投訴有門

樣衰囉 !

得到特別行政區政府大力支持, "全力推進新基建, 融合新要素, 激發新動能, 助力提升香港國際信息樞紐地位, 支撐粵港澳大灣區數字經濟蓬勃發展" (新聞稿原文. 我邊有咁好文彩).  

X 移動用 60 幾億投咗屋企對落, 塊貴絕全港嘅工業地皮, 起座自稱綠色低碳數據中心.

2021 年開始大興土木, 橫跨足足 5 年嘅動土剎, 終於忍到 2025 年十二月, 工程埋尾 😠. 以為有好日子過, 點知原來係惡夢另一開端 😓😓

 投訴前 . 屋苑幾棟樓比佢打到發晒光 (攝於 4am)

座 PK 數據中心天台啲機組晚晚燈火通明, 啲強光𥋇眼𥋇到一個點, 冇誇張, 喺屋入面真係唔駛開燈到睇到路. 諗住啱啱完工啲人試燈, 點知唔係喎, 成個幾禮拜晚晚開通宵 😡😡😡  

環保的風彩 : 嚴重光害不特止, 天台啲巨型風機, 冷卻塔同柴油發電機日間運行嘈到飛起, 啲臭氣熱氣噴晒出嚟, 搞到連想打開窗唞啖氣都唔得, 仲話自己 "實現全生命周期 + AI 綠色節能, 材料, 節水, 能源及大氣保護, 智慧園區, 空間管理及空氣保護六大維度開創綠色「低碳」新生態" (新聞稿原文. CLS 唔知噏乜春), 全部 9 吹 !

住新界都係鍾意靜同空氣清新啫, 估唔到而家比個綠色低碳數據中心搞成咁, 超嬲, 呢吓唔出手都唔係人 ! 

真係好想好似拍電影咁攞支迫擊砲一嘢轟過去, 但現實係冇可能, 所以今次唯有喺 1823 投訴, 搵政府部門去搞番自己搞出嚟嘅屎.

講起 1823 我絕對係熟客 😆  啲人成日話 1823 反應慢效率低, 唔係喎, 幾次投訴完翌日已經收到電話, 今次都唔例外, 跟住仲時不時有 follow-up calls 詳細交代進展添. 職員話收到好多對數據中心天台機組嘅投訴, 但因聲音仲未達到環保處法定嘅 (住宅區) 噪音標準, 佢哋好難執法. 而光污染喺香港就更加冇王管, 所以只可以勸喻中心作自願性質嘅改善. 

最搞笑係職員仲爆料, 數據中心某負責人答覆環保處, 話 "唔知" 自己天台啲燈原來晚晚都開行晒. 一句 "唔知" 就想甩身, 真厚顏 😂.  你個乜春綠色節能 AI 呢, 死咗去邊 ?! 我當然唔會咁容易放過佢, 

投訴幾個月後 . 終於收皮熄燈 !

記憶番晒嚟

油尖旺日落 . 又真係幾正 

後生嗰陣, 公司有人劈炮, 成班同事都會笑住玩話 :  [永遠懷念].  不過對我嚟講香港真正值得 [永遠懷念] 嘅, 只有哥哥 Leslie.

利申, 我唔係哥哥 fan 屎, 但睇過好多佢嘅戲同電視, 連當年 [麗的電視] 重播 "甜甜廿四味", "浣花洗劍錄", "對對糊" 都有 😆. 

張國榮靚仔做戲好係肯定, 歌呢...... 就唔太符合個人口味, 唯有 [風繼續吹] - 雖然係 cover, 真心覺得好聽過山口百惠原作. 

對 [風繼續吹] 另一深刻記憶, 係以前讀設計教 design fundamental 個阿 Sir, 成日騎劫課堂喺 lecture room 迫學生聽佢表演唱歌 (CLS 自己仲準備埋 BGM 嗰隻 😂😂😂), 變態, 虐兒 !  但有次唱 [風繼續吹], 嘩又真係幾鬼好聽. 

尋晚去大南街打邊爐, 難得出九龍, 順便去尖沙咀 Fun Space 睇陳淑芬搞嘅 [繼續寵愛空間], 欣賞佢多年珍藏, 張國榮演藝回憶. 

雖然場地細, 個展覽都幾好睇 👍, 最 like 嗰 part 係啲金唱片, 獎座, 尤其歌衫 !  舞台服裝靚同浮誇預咗, 但當實物 1:1 近距離展現, 幻想哥哥真人著起呢啲歌衫, 妖豔又前衛 !  

發現 Leslie 應該幾瘦, 目測啲褲管同腰圍都好窄吓, 我都未必穿得落 😭  

展出服裝其中有幾套係法國時裝設計師 Jean-Paul Gaultier 特別為哥哥演唱會打造.  講起 "喪波", 回憶突然番晒嚟, 當年讀設計年紀少少已經貪慕虛榮, 缺乏金錢痛感, 1989 年 0 收入竟敢走去海洋中心狼死買咗件過千嘅 "喪波" 恤衫 !  唔記得之後點收科, 總之而家諗番起都心寒 😵

有兩位朋友同哥哥曾經近距離相處過, 讚不絕口, 話天皇巨星就算對身邊啲二打六都全冇價子, 好人一個相當難得. 

紅色高跟鞋 (我第一次見男人著高跟鞋, 係喺德國柏林 👀)

上海食力

上星期二, 終於可以親身到訪 LV 上海嗰隻鐵皮船 [路易號], 上艇食個漂亮飯.  

個人覺得隻船外觀奇醜, 好彩只係臨時建築下年就拆, 當地朋友話唔知係咪咁啱得咁橋, 自從隻 [路易號] 落 "地", 上海市區一落大雨就不停出現大水浸, 之前唔會個喎 😆 

餐廳訂位食飯可免排隊參觀埋 LV 展覽館, 瀨都瀨嘞, 又唔使錢, 順便睇埋吧  (車~~ 去到根本都冇人排隊 😂 ). 

LV 在線客服建議客人用餐前預留 30-40 分鐘時間參觀展館, 我專注力缺乏, 諗住快閃 10 分鐘打幾個卡就算, 點知入到第三展廳 "溯源 The Origin" 門口, 就比個靚女導賞 mark 實, 落力介紹啲 LV 古董篋淵源.  

心諗, 大鑊喇, 實有排玩 😬  同場成 30 幾人, 為何偏偏選中我?!  打算同靚女講, 我其實喺 LV 做過 10 年對品牌非常熟識, 叫佢過主搵第二個, 但咁講又好似唔係幾好, 辜負人哋一番熱誠. 

結果最後乖乖聽晒女導賞對幾十隻篋逐一介紹, 仲同佢互動交足差不多 30 分鐘戲, 算係咁 lu 掛. 

哎吔, 比個展覽殺個措手不及, 搞到大遲到, 嗱嗱林跑上 3 樓餐廳, 好彩朋友仲未黑面 😛 

餐廳疑似係郵輪主題設計, 不過成世人未上過郵輪, 所以都唔太肯定. 又或者呢啲就係而家所謂嘅 "潮奢" 風格?  哈, 咁我一定唔潮啦, 因為我覺得餐廳環境同氛圍其實好老餅, 仲係阿伯嗰隻.

可幸員工服務同食物水準相當一流, 俾到真正 fine dining 質素, 呢間係去過嘅 LV 餐廳中 (巴黎.曼谷.上海) 至全面 ok 嘅. 

去得 LV 食大部份人主要目的都係打卡, 咁呢方面應該冇客人會失望, 因為枱面杯碟碗筷都印滿 LV monogram, 連飲酒侍酒師話隻杯都有得揀 : 刻晒 logo 款同冇 logo 嘅正統酒杯, 咁梗係嚟個 LV 全套沉浸式體驗啦.

因為主打飲酒, 我哋只係叫咗少量食物:

1) 魚子醬牛油果吞拿魚 TACO - 巨好味 ! 

2) LOUIS HAO 路易號 鯛魚薄切 - 味道屬正常發揮, 但擺盤就真係靚到無話可說 💖

3) 帝王蟹意粉 - 叫嗰陣冇乜祈望諗住都係意粉一碟, 點知成晚最驚艷原來係呢個, 意粉掛滿由蟹熬製嘅濃汁, 鮮味滿溢, 啖啖帝王享受.

4) MONOGRAM 義大利餃 - 牛肝菌菜肉餃, 綠色 monogram 餃皮蒸到變晒形有啲樣衰, 但中西合壁嘅味道又竟然得喎.

望見隔離枱食緊 LV 暗花造型法式甜點, 靚到不得了, 可惜我哋都唔係甜食鐵粉所以冇 order, 臨走前走去甜品 counter 打個卡當食咗.

台北食力 (II)

台北週日下晝食完日法創意料理, 按吓腳唞幾粒鐘, 好快又再出去 [香色 XiangSe] https://www.facebook.com/xiangse/?locale=zh_HK  繼續食食食.

[香色] 位處博愛警備管制區嘅一條巷弄裡面, 出發前上網踩線, 見個地方 rustic 裝修有啲似歐洲老宅, 好期待. 

我哋 7 點半到達, 落車一望佢個殘破門面, 已經心心眼 😍😍😍  

穿過石子路庭園, 餐區昏黃燈光氣氛神秘優雅, 古董掛毯加埋啲道具擺設, 幻覺自己去咗歐洲. 後來得知餐廳老闆原來係開歐洲古董傢俱店嘅, 唔怪得有咁多靚嘢啦.

大頭仔主廚 Steve, 三十出頭, 曾經喺番邦頂流餐廳學廚, 煮嘢食同擺盆賣相都有番兩吓散手.

西式料理帶點南洋 + 藏族風情 (奇怪組合 😆), 11 道菜 dinner tasting menu 算番港紙每位一千有找, 一啲都唔貴.  

網上圖片

除咗食得好, 整個用餐過程確實相當有儀式感.

Chef 搵插畫師 friend 根據自己靈感作畫 : 今次係佢老婆藏族家鄉主題, 再搵印章公司做不同印模, 每枱一張空白咭紙, 每上一道菜 waiter 就會喺咭紙扱一個唔同顏色嘅印 (當然有解釋用色嘅意思, 不過我國語屎聽唔明), 印印印層層疊, 食到最尾就會組合成一幅西藏風景畫.  呢個 idea 幾特別, 要俾贊 👍

當晚另一彩蛋, 就係招呼我哋枱嘅其中一個侍應, 識講啲唔鹹唔淡嘅廣東話, 原來佢老豆係香港人 😀.

揸流灘 : 因為啱啱唔覺意食咗個大早餐, 喺超飽嘅情況下, 要再仔細描述每度菜, 真係有啲難度 😆  總之成晚 [香色] 冇一樣嘢唔好食啦 ! 

 

台北食力 (I)

久別重逢, 啱啱過咗嘅週末再訪台北, 嚟個 3 日兩夜暴食+巨劈之旅.

餐廳入口

今次大蝦細享盡廢老福利, 行程安排完全交託同行友人, 自己乜都冇做.  唯一貢獻, 就係點名 book 咗自己非常喜愛, 位處一棟日式官邸古宅, 又靚又好食嘅日法創意料理 [樂埔町] https://www.instagram.com/leputing.tw/?hl=en. 

餐廳庭園的甩皮樹

第一次日光日白去, 隔住古宅玻璃走廊望出禪意庭園, 意境洗滌心靈 😆😆

清澈通透玻璃走廊

比起每位成千幾蚊港幣嘅晚餐, 佢個 lunch 差不多半價, 非常之 affordable. 

夏季餐牌

夏季午餐有八道菜 : 前菜 x 3 | 湯品 | 主餐 | 招牌土鍋飯 | 甜點 | 咖啡/茶, 份量的式啱晒我呢啲雀仔胃.

由右上角順時針 : Beef Tartare | 鯛魚火鍋 | 牛柳 | 玫瑰鴨 | 洋蔥鱔魚 | 宜蘭白蝦

因為已經第三次去, 所以食物精緻擺盤, 啖啖驚喜又不失細緻嘅味道, 對我嚟講都屬意料之內.  最開心, 係友人都讚嘆不絕, 咁就好喇, 總算冇跣到佢哋 😜  

招牌土鍋飯

今餐個人至愛, 絕對係 "彰化芳苑玫瑰鴨" 😍😍😍, 廚師建議 3 成熟, 碟鴨上到枱比想像中還要生, 不過我唔怕食生肉完全冇難度 💪  熟成鴨胸皮脆肉嫩, 沾上鴨肝朱古力醬汁+萬壽菊油, 入口嗰陣香氣簡直可以用繞樑三日嚟形容 ! 

我唔吃的芭樂甜品

第二最愛, 當然係米已成炊 "日本鮭魚紫蘇鹽漬櫻花葉土鍋飯" 啦, 朋友話呢個飯好重紫蘇味, 未必人人接受到, 同意嘅.  不過我就超 like, 可惜當時各人已經超級勁飽食剩成半鍋, 如果俾着我喺香港, 一定打包返屋企 (講咗等於冇講 😂) !

在餐廳慶祝生日的台妹

英雄無用武之地

舊啟德機場

難得機會, 朋友帶咗我去舊啟德嘅飛行總會舊地重遊, 上一次去, 已經係 2010 成十幾年前.

First Solo Bell

印象最深刻佢哋會所酒吧個 "首次單飛" (first solo) 鐘, 因為我其中至愛 👀 嗰套 [ 玻璃之城 ], 戲入面舒琪都打響過.  

一如慣例, 喺酒吧響鐘就要請晒全場人飲一個 round 🍻🍻🍻🍻🍻🍻🍻🍻🍻, 咁 happy 場景實在可遇不可求, 我飲酒人生都係目擊過一次咁多.

酒吧當年 : '玻璃之城' 舒琪敲鐘劇照

酒吧今日: 十年如一日

One-length 白頭伯伯 bar tender 喺酒吧做咗好多年, 分享逸事, 話當年啟德機場依然營運嗰陣, 啲老外機師臨飛前都鍾意走過嚟會所 dap 番杯冇酒精 "酒", 過吓 "酒" 癮. 哈哈, 原來係咁 😆

差啲唔記得講吓飲酒前參觀嘅飛機庫. 

飛行總會幾年前開始已經冇人可以再飛, 因為香港而家冇地方俾私人輕型飛機同私人直昇機升降 😧 

機庫泊滿監生被退役, 正在等待出售到海外嘅多部飛機. 

望住呢批用白布衾住, 被圍困喺啟德, 一個冇跑道機場嘅機 !  感覺都幾欷歔 😕  "插翅難飛" 會唔會係最貼切嘅形容呢?

唔買都睇吓啦 😋