原來就係咁簡單

老 'app app', 兩個禮拜前先第一次踏足美國 😜, 一落機立即扁頭痛, 唔係機場風水唔好, 或者劈得太多, 而係聽到周圍啲人講嘢, 嗰啲美國 accent - 好煩.

打的去紐約市中心冇難度, 點知去到酒店, 下晝成 3 點間房都仲未 ready,  reception 話有房會用 email 通知.  吓, email...... 唔係打電話或者 send 短訊 ?!  真係第一次聽 😳   咁唯有四圍行吓, 等運到.  

完全掌握唔到紐約街道嘅 scale, 唔知行得快, 定其實唔係想像中咁大, 亂行, 行咗唔夠一粒鐘, 已經可以經過晒喺 midtown 原本諗住用半日完成嘅幾個景點.

同 friend 講, 咁快睇完唔掂喎, 佢話 : 車 ~ 去多次, 睇夜景咪得囉 !  哈, 又係喎, 點解而家會變到咁蠢.

出外靠朋友, 個 friend 真係唔話得, 一連 5 日早午晚三陪 (飲 - 食 - 玩 ).  全靠佢, 個行程先可以咁充實, 順暢, 最緊要地鐵 / 巴士任我行, 走少好多冤枉路.  仲跟據我嘅 wish list, 帶去當年喺巴黎時期想去影嘅 iconic locations 拍沙龍.
 

Flatiron

首先最想講呢個 ' 熨斗大廈 '  Flatiron.

唔知點解, 自從 6 歲, Flatiron 就喺夢中間歇出現, 但 background 永遠都係污天黑地打仗前夕, 希望夢境唔會成真.

Vapour on the streets

睇戲以為街頭蒸汽係拍戲搞氣氛, 原來係堅, 有實用價值.  好白痴走去聞, 唔識形容, 當然唔係香㗎啦, 但又未至於臭.  有樣好肯定, 聞完變蠢, 因為覺得返嚟後蠢咗.

Water Tower

紐約天台水塔周圍係, 但如果冇部長鏡, 真係好難 capture 到個 good shot.   啲水塔用木造, 幾世唔洗, 積落好多菌, 飲用嘅人最好自求多福.

Brooklyn Bridge

睇旅遊書, 話條橋要成粒鐘先行晒, no la !  連停低影幾次相 + 食風, 過橋時間係 18 分鐘, 不過條橋設計的確好靚, 非常 like 👍

Manhattan Bridge from Dumbo

< 秋天的童話 > 裡面嗰條 Manhattan Bridge.

等影呢張相真係把火 !

人山人海, 成條街企滿冒名而來嘅人, 唔明點解有人會企喺路中心傾偈, kiss, 擋住晒. 好難先喺啲人罅中 9 秒 9 影到呢張.

Manhattan in the rain

下雨天, 凍, 大風, 大霧 - 係 Manhattan 先可以咁型 😆

好想同番巴黎美國領事館 reject 我 visa application 嗰條八婆講, 我去 NYC 就係為咗影呢幾張相㗎咋, 完全冇遐想.

你估我會係留低做黑工, 跟住搵條美國佬嫁咗佢, 搏入籍, 賴死唔走嗰啲 ?  慳啲啦八婆 !

芥蘭不老傳說

同美國廿幾年恩怨, 終於要去紐約化解.  有 friend 認為我唔會鍾意, 話又貴又污糟, 所以出發前將期望 set 到 0, 旅行目的為探吓當地朋友算.

為求將 < 貼錢買難受 > 嘅風險減低, 事前出咗啲力做好 research, 務求一擊即中, 希望喺紐約順利做到想做嘅事, 去鍾意嘅地方.

為咗更投入, 仲好白痴咁重溫咗幾套喺 NYC 拍攝嘅殘片 :  秋天的童話, 這個殺手不太冷, 9 1/2 weeks, etc. 😂

橫掂都係, 對自己好啲, 用多年嚟辛苦儲落嘅 mileage 換咗套好抵嘅機票. 點解抵 ? 套票原價廿幾皮, 而家免費坐, 就算紐約真係唔好玩, 感覺上都有廿幾萬補償啦 😆

上到機, 一如所料, 啲客全部阿爺級, 好多年前 Sammy 同任賢齊嗰套 < 嫁個有錢人 > 喺頭等艙識後生靚仔, 焜人吧 !  真正高富帥, 坐晒私人飛機啦.

記得 N 年前, CX 竟然請我去頭等客坐談會, 因好奇出席, 去到先知出事.  席間幾位好明顯係頭等常客, 而我就係 CX 搞錯而出現嘅一條茂里, 格格不入......  既然去到, 咪聽吓人噏乜囉.

後來領悟咗兩件事 :

1. Wants are unlimited
2. 吹毛求疪 - 上得床來牽被冚

有外籍人士話 CX 唔掂, 因為幾次班機 full 咗淨係 upgrade 佢上 first class, 老婆冇份, 佢認為 upgrade 應該要 up 埋同行嘅人, 闔家嘅.

另一香港名媛, 投訴飛機餐啲菜唔翠綠 😒.  心諗 ...... 你係咪痴㗎 ?  條菜由煮好至上機侷咗咁多粒鐘, 變黃係正常喎.

結果多年後, 竟然喺飛十幾粒鐘嘅機上見到咁翠綠嘅芥蘭, 咬落仲好爽添, 唔知搞咗啲乜呢 ? 好驚呀 !

First 屎都唔代表一定好

人哋裝修咗成兩年, 上星期先有機會入 CX first class lounge 見識.  

唉, 做呢間把鬼公司, 出埋啲至至至 cheap 機票, 飛極都儲唔夠分升呢做高級會員.

入 lobby 嗰刻有啲期待, 點知唔夠兩秒就 feel 到唔對勁.

啲人幾乎唔講嘢個喎, 死氣沉沉, 個 lounge 靜到成間圖書館咁, 搞到我連行都唔敢咁大步, 費事嘈親人.

晨早 7 點幾, 冇理由蒲吧㗎......  去餐廳食嘢打底先. 

同另一個鬼佬客同時到達餐廳門口, 哈, 條 staff 眼尾都唔望我, 竟然淨係招呼鬼佬.  頂佢, 好叻咩, 自己入去搵位坐.

幾個後生仔 staff 車輪轉, 掛住 serve 周圍啲鬼, 完全冇人理我, 問攞餐牌一尾話等等, 見到鬼揖手就助跑式衝埋去, 烚熟狗頭 sir 前 sir 後, 擺明種族歧視.  

一齊入 lounge 嗰個都有嘢食喇, 我都仲喺度呆等.  終於, 有個個樣善良少少嘅中年職員發現我, 不過已經谷鬼氣, 食龍肉都冇味, 叫咗碗粥, 劈咗兩杯檳就走人.  

今次所謂 first class lounge 體驗, 非常差勁, 下次真係請都唔入, 寧願喺普通 lounge 同人迫, 起碼 self service, 唔駛睇人面口.

去完個 trip 返嚟, 同事問喺美國有冇比人歧視, 呵, 完全冇喎, 連入境嗰陣, 海關都係問咗 3 條簡單問題就放人.  我又唔係著得寒酸, 唔明點解喺香港反而會比香港人歧視囉.

指鹿為馬

兩個禮拜前公司喺曼谷搞亞洲區三日兩夜 2018 kick-off 大會, 去完返香港得番半條人命.

除咗夜晚嗰餐可以出外唞吓氣, 所有活動基本上都要與世隔絕, 喺酒店 ( 禁閉營 ) 裡面進行.  曼谷空氣污染, 天氣好熱 ?  呵, 完全感受唔到喎.  
  
公司成日話冇錢, cut headcount, 左扣右扣, 合併諗縮數, 加陣又勞師動眾, 花幾廿皮飛班人去泰國住酒店困獸鬥, 完全唔明係乜邏輯.

露營野火會, 返工扯火會.  會議第二日請咗個 coach 嚟同我哋洗腦, 猛講牌子有幾好, 又乜又七, 吹到阿媽都唔認得. 仲迫人分組討論 team building, 講出品牌 values ( 價值 ).

呢世人最憎人 hard sell 同 team building, 在場人士應該見到我關公上身, 9 秒 9 黑面 !  正當扯火之際, 坐旁邊條懵炳竟然唔識趣, 叫我 share 我嘅想法,  xy@#z ......  

😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡😡   

如果真係要 share, 我覺得品牌勁 out, 迂腐, 過氣, 老土, 脫節, 短視, 孤 9 寒, 朝令夕改, 行政混亂囉!   

End up 冇講, 因以上大部份都唔識英文點講, 但都超級唔客氣回應佢 : " 我所有評價都好 negative, 你最好唔好問 ".   佢當堂嚇窒收咗皮, 成日都唔敢再同我講嘢.

同場同事, 唔知係被催眠定係天生演技派, 個個變晒親生仔女, 成班人吹噓, 話大家係個大 family, 講到個品牌天上有地下無, 仲話最大嘅 value 係 LOVE 喎.   
嘔 !

搞完呢壇, 元氣大傷之外仲覺得好恐怖, 點解啲人可以將惡劣講到變咗優點嘅 ?!

經典

多做多錯, 少做少錯, 唔做唔錯.

當你密集地去做同一件事, 出錯嘅機會, 必定比正常超出好多倍.  今天早上, 犯咗個從來冇諗過會發生喺自己身上嘅錯.

驛馬生涯超過 20 年, 繼上年意大利漏低銀包喺飛機事件後, 今年再下一城, 嚟個老人痴呆加強版.

朝早要搭 08:55 機, 06:40 打的去機場, 諗住有成兩個鐘走盞, 實冇死啦, 仲 check 班機起飛閘口起飛近邊個 lounge, 可以走去 heah 吓.  

點知, 行行吓過完成條青馬橋, 就嚟入收費站之際, 突然醒起冇帶 passport 😱😱😱😱😱😱😱😱😱😱😱😱😱😱😱😱😱😱😱😱😱😱😱😱😱😱😱😱😱😱😱😱



當時情景, 簡直同發惡夢嘅情節完全一樣 !  好驚, 如果 miss 咗呢班機, 要等成 12 個鐘後先有下一班, 成個 schedule 拖垮晒, 大檸樂.

司機睇怕身經百戰, 年中遇着唔少我呢類懵炳, 佢不慌不忙, 打個大回旋入迪士尼調頭.  當時睇錶已經 07:05, 班機 08:55 起飛 ( 即 08:10 停止 check-in ), 代表只得一粒鐘時間來回屋企同機場.  咁, 仲搏唔搏呢 ?

搏 !

呢個司機, 竟然可以 20 分鐘內, 喺 07:25 車到我返屋企.  狂奔上樓攞 passport, 9 秒 9 完成, 點知架𨋢唔生性層層停, 落番去樓下已經 07:30.  

當刻有啲打定輸數, 因為必經嘅大埔公路一定好塞車, 點知司機好有 heart, 塞出大埔公路後, 立即同我 ' dum ' 盡, 80km 飛 110 /120km, 最後 08:05 到達機場 !!!

好多謝佢, 因平時由屋企去機場, 至少要 40 分鐘. 

趕路途中, 見有私家車左穿右插, 仲狠過我哋. 平時揸車遇見呢啲, 會諗 : " 哇, 趕住去死咩 ...  ", 但而家我相信, 佢哋應該真係好趕好趕時間.

有時打的去機場, 上車嗰陣司機會提醒, 問有冇帶齊證件 passport, 覺得佢哋多餘嘅 ...  家陣知道呢啲先係寶.