝起身冇晒事.

2 ) 的士佬罷工示威

接著第二朝, 原來意大利全國的士佬因為不滿 Uber 發動罷工, 仲喺羅馬市中心街頭集合示威抗議, 不幸我哋撞到正 !  四圍封晒路一大班警察人牆, 咁難得梗係唔好嘥, 愈行越近拍幾張沙龍啦, friend 見我行又跟住行, 點知行行吓前面突然發出 " 嘭 " 一聲疑似爆炸巨響, 當刻我真心覺得好過癮, 不過回頭一望, 原來友人已經俾呢個突如其來嘅聲響嚇到面青 😨

 

事後覺得好對佢哋唔住, 因為佢哋唔識聽又唔知發生乜事, 應該會真係好驚.  我就話喺羅馬嚇大啫, 佢哋新嚟未必承受到, 希望唔會太大陰影啦.