一分鐘的朋友

份工原本好地地, 唔知點解自從六月尾就突然勁多嘢做, 連日激戰, 真係做到趴喺度 !  堅 chur 咗足足兩個幾星期, 最近米已成炊, 得就得, 唔得就七.  

今朝, 終於有機會休息吓約朋友出嚟飲早茶, 地點係 < 阿飛正傳 > 阿飛 Leslie 同 Maggie Cheung 蘇麗珍 " 一分鐘的朋友 ", 扮南華會個鐘嘅真身所在地 : 舊中銀停車場, 樓上嘅中國會.

中國會多數晚黑去, 日光白白幫襯, 真係第一次 😆   

終於有機會日頭一窺全豹, 原來餐廳情懷相當懷舊, 如果唔係望出窗外見到隻 Zaha Hadid 飛機杯, 應該會幻覺自己喺上海.

大鄉里, 唔知嗰度除咗點心, 原來仲 serve 西式早餐, 不過我哋當然堅持吃中式啦.

得人驚, " 盲盒 " 點心紙冇 show 價錢嘅, 會所地方問人收幾錢又好似有啲 cheap, 斷估唔駛兩百蚊碟掛...... ( 下面開估 ).

最後叫咗 4 樣嘢 : 蝦餃 | 牛肉腸粉 | 蘿蔔糕 | 皮蛋瘦肉粥 - 但識我嘅都知我唔食嘢, 所以我食完半碗粥同少少點心已經飽晒, 辛苦個 friend 埋尾清枱 😂  

全部點心味道都唔錯, 唯一遺憾, 就係嗰度上午冇酒飲 😂 同埋我叫咗碟潮州辣椒油, 原來要收 28 蚊碟 😑

結論 : 整體經驗唔錯, 非常 ok, 可以再來. 

蔡 san & 三文魚生 friends

成日比人笑我唔食嘢, 無可否認呢個係事實, 其實超鍾意食, 但怕肥, 因為我係食少少就勁肥嗰隻底 !  

7 街食, 望住身邊嗰啲每次瘋狂食食食, 食多過我 N 倍但都仲保持到小蠻腰嘅中女, 真係羨慕又妒忌.  同人講笑, 如果食嘢唔肥, 我一定 24 / 7 不停食, 因為食材俾人類適當發揮嗰陣, 真係可以好 x 好味 ! 

易肥體質唔應該再浪費 Quota : 因為食乜都只可以蜻蜓點水, 要不停地珍惜, 久而久之, 引爆咗我對食物質素極高要求小宇宙 !  

人肉 AI : 自己八卦, 再加上當年做品牌時期同班 PR | Eventing 高人們搭上, 所以世上 ( 發達國家 ) 邊度有超靚超好食嘅地方都知, 朋友只要講清楚 budget, 要求同人數, 我都一定可以 pair 到個 95% 或以上適合 & 滿意嘅 venue, 勁過 AI ( 講笑啫...... 有乜可能吖 😂 ).

蔡 san : 多年前, 冇意中發現蔡瀾個花花世界網頁 https://www.chualamscolorfulworld.com/ 裡面除咗有佢寫嘅 blog https://bobostory.wordpress.com/ , 仲有好多飲食見聞, 雖然未必認同所有觀點, 但時不時參考, 都會有驚喜, 多次因為跟佢推介而搵到真正好嘢食.

蔡瀾堅持每日一篇, 有時寫唔切仲會喺 FB 同網民交代. 但自從 2024 起, 就愈寫愈少, 跟住仲突然 switch channel 轉寫全英文.......

三文魚生 : 港人必備, 香港食魚生一定會有三文魚, 我由細到大都食唔少, 不過幾年前睇到蔡 san 一篇文章, 話佢從來唔食三文魚生, 因為當年喺日本留學時期, 啲日本人話佢知三文魚生有超多寄生蟲, 日本人自己唔會食 !

唔理真定假 ( 蟲係我嘅世界第一驚 ! 仲驚過冇錢 | 鬼 | 冇酒飲 ), 就喺當刻, 我就完全冇再掂任何三文魚生. 每次去日本, 都會喺啲食肄餐廳觀察吓, 噢 ~ 原來日本人, 真係唔食㗎.

[學] 牌神棍

近期公司接咗單喺海港城嘅裝修工程. 

某日, 個天龍人客人 send 咗張物體俾我, 話係佢哋國內大師對新店嘅風水建議, 想麻煩我開舖前幫手買啲風水擺設. 一睇張 plan 就知流 : "雙龍護主", "珍珠鍊", "福納貔貅", 乜春嚟㗎 ?!   

CLS, 一於耍吓佢先 😆. 

我扮嘢話買嘢冇問題, 但要現場 set up, 唔識個喎.  問天龍人大師幾時會落嚟香港新店擺陣, 佢答 : [ 應該不會了, 因為師傅沒收錢 ].  哈哈哈, 一分錢一分貨, 我懂了......

完全唔駛睇坐向同量度方位, 好佩服大師可以隔空整合個風水陣 😂.  又或者佢係用 [ 奇門遁甲 ] 啦, 但擺嘢嘅 "日期 + 時辰 " 就應該更加有嚴格要求, 講究起上嚟, 連去擺物件嗰個人嘅 " 生肖 " 同擺陣嗰個 "日期 + 時辰 " 有冇沖剋, 都要計埋 ! 

咁 casual, 壇嘢堅極有限.  不過又真係吹佢唔漲, 而家就算擺到明流, 竟然都會有人 buy, 所以我要調節吓自己心態, 唔好踢爆人 😛, 反而要去偷吓師, 向神棍之路, 再邁進一步. 

晚食過一戙

5月 21日起, 一連 19 天晚晚七街食, 唔止飽, 仲好攰, 因為馬拉松連環躝街都需要有番咁上下體能. 

今個禮拜頭唞咗兩晚, 星期三四又食過. 

中環安蘭街呢間日系割烹料理 Ryota Kappou Modern https://www.ryota.hk/ 其實開咗七年, 出奇地一次都冇幫襯過.  

啲 friend 痴線唔知做乜咁準時, 我早到 5 分鐘都已經係最遲嗰個 😆😆😆

場地黑𠵼𠵼環境相當有格調, 接過 waitress 餐牌, 哇 9 道菜鮑參翅肚樣樣齊, 同去飲差唔多 😂

香港市道差, 但星期四嗰晚餐廳坐無虛席 full house, 可惜地方細, 人均 $3000 計, 就算坐滿成晚頂多做到 6-7 皮.

出嚟之前公事不順, 心情欠佳, 未能專心品嚐食物及欣賞廚師們喺 open kitchen 創作料理之樂趣. 一日後回魂, 先醒覺起有 4 道菜其實特別好食 :

1. 鮎香魚春捲 RIVER AYU SEETFISH SPRING ROLL 😋😋😋 - 炸到脆卜卜春卷皮包住鮮嫩多汁白色魚肉, 日版 fish n' chips. 

2. 魚翅鮑魚湯 HOKKAIDO ABALONE SHARK FIN MINI HOTPOT 😋😋 - 因為本身好鍾意食翅, 未打先贏, 日式高湯帶出非常豐富的口味, 可惜鮑魚 😑 我麻麻, 所以冇俾滿分.

3. 魚生拼盤 SEASONAL SASHIMI  😋😋😋 - 擺碟勁靚, 每片魚生配搭不同調味, 啖啖都係驚喜.

4. 毛蟹素麺 HAIRY CRAB SOMEN WATERSHIELD 😋😋😋😋 - 當晚食物總冠軍, 成件事可以用 '清新芳香' 呢四個字形容, 兩片薄薄嘅青檸簡直畫龍點睛.

JAPANESE WHITE PEACH SCALLOP KYOTO TOFU CREAM CAVIAR | RIVER AYU SWEETFISH SPRING ROLL 😋😋😋 | HOKKAIDO ABALONE SHARK FIN MINI HOTPOT 😋😋 | COLD EGG CUSTARD

SEASONAL SASHIMI 😋😋😋 | WAGYU & UNI SQUID SUSHI | SIMMERED KINKI SMOKED EGGPLANT

GRILLED OMI WAGYU WAFU SAUCE

HAIRY CRAB SOMEN WATERSHIELD 😋😋😋😋

MELON CREAM SODA

其實個燒和牛都好香,不過我只係食咗一塊,幫手食埋我份嗰個人仲一路食一路潤我 😆, 話多年前問有乜嘢嘢食, 對我嚟講係一定唔可以喺呢個世界消失 ? 

佢笑笑口話我當年答佢 : 牛肉 ! 因為牛好好食, 真係好鍾意食牛 ! 估唔到, 今天嘅我竟然少食.

諗諗吓, 又好似真係有咁講過喎 😜 哈, 條友又會咁好記性嘅 ?! 

不留港消費 L

啲人成日話自己唔飲得, 其實唔係㗎. 除非真係唔鍾意酒嘅味道又或者對酒精過敏, 飲酒, 係有得學. 酒量, 係可以訓練㗎. 

當年考酒牌結識到志同道合嘅酒友, 自從 2011 年尾大家定期舉行酒局 😆.

葡京風水陣實在太明顯

成班酒鬼喺香港飲咗十九幾年, 有 free corkage 或特式嘅地方都已經去勻, 真係有啲悶. 

Entrance to Wine Cellar

最近其中一個酒友因公務同澳門葡京入面葡國餐廳侍酒師 (sommelier) 搭上咗, 話可以特別安排我哋去參觀餐廳嘅酒窖 = 全亞洲最大酒窖.  親身欣賞已故賭王 Stanley Ho 嘅超級收藏, 呢啲機會唔係時時有, 諗都冇諗𦧲飯應. 

可能日頭去, 沙圈冇乜雞

爆房 table setting

尋日, 我哋一行 7 人衝出香港過大海, 12:30 先參觀酒窖, 跟住食 lunch 大劈 💪💪💪 

可惜葡國餐廳啱啱裝修緊 ( 都市傳說 : 葡京總有一瓣裝修緊, 因 [裝修] 同 [庄收] 同音, 用意好明顯啦 😉 ), 我哋被安排爆房食日本菜, 好彩食物 / 招呼都唔錯, 眾人非常收貨.

個場真係好 Q 大 . 比例上我哋都係咁細粒㗎 ja

酒窖喺葡京雀籠頂個位, 據聞現時收藏超過 50 萬支酒, 大部份仲係法國一級莊, 如果當每支 HK$1,000 ( 哈哈其實冇可能咁平 ), 保守估計市值五億港幣.  何況, 多數酒其實支支過萬, 超 rare 嘅仲三四五六十萬起跳 + 最貴嗰啲球幾嘢 --> 咁即係五億 x 10+倍啦.  

貧窮限制想像 😂  只能講句 : 何生, 你真係好 L 有錢呀 ! 

問酒窖啲人賭王生前鍾意飲乜酒.

噢, 原來係 : 法國 Chateau Palmer 1962 同 Riesling ( 德國 / 奧地利白酒 ).

魔都飲客

原來上海英租界有條咁靚嘅街

暴食 weekend 過後要留步上海兩日見客, 之前同客戶有兩面之緣, 2023 年見過工仲差啲去咗佢度做添, 不過最後冇, 因為佢喺 process 當中竟然被炒, 所以而家上咗上海.  

餐廳入口比較難搵

大家都係飲酒狂, 難得相遇, 唔劈唔係人. 選址交俾客戶, 佢聽到有人請果然老實不客氣, 揀咗 Otto 1/2 https://www.ottoemezzobombana.com/branch/shanghai/, 仲叫廚師留定個窗口靚位.

上海 Otto 1/2 其實一直想試, 不過個場好似有啲拘謹所以冇, 今次公事接客條件符合, 太正了 👍

窗外風景

客戶係意大利人, 點菜重任交俾佢最適合不過, 而佢都好俾面叫我揀酒, 好彩對意大利酒有啲認識, 冇比餐廳個 wine list 嚇窒 😏

個客自己一個𡁻咗 3 個大包 😮

見肥仔推住架麵包車過嚟, 滴咗滴汗, 因為我少食包嘅, 好彩客戶係麵包怪食完一個又一個.

tunno ⭐⭐⭐ & coppa

開胃菜除咗 "豬後頸肉" (Coppa), 仲有個 "魚子醬吞拿魚生" (Tonno), 哇呢個真係極品, 柑橘汁料調味, 魚腩肉柔軟肥美, 連客戶都一致認同, 係人生食過最好味嘅 ⭐⭐⭐ ! 呢個吞拿魚生足以令我再去幫襯, 下次我會齋叫, 然後加支靚香檳, 慢慢歎.

食完開胃菜我已經收皮, 飽咗 9 成 😆 唯有用意志去食埋嚟緊嘅兩個主菜, 牛扒, 甜品.

raviolo 😍

"鴨肉意大利清湯雲吞" (Raviolo), 造型精緻 😍 睇得又打得, 呢個雲吞湯係當晚另一驚喜 ! 我發現原來喺大陸, 無論中定西, 所有熬嘅清湯都會非常好飲.

蒸螯蝦 . 得個樣 😑

另一道原本相當有祈望嘅主菜 "沙葱清蒸螯蝦" (Astice), 就唔係咁識欣賞, 質感奇怪, 葱味太濃. 今次唔係我 order, 不過以後睇餐牌要留神, 一切沙蔥物體, 要 skip !

終於輪到主角 "碳烤和牛肉眼" (Costata) 出場, 好耐冇食牛, 喺客戶堅持下試食咗塊, 碳烤肉香, 配埋濃牛肉汁又真係幾好味. 

碳烤和牛肉眼

個客見我哋飽到差不多獲利回吐, 自己喫晒成塊扒, 食咁多嘢唔怪得可以生得咁高大.

見佢個樣好似未飽, 一於唔好比佢停, 叫埋甜品再加烈酒, 大家同歸於盡 😂

米芝連二星, 3 個人咁樣喪飲/食法, 埋單竟然唔駛 HKD9,000. 喺香港絕對不可能呢.

追憶逝水年華

N 年前返娘家, 食食吓飯老豆同我講, 話香港啲人真係不知所謂, 返工竟然可以喺 office 打邊爐, 好離譜 ! 問佢點知, 佢話睇電視訪問 headhunter 講嘅.  

當年真實圖片 1 . 個爐係我私伙 😂

哈 ~~ 條 HH 消息又幾靈通喎, 同老豆講, 做 XX 嗰陣我都有喺 office 打邊爐喎 😆  就喺當刻, 我哋 dead air 咗......

當年真實圖片 2 

當年趁老闆每次出 trip, 我哋都會安排好多活動, 例如揸車去中環 | 赤柱 | 山頂 | 大浪灣 | 雙魚河食 lunch.  

講到最狼死, 一定係經典嘅 office 邊爐 ! 大家裡應外合, 有組織同預謀, 早上兵分幾路喺香港各地搜集新鮮食材 ( 我仲唔知點解走到去西營盤咁遠買烏雞 😄 ). 當日下午食飽飽, 攞住盆油淋淋血紅色嘅麻辣湯底去 toilet 傾倒之際, 喺走廊撞正隔離單位剛剛出門嘅鬼婆, 嚇到佢眼都凸 😂😂😂 

已經係十多年前嘅事, 雖然我哋呢班人現已各散東西, 難得感情依然非常要好, 時不時見面都會講番當年啲 on 9 騎呢嘢, 次次笑到喊.

一班老餅都可以型爆

有人提議不如整轉快閃上海 ( 因我哋曾經喺上海都做出不少駭人聽聞嘅嘢 ), 當然一呼百應啦 !  三日兩夜玩得好開心, 一班認識差不多 20 年嘅人, 由同事變朋友唔簡單.

原本收到 order 有個任務, 要我去隊冧其中某人, 出發前講到眉飛色舞, 但到最後關頭, 我都係決定唔好搞嗰個人喇. 唔好啦......