唔知係咪返工對得條賤 🐀 多, 整整吓搞到連自己都衰格埋. 前晚喺尖沙咀食 omakase ( 廚師發板 ), 明明平時好鍾意食刺身, 唔知點解突然鬧情緒, 唔想食. 廚師施展渾身解數 sell 最貴嘅 menu, 諗住曬靚嘢引我哋幫襯. 真係好犀利, 佢噏嗰頭四樣, 竟然四連環全中 ! 排名不分先後, 全部我都唔食 : 鮑魚, 海膽, 扇貝, 生蠔.
廚師話可以換成 : 油甘魚, 青花魚 同 北寄貝. 哇 ~ 連單 T 都中埋 ! 人生最怕貝殼類刺身或啲銀色皮連住紅色邊嘅魚, 尤其厚切做法, 真係腥到震. 再下一城都比佢噏中, 我 hi 住面講 : " 唔駛換, 麻煩呢 7 樣嘢全部都唔駛比我 ", 同行男士見勢色唔對, 打完場話我唔食佢哋食.
擾攘一輪終於上菜, 班 friend 唔知係咪過度活躍, 乜鬼都 cheers, 食條毛豆又 cheers, 食粒蘿蔔又 cheers, 兩塊魚生 cheers 成 4 次, 上到第 5 碟菜都仲係不停咁 cheers, 好煩 ! 終於忍唔住發飇, 問做乜要 cheers 咁多次 ? 眾人被我呢一問殺過措手不及, 當場收皮. 係吖嘛, 重要嘅嘢重複 3 次就夠啦, 駛乜成晚 cheers 啫 !魚生壽司食過飽, 終於有熱食, 吃和牛嗰陣同枱女士好嘈, 因為已經飲大咗, 聲浪大動作大, 高潮反白眼聲線高 8 度發出 " 唔 ~~ 唔 ~~ 啲和牛啊 ~~ 唔 ~~ 唔 ~~ 好食啊 ~~ 好食啊 ~~ 真係好好食啊 ~~ " 嘅呻吟. 有冇咁好味呀 ? 我覺得和牛汁料太多, 有啲膩.
魚湯仲好笑, 話由下晝 3 點開始餚, 餚足六粒鐘, 啊, 唔怪得啲魚肉咁韌, 完全咬唔開啦, 不過啖湯又真係好鮮甜嘅.
Omakase 進入尾聲, 廚師請吃手工甜品同日本蜜瓜 ( 原本個餐係唔包嘅 ), 我麻煩佢又可以比少份. 說罷, 發現廚師雙眼發光, 因為裡面嘅熊熊烈火, 已經喺爆發邊緣 ! 做廚師發板遇到我呢類 hi 客, 會死好多細胞, 係災難.食過呢餐, 覺得自己唔係咁適合本地 omakase 風格, 可能要討好港人, 魚生比例太多. 好似呢餐16 樣嘢只得兩碟熟食, 連我咁鍾意食生嘢都頂唔順.
沒有留言:
發佈留言