Horsey is fun

2025年6月14日星期六

晚食過一戙

5月 21日起, 一連 19 天晚晚七街食, 唔止飽, 仲好攰, 因為馬拉松連環躝街都需要有番咁上下體能.

今個禮拜頭唞咗兩晚, 星期三四又食過.

中環安蘭街呢間日系割烹料理 Ryota Kappou Modern https://www.ryota.hk/ 其實開咗七年, 出奇地一次都冇幫襯過.

啲 friend 痴線唔知做乜咁準時, 我早到 5 分鐘都已經係最遲嗰個 😆😆😆

場地黑𠵼𠵼環境相當有格調, 接過 waitress 餐牌, 哇 9 道菜鮑參翅肚樣樣齊, 同去飲差唔多 😂

香港市道差, 但星期四嗰晚餐廳坐無虛席 full house, 可惜地方細, 人均 $3000 計, 就算坐滿成晚頂多做到 6-7 皮.

出嚟之前公事不順, 心情欠佳, 未能專心品嚐食物及欣賞廚師們喺 open kitchen 創作料理之樂趣. 一日後回魂, 先醒覺起有 4 道菜其實特別好食 :

1. 鮎香魚春捲 RIVER AYU SEETFISH SPRING ROLL 😋😋😋 - 炸到脆卜卜春卷皮包住鮮嫩多汁白色魚肉, 日版 fish n' chips.

2. 魚翅鮑魚湯 HOKKAIDO ABALONE SHARK FIN MINI HOTPOT 😋😋 - 因為本身好鍾意食翅, 未打先贏, 日式高湯帶出非常豐富的口味, 可惜鮑魚 😑 我麻麻, 所以冇俾滿分.

3. 魚生拼盤 SEASONAL SASHIMI 😋😋😋 - 擺碟勁靚, 每片魚生配搭不同調味, 啖啖都係驚喜.

4. 毛蟹素麺 HAIRY CRAB SOMEN WATERSHIELD 😋😋😋😋 - 當晚食物總冠軍, 成件事可以用 '清新芳香' 呢四個字形容, 兩片薄薄嘅青檸簡直畫龍點睛.

JAPANESE WHITE PEACH SCALLOP KYOTO TOFU CREAM CAVIAR | RIVER AYU SWEETFISH SPRING ROLL 😋😋😋 | HOKKAIDO ABALONE SHARK FIN MINI HOTPOT 😋😋 | COLD EGG CUSTARD

SEASONAL SASHIMI 😋😋😋 | WAGYU & UNI SQUID SUSHI | SIMMERED KINKI SMOKED EGGPLANT

GRILLED OMI WAGYU WAFU SAUCE

HAIRY CRAB SOMEN WATERSHIELD 😋😋😋😋

MELON CREAM SODA

其實個燒和牛都好香,不過我只係食咗一塊,幫手食埋我份嗰個人仲一路食一路潤我 😆, 話多年前問有乜嘢嘢食, 對我嚟講係一定唔可以喺呢個世界消失 ?

佢笑笑口話我當年答佢 : 牛肉 ! 因為牛好好食, 真係好鍾意食牛 ! 估唔到, 今天嘅我竟然少食.

諗諗吓, 又好似真係有咁講過喎 😜 哈, 條友又會咁好記性嘅 ?!

2025年6月8日星期日

不留港消費 L

啲人成日話自己唔飲得, 其實唔係㗎. 除非真係唔鍾意酒嘅味道又或者對酒精過敏, 飲酒, 係有得學. 酒量, 係可以訓練㗎.

當年考酒牌結識到志同道合嘅酒友, 自從 2011 年尾大家定期舉行酒局 😆.

葡京風水陣實在太明顯

成班酒鬼喺香港飲咗十九幾年, 有 free corkage 或特式嘅地方都已經去勻, 真係有啲悶.

Entrance to Wine Cellar

最近其中一個酒友因公務同澳門葡京入面葡國餐廳侍酒師 (sommelier) 搭上咗, 話可以特別安排我哋去參觀餐廳嘅酒窖 = 全亞洲最大酒窖. 親身欣賞已故賭王 Stanley Ho 嘅超級收藏, 呢啲機會唔係時時有, 諗都冇諗𦧲飯應.

可能日頭去, 沙圈冇乜雞

爆房 table setting

尋日, 我哋一行 7 人衝出香港過大海, 12:30 先參觀酒窖, 跟住食 lunch 大劈 💪💪💪

可惜葡國餐廳啱啱裝修緊 ( 都市傳說 : 葡京總有一瓣裝修緊, 因 [裝修] 同 [庄收] 同音, 用意好明顯啦 😉 ), 我哋被安排爆房食日本菜, 好彩食物 / 招呼都唔錯, 眾人非常收貨.

個場真係好 Q 大 . 比例上我哋都係咁細粒㗎 ja

酒窖喺葡京雀籠頂個位, 據聞現時收藏超過 50 萬支酒, 大部份仲係法國一級莊, 如果當每支 HK$1,000 ( 哈哈其實冇可能咁平 ), 保守估計市值五億港幣. 何況, 多數酒其實支支過萬, 超 rare 嘅仲三四五六十萬起跳 + 最貴嗰啲球幾嘢 --> 咁即係五億 x 10+倍啦.

貧窮限制想像 😂 只能講句 : 何生, 你真係好 L 有錢呀 !

問酒窖啲人賭王生前鍾意飲乜酒.

噢, 原來係 : 法國 Chateau Palmer 1962 同 Riesling ( 德國 / 奧地利白酒 ).

2025年6月2日星期一

魔都飲客

原來上海英租界有條咁靚嘅街

暴食 weekend 過後要留步上海兩日見客, 之前同客戶有兩面之緣, 2023 年見過工仲差啲去咗佢度做添, 不過最後冇, 因為佢喺 process 當中竟然被炒, 所以而家上咗上海.

餐廳入口比較難搵

大家都係飲酒狂, 難得相遇, 唔劈唔係人. 選址交俾客戶, 佢聽到有人請果然老實不客氣, 揀咗 Otto 1/2 https://www.ottoemezzobombana.com/branch/shanghai/, 仲叫廚師留定個窗口靚位.

上海 Otto 1/2 其實一直想試, 不過個場好似有啲拘謹所以冇, 今次公事接客條件符合, 太正了 👍

窗外風景

客戶係意大利人, 點菜重任交俾佢最適合不過, 而佢都好俾面叫我揀酒, 好彩對意大利酒有啲認識, 冇比餐廳個 wine list 嚇窒 😏

個客自己一個𡁻咗 3 個大包 😮

見肥仔推住架麵包車過嚟, 滴咗滴汗, 因為我少食包嘅, 好彩客戶係麵包怪食完一個又一個.

tunno ⭐⭐⭐ & coppa

開胃菜除咗 "豬後頸肉" (Coppa), 仲有個 "魚子醬吞拿魚生" (Tonno), 哇呢個真係極品, 柑橘汁料調味, 魚腩肉柔軟肥美, 連客戶都一致認同, 係人生食過最好味嘅 ⭐⭐⭐ ! 呢個吞拿魚生足以令我再去幫襯, 下次我會齋叫, 然後加支靚香檳, 慢慢歎.

食完開胃菜我已經收皮, 飽咗 9 成 😆 唯有用意志去食埋嚟緊嘅兩個主菜, 牛扒, 甜品.

raviolo 😍

"鴨肉意大利清湯雲吞" (Raviolo), 造型精緻 😍 睇得又打得, 呢個雲吞湯係當晚另一驚喜 ! 我發現原來喺大陸, 無論中定西, 所有熬嘅清湯都會非常好飲.

蒸螯蝦 . 得個樣 😑

另一道原本相當有祈望嘅主菜 "沙葱清蒸螯蝦" (Astice), 就唔係咁識欣賞, 質感奇怪, 葱味太濃. 今次唔係我 order, 不過以後睇餐牌要留神, 一切沙蔥物體, 要 skip !

終於輪到主角 "碳烤和牛肉眼" (Costata) 出場, 好耐冇食牛, 喺客戶堅持下試食咗塊, 碳烤肉香, 配埋濃牛肉汁又真係幾好味.

碳烤和牛肉眼

個客見我哋飽到差不多獲利回吐, 自己喫晒成塊扒, 食咁多嘢唔怪得可以生得咁高大.

見佢個樣好似未飽, 一於唔好比佢停, 叫埋甜品再加烈酒, 大家同歸於盡 😂

米芝連二星, 3 個人咁樣喪飲/食法, 埋單竟然唔駛 HKD9,000. 喺香港絕對不可能呢.

2025年5月31日星期六

追憶逝水年華

N 年前返娘家, 食食吓飯老豆同我講, 話香港啲人真係不知所謂, 返工竟然可以喺 office 打邊爐, 好離譜 ! 問佢點知, 佢話睇電視訪問 headhunter 講嘅.

當年真實圖片 1 . 個爐係我私伙 😂

哈 ~~ 條 HH 消息又幾靈通喎, 同老豆講, 做 XX 嗰陣我都有喺 office 打邊爐喎 😆 就喺當刻, 我哋 dead air 咗......

當年真實圖片 2

當年趁老闆每次出 trip, 我哋都會安排好多活動, 例如揸車去中環 | 赤柱 | 山頂 | 大浪灣 | 雙魚河食 lunch.

講到最狼死, 一定係經典嘅 office 邊爐 ! 大家裡應外合, 有組織同預謀, 早上兵分幾路喺香港各地搜集新鮮食材 ( 我仲唔知點解走到去西營盤咁遠買烏雞 😄 ). 當日下午食飽飽, 攞住盆油淋淋血紅色嘅麻辣湯底去 toilet 傾倒之際, 喺走廊撞正隔離單位剛剛出門嘅鬼婆, 嚇到佢眼都凸 😂😂😂

已經係十多年前嘅事, 雖然我哋呢班人現已各散東西, 難得感情依然非常要好, 時不時見面都會講番當年啲 on 9 騎呢嘢, 次次笑到喊.

一班老餅都可以型爆

有人提議不如整轉快閃上海 ( 因我哋曾經喺上海都做出不少駭人聽聞嘅嘢 ), 當然一呼百應啦 ! 三日兩夜玩得好開心, 一班認識差不多 20 年嘅人, 由同事變朋友唔簡單.

原本收到 order 有個任務, 要我去隊冧其中某人, 出發前講到眉飛色舞, 但到最後關頭, 我都係決定唔好搞嗰個人喇. 唔好啦......

2025年5月22日星期四

食出個冷感

查實 Le Petit Chef 呢壇嘢 https://lepetitchef.com/ 玩咗好耐, 而家, 終於 ! 殺到香港 Grand Hyatt.

全民北上消費, 香港餐廳拍烏蠅 / 喫晒蕉, 但小廚師 Le Petit Chef 就一枱難求, 晚晚翻枱兩輪都 fully book 生意好到不得了. 個人認為餐廳係上海 Ultraviolet https://uvbypp.cc/ 嘅 A 貨, 呵呵 ~ 不過喺香港, 用 1/3 價錢就可以獲得差無幾嘅享受, 抵到爛 😜

一坐低, 服務員分派每人一頂 "廚師帽" + 枱面戴住廚師帽嘅熊人公仔 + 碟上不斷穿梭游走嘅小廚師動畫 3D 投影, 成個組合搞到全場女性生物 ( 包括同枱朋友 ) high 爆, 喂哇鬼叫好 Q 嘈 🙉🙉🙉 !

我諗我係在場唯一一個冇嗌過嘅女性, 因為喺我視角只係見到成棚瘋婦, 個個戴住頂 "一見發財", 係又影唔係又影, 狂 selfie 😒 最驚悚, 佢哋不停又攬又錫啲已經俾人捽過 N 次, 捽到層毛都起晒蠟嘅熊仔 😲😲😲 !

眾人騷動之際, 驚覺原來自己係個唔能夠對可愛事物產生情感嘅怪胎.

不過咁, 小廚師啲嘢食 (法國菜) 都幾 ok, 成晚最欣賞個Bouillabaisse 海鮮湯同 Canard en papillote 紙包鴨腿, yum yum !

2025年5月15日星期四

蛇王 lunch

窗外景觀就係望住我住嗰度 😆

尋日好日, 偷得浮生, 去屋企附近工廈私房菜 https://www.facebook.com/winelok/ 食個靚 lunch.

好 I, 唔 social 嘅自來貓女

18/F 一出𨋢, 成條走廊已經充斥住超香嘅煮食味道, 餐廳地方非常骨子, open kitchen, 仲有個小酒窖添. 上年九月食晚飯覺得幾好, 今次第二次幫襯.

喺呢度食特別有親切感, 點解 ? 除咗近屋企, 仲因為廚師以前係做三行 ( 裝修 ), 咁我同佢話晒都算做半個行家囉 😛

隻 I 貓成餐飯係咁偷望我, 以為我睇唔到 😂

唔好以為裝修佬一定粗粗魯魯, 爆粗擔住口煙, 剩係識食蒸魚飯 😆

呢位廚師非一般, 外表不但斯文, 煮西餐仲有番兩度散手, 幾有 heart 㗎, 我覺得味道勝過香港某啲自稱法國藍帶嘅廚師好多.

私房菜, 午餐 $288 三度菜唔貴, 唔收加一不特止 BYO 仲要免開瓶. 我哋嗰日包場 ( 冇其他客 ), 點都要識做喺小酒窖 order 兩支酒, 慢慢劈支持吓.

我同 friend 一致認同個 [ 風乾火腿甜瓜沙律 ] surprisingly 地好食, 廚師自製 10 小辣香草 salad dressing 畫龍點睛, 提升成件事嘅層次. 哈蜜瓜刨到薄一薄, 單手就可以連埋塊風乾火腿一啖食, 爽 ! 學到嘢, 下次屋企宴客, 一於照抄 💪

我主菜係

[ 焦糖🍎黑毛豬扒 ], 肉肉鮮嫩多汁, 其實豬扒冇太重調味, 全賴焦糖 🍎 加埋淡淡黑醋帶出豬肉嘅鹹香.

識我嘅人, 都知我唔同生果黑醋做朋友 😄 但今次呢個組合, 又真係接受到, ok 喎.

2025年5月9日星期五

其實你哋屋企係咪冇鏡㗎 ?

工地窗外的美景 . 山頂纜車

尋日落地盤
, 聽到兩個工程人員對話, 內容係佢哋發現有幾個 "鑊氣" 位 --> 現場尺寸同客戶顧問公司 order 嘅訂製傢俬有出入, 組件嚟到實裝唔落.

其實仲夠時間, 比我一定會同顧問單聲, 叫佢聯絡廠商儘快修改尺寸. 點知, 工程佬竟然話唔會通知條顧問, 由得佢爆鑊, 等佢到時俾個客小爆. 唉 ~ 乜啲人咁㗎 ? 我知顧問同佢哋有牙齒印, 但都唔可以咁搞囉, 嘥料嘥錢嘥時間, 啲嘢要翻手做不特止, end up 咪又係要侷住同條顧問再對耐啲 ? 攬炒 😑 !