Florence 奇幻天氣

Happy Year of PIG

今日大年初一, 祝大家身體健康, 🐖 籠入水, 發過 🐷

早兩日剛完成意大利之旅, 半公半私, 行程有啲趕, 如果唔係黐住農曆年, 一定留耐啲.  公幹主要目的係去意大利總部訓練新馬 (同事), 而我嘅身份, 基本上同馬伕一樣, 要 lead 住隻馬去唔同嘅倉, 見唔同嘅人, 唔得比佢四圍亂跑 😆

新同事昂藏六呎, 95kg 肥大身型力水夠, 全程爭住幫我攞行李, 最初有啲唔好意思, 但佢極力堅持, 話呢世人幫女人 (老婆同個女) 攞慣行李.  咁就好喇, shopping 終於唔駛留力, 可以儘情買多啲 😂😂 

到埗當日天色唔錯

同樣地, 呢個 trip, 我亦安排咗非一般嘅驚喜體驗 / 際遇比佢.  而且個天都益我哋, 喺 Florence 停留嘅幾天, 除咗燦爛雲彩, 仲見盡風雷雨雪.

到埗第一晚 (26 Jan), 見到呢個血紅嘅河畔日落倒影, 個心真係跳咗出嚟, 影像全無加工, 真實顏色比圖片更 intense 一倍, 好 L 浪漫, 可惜身旁只有一隻超磅肥馬 😜

血紅日落

第日 ( 27 Jan ) 天陰陰, 點咗隻馬去博物館, 自己就喺酒店 heah 咗成日, 跟住先出街食飯.

冰雹

食食吓澎澎聲, 望出窗, 出面落好大雨, 心諗仆街喇冇帶遮 ......   隻馬話唔緊要, 開多支再劈等雨停 😅  

吃完行出街發現頭先原來唔係落雨, 係落雹 !

啲雹有 5 ~ 10 mm 大, 因天氣冷冇溶, 攞上手凍冰冰好過癮.  對上見到落雹, 已經係 1996 年 lu ......  

28 Jan : 喺 office 做嘢壓力大, 放工飲到爆, 點知因為 jet-lag 唔生性, 第朝 ( 29 Jan )  4 點幾已經醒晒.  

" 眼光光等天光 " 就是這樣.  

好難先等到七點, 望出窗, 個天竟然一片深紫藍併 shocking red, 感覺震撼, 有啲天花亂墜, 幾廿歲人真係未見過咁靚嘅日出嘛 😍

血紅日出

30 Jan : 終於要離開 Florence 喇, 喺 farewell dinner 同意大利同事講好想見到雪, 佢哋話 Florence 落雪機會好微.  

呵, 點知第朝 9 點幾 ( 31 Jan ) 執行李時𥄫吓外面, 白朦朦一片飄雪, 仲要係大大片, 狂喜 !  忍唔住九秒九衝咗落街, 一路叫一路跳, 他媽的雪, 我嚟喇 !

Florence in snow