出嚟唞番吓

家陣邊度都唔駛飛, 驛馬命暫停, 留港歇息吓, 其實還可以.

不過日日喺 office 對住隻頭尖額窄, 吓吓同你算到盡嘅 🐀, 真係唔係路 !  唔係針對老鼠呢種動物, 而係條友真係 physically 好臭, 佢間房唔止亂七八糟, 仲成陣濃烈老人除.  趁佢行開叫同事入去聞吓, 睇吓我有冇聞錯, 結果比人小爆, 話我靠害.

咁 X 亂 . 唔知仲以為有賊入屋添 !

打咗成 30 年工都未見過有老闆會咁得閒, 冇人約, 冇會開, 唔食 lunch, 日日朝 7 晚 10 一條友坐喺房, 但又唔覺佢做到啲乜出嚟喎, 可能好似 friend 話齋, 呢喺度諗橋, 爆陰毒嚟冼自己啲 staff 啦.

險境不宜久留, 不過 🐀 近期𥄫得好緊, 所以一星期 5 日我都有返工, 查實呢排公司邊有嘢做吖, 我份人又猴擒, 完全唔識拖長, 用 8 粒鐘去做原本 1 個鐘就做得完嘅嘢囉.   

全日踎喺 office 真係好 Q 悶, 唯有彈性出行, 約人 late lunch 或者下晝 3 4 點喺出面開會, 之後乘機鬆人.

雞油但又一啲都唔覺得肥囉

上星期二去 [ 大班樓 ] 午飯, 兩個禮拜前訂到, 比着以前 ? 兩個月就差唔多.  以佢哋食物質素 set lunch 唔貴, 我哋加錢 upgrade 叫埋 [ 雞油花雕蒜花蟹陳村粉 ], 好食到震.  咁好味自然會飲吓香檳, 2:45pm 飲到第二支 1/3, 店員話 3 點要落場, 咁點呀 ?!

落場後的大班樓

突然記起 [ 九如坊 ] 有個公園仔, 打包支檳過去, 整兩個外賣膠兜劈埋佢 😆    就咁, 我哋同多隻鴿子 + 旁邊兩位阿伯, 喺樹下各自修行.  估唔到喺棋盤上飲香檳, 都市浪漫, 別有一番風味.

鄰枱阿伯