隱世餐廳

So "lo-lan-tic"

白色小屋

早幾個月, 無意中睇到個記念陳百強嘅特輯. 

其中一個 episode 私房菜飯局, 所有菜色都以 Danny 歌曲命名, 做得幾靚, 加上窗外大橋美景, 決心摷個地方出嚟. 

原來廚師大有來頭 (廚藝 + 背景), 汀九橋下, 沙灘上白色小屋, 咁 romantic 嘅格局, 香港實在冇乜.  地點相當隔涉, 但去過一次之後, 下次就會好易找到. 

同埋大家一致通過呢個係偷情勝地 😂😂😂, 話下次諗住去呢度幽會嘅話, 最好喺 group chat 單聲, 費事撞見尷尬. 

菜單

有人請唔客氣, pre-order 咗至多嘢食嘅 tasting menu, 其實都係千鬆啲一位, 價錢合理. 

廚師喺元朗有自己農場, 生果蔬菜都係自家種新鮮運到, 基本上所有菜色都喺 open kitchen 做, 全無做假, 整個過程任你睇, 最 like 就係食得出完全冇落我最怕嘅味精 / 芡汁.

Chef Margaret Xu

用怪 apps 影到啲食物變晒螢光色 😅

招牌菜 < 民窰黃土雞 > 果然不負所望, 皮脆肉嫩加埋個油爆老薑 dip, so surprisingly matching !  超級一流, 令人再番回味.  

但最估唔到, 就係 < 紅艷卡門 >, 即番茄蛋炒蟹 + 火焰 whiskey, 啲汁撈埋煲仔飯實在冇得輸, 我哋食完一碗又一碗. 

我唔吃嘅甜品 . 但聽聞好好食

除此之外, 極度欣賞用日本紫蘿蔔做嘅蘿蔔糕, 海膽紅菜頭豆腐花, 同墨汁墨魚腸. 

最最最最唔好意思, 係我哋班人講嘢粗聲粗氣, 太嘈 !  嘈親隔離枱對 couple, 好彩佢哋冇投訴.

食飽同廚師吹咗陣, 臨走抬頭一望, my god...... 剩係呢個汀九夜景, 已經值回票價.