祈福都要鬥快

長沙海灘

前個禮拜中 🐀 ( 新老板 ) 走入我房, 叫我同部門同事講唔可以再 WFH.   呵, 真搞笑, 政府 銀行同各大品牌個個 home office , 我哋香港 office 就只行 flexi hours, 都唔知邊日有 WFH 過 ?   仲口出狂言, 話疫情已經 stabilized,  真係不知所謂 !  問佢點樣 [ 穩定 ] 法, 佢話而家日日有人死, 有新案例, 嚟緊都會日日如是, 所以要 live with the new norm 喎.   

正一痴 9 線 😡   比着以前後生, 一定同佢死過句句頂到佢行, 不過而家心態唔同啦, 打份工啫, 費事動真氣同呢啲妖人爭拗, 有損精氣神.   
話時話, 憑 🐀 呢啲 " 高見" 就知佢唔易搞, 真係要步步為營好好保護自己. 今年屬雞破太歲, 事不宜遲, 儘快去廟祈福先.

侯王古廟 ( 前面左邊好多旗嗰度 )

疫情唔只嚇人, 仲悶親好多人.  天氣好, 市區人個個連群結隊大逃亡出去呼吸新鮮空氣, 搞到大嶼山人山人海.  

包括我哋去開嘅大澳侯王古廟, 平時鬼影冇隻, 今次竟然見到成村人操兵入去嘅奇景, 我哋散開隊形, 加速快步穿越人群, 捷足先登.  

候王古廟內裝. 其實色彩運用非常靚

拜太歲程序開始之際, 廿幾個口罩人魚貫入廟, 人聲鼎沸, 好彩早到一步, 如果跟嗰班人尾, 等兩個鐘都未必輪到我哋.  諗都冇諗過, 而家香港除咗搶米搶廁紙, 連拜神都要搶要鬥快 😂

雖然犯太歲, 睇落屬羊同雞都還可以