好食唔抹咀

Chefs at work

晚黑食肆 6 點關門, 谷埋啲用嚟夜夜笙歌嘅 budget 喺午市用, 今日試新地方, 食豪佢.

技術上唔算試新嘢, 皆因廚師西日 ( Spain x Japan ) 烹調風格特別, 之前已經幫襯過 N 次佢喺海港城間納米舖, 可惜自從攞咗米芝蓮 1 星就成日爆, 好鬼難 book.  而家廚師被飲食集團挖角, 連根拔起另起爐灶 pair 埋副廚品酒師 ( 暨經理 ), 齊齊過檔兼過海, 喺中環鏞記條街插旗. 

有後台果然唔同, 新餐廳設計相當 cozy, 揼本之作, 搣甩海港城舖陣日本除.  雖然食材唔算山珍海味, 但最平 lunch set 唔計酒水連加 10% $588, 咁去到呢種地方唔開支酒又會勁樣衰, 所以 end up 閒閒哋每人至少千幾銀.  不過我窮啫, 有大把嘅, 大有人在, 間餐廳 full house 囉, 啲客個個唔駛 do 咁款, 好似得番我同班伙記仲要捱世界, 打工.

今日 occasion 補祝同事生日, 我老點佢去咗第二條街, 搞到佢遲到.  同接待講朋友係大肚婆, 麻煩安排容易出入嘅坐位, 餐廳服務細心, 轉頭已經有人擺咗個 cushion 喺櫈上, 讚 👍  

番茄沙律

Order 最平 lunch set, 冇留心睇 menu, 原來頭盤係我至愛嘅 [ 番茄沙律 ], 滴汗......  不過撈埋 3 色醬 ( 燈籠果, 芒果同 burrata 芝士 ) 再加粒貌似好腥嘅魚, 意想不到地清新芳香, 好味 !  

千年橄欖油

跟住為咗 present 支 [ 千年橄欖油 ] 抬個架過嚟擺陣, 相熟經理話橄欖從千年老樹採摘然後提煉出油來.  嘩 ~ 你條友, 倒咁多比我哋, 老闆得罪你啦.  同事用麵包點咗啖, 然後好緊張咁叫我快啲試, 噢 my 吉 ~~ 從未食過咁甘甜嘅橄欖油囉, 咩牌子嚟㗎 ?

杏仁葡萄甜蝦蟶子湯

緊接落嚟嘅 [ 杏仁葡萄甜蝦蟶子湯 ], 係 2020 年對我最有啟發性嘅一道菜, 唔好比成幅畫咁靚嘅圖片呃到, 碗湯其實只得 3 啖, 呢鑊真係堅唔識寫, 點先形容到奇怪反差但又好和諧嘅味道呢 ? 

鵪鶉

好, 跟住嚟嘅 [ 半生熟鵪鶉 ], 係我等生食愛好者激愛, 配日本豉油車厘子汁, 唔知要用幾多個 L 先可以表達到有幾 L 咁好味.  怕生嘅人, 可以選擇 menu 上 optional 嘅魚, 全熟, 唔驚.

湯飯

哈哈終於輪到 my all time favourite [ 西班牙辣肉腸鮑魚湯飯 ], 呢 3 樣材料拆開我唔食 : 至怕湯飯, 鮑魚 no laa, 西班牙辣肉腸食完口會嚡, 係呢個廚師先可以令我開金口 😂  

壓軸甜品叫經理可以 skip 我嗰份, 經理堅持個甜品 [ 日本威士忌雪糕配焦糖 ] 唔甜, 玩嘢咩. 既然佢咁堅定, 試吓啦, 結果又真係非常得, 我食晒囉 😅

食飽, 懶到出汁咀都唔抹唇膏唔搽帶個口罩就走人, 搞咁多嚟做乜吔 ?  帶咗口罩都冇人睇到.  返到屋企口乾乾唔覺意 lam 吓個咀, 殘餘美味, yum !