One hundred never tire

標題呢句英文 one hundred never tire, 有冇人睇得明 ?

哈哈, 係我喺 Google 搜尋 ' 百看不厭 ' 英文, Google 係咪好正呢 ? 😆

Burano

無端端做乜提起 ' 百看不厭 ' ?  因為喺威尼斯順道去咗 Burano ( 彩色島 ) , 一個龍友夢寐以求, 發燒攝影聖地, 可惜我一落船, 已經有窒息感覺, 因為呢個地方同廿年前簡直一啲都冇變過.

記得廿零歲第一次踏足  :  民風純樸, 啲人好似唔駛做咁 : 起身 -> 食飯 -> 瞓覺 ( 再 infinity 循環 ) , 加上啲五顏六色小屋, 視覺上極度浪漫震撼.  心諗, 如果可以好似佢哋咁幸福, 喺度靜靜哋過一生就好喇.

唉吔, 好彩冇咋, 而家睇番, 成條村先得嗰萬二人, 你眼望我眼, 肯定悶到抽筋.    生活靜靜似是湖水 ......  陳百強首 ' 漣漪 ' 肯定要無限 loop 😏

今次已經第 5 次去, 但因為係隻馬嘅第一次, 見佢個興奮樣, 自己就算覺得點悶, 都唔可以流露出來, 唯有心裡暗暗流咗一行悶到喊嘅眼淚出嚟.  今次真真真係夠喇, 除非重金禮聘, 下次咪搞.

當刻身在 Burano, 腦海忽然閃現兩樣無里頭 :

阿珍

1. 百看不厭 

2. 導遊阿珍








夠竟世界上有冇 ' 百看不厭 ' ? 

有㗎 ! 不過唔多啦.


1. ' 百看不厭 ' :
好佩服啲溝女王, 每次溝新女都可以帶啲女去同一地方做類同嘅嘢.  如果我係男人, 同樣嘅嘢喺同一個地方重複做 100 次應該會悶死, 我會 ' 唔得 ' 囉.

2. 導遊阿珍 :
唔係講阿珍, 只係打個比喻.  
想話做導遊唔易, 我一定唔係好材料, 一團幾廿人, 人人都有個腦, 每個人都會諗嘢發表不同意見, 點搞呀 ?  我脾氣大, 專橫, 怕悶又怕重複, 分分鐘黑面打人.

同埋都係嗰樣, 真係冇咁好演技, 去同一個景點 100 次都表現得好雀躍, 好奇又有趣吧. 

佛羅倫斯的燭光晚餐

今次佛羅倫斯之旅着數多, 因有蘇德華 ( 大鼻孔判頭 ) 嘅老闆同行.

蘇德華出手已經咁闊綽, 老闆喎, 閒閒哋都起孖啦, 唔去啲靚地方食, 簡直係浪費.  所以出發前施展混身解數, 搵盡啲好嘢, 其中一間銀器店 ( Pampaloni ) 真搞嘢, 每星期 3 晚, 開放自己工場樓上嘅員工飯堂做私房菜.

入到去先係個陳列室暨 reception area, 每個客人都奉上一杯白酒 welcome drink. 

Reception area & showroom

 

銀器店老闆

可能係唯一亞洲人面孔, 竟獲銀器店老闆親自迎接, 仲一一介紹佢哋特別設計, 參觀 office 同 back of house 造銀工場, 好榮幸.

原來佢哋大有來頭, 同好多國際知名品牌 / 建築師 / 設計師合作.

我同教宗合照

最搞嘢叫我攞住隻教宗用過嘅杯影相, 仲問我要唔要同教宗合照. 

哈 ~ 都幾玩得喎 😆

連 waiter 都玩 gimmick

上到餐廳, 比個着住軍服嘅 waiter 嚇咗跳, 佢個樣好惡㗎. 原來日頭係打銀師傅, 夜晚就做侍應, 真係用到盡.

個地方燈光同設計都好有心思, 意大利人玩燈確有一手 !

所有餐具都係自家製銀器, 幾貴氣呀. 燭光晚餐, 幾浪漫呀, 不過對住啲佬, 感覺有啲嘥料.

最爆笑係坐坐吓, 蘇德華老闆望住啲蠟燭好似有難言之忍, 問佢做乜, 佢口窒窒話 : " 乜意大利人食飯會點白蠟燭㗎 ? 喺大陸死咗人先點㗎 ".  哇, 頂佢吖, 差啲噴咗啖酒出嚟.

價錢合理到爆

嗰度係食西西里 ( Sicily ) 菜嘅, 啲人問我西西里同意大利菜有乜分別, 我識條鐵咩 .

老實講, 今次出 trip 最舒服, 因一早講明我唔會再將成個餐牌每道菜逐一翻譯, 麻煩大家用 ' 排除法 ' 話我知, 想, 或者唔想食乜, 跟住我會提供建議.

因此, 蘇德華老闆喺意大利就被處於捱打狀態, 因為佢唔識英文, 咁我啲普通話又屎到連豬牛羊都講唔正, 佢自己又想要乜都唔知, 點搞呢 ?

結果係佢隻馬 ( 香港人 ) 幫佢決定每餐食啲乜, 陰功.

呢個八爪魚沙律超開胃超新鮮, 唔似喺香港, 永遠都覺得食緊啲已經死咗好耐嘅嘢咁.

個魚湯簡直好味到無與倫比, 一剪開個膠袋啲海鮮香味洶湧出嚟, 應該入近年美食 10 大 !

老貓燒鬚之 CX 你好嘢

上兩個禮拜, 部門成個團隊一行 4 人齊到意大利, 表面去總部 training, 實質各懷鬼胎, 工作為名, 遊樂為實.

帶住隻馬由香港直飛羅馬, 懶有氣勢咁.  點知落機出咗海關去緊另一 terminal 轉機途中, 驚覺自己竟然留低咗個銀包喺飛機度 😱😱

唉, 千年道行一朝喪 .

冇嗰樣整嗰樣, 驚死比人偷錢 ( 最衰都係嗰啲機倉老鼠嘅新聞啦 ) , 以前飛 N 咁多次都唔驚, 無啦啦今次又會鬼整將個銀包攞開, 擺喺坐位旁邊個 storage compartment 度,  end up 落機冇件事, 完全唔記得攞 😒

個 fxxking storage compartment (補拍)

羅馬機場 : 狂奔聖地

結果當然係要喺羅馬機場全壘打, 上下左右狂奔去找個可以處理機上遺失物品嘅櫃檯.  








呢件事喺香港一定好快解決, 但發生喺意大利, 變成 mission impossible, 因為意大利人好鬼唔 organize, 冇人會比到明確指示 ( 同我公司一模一樣 ), 果然不出所料 :

Information counter 叫我去 ' baggage claim ' 
-->  ' baggage claim ' 叫我去 ' CX counter ' 
-->  CX counter 關咗 
--> 走去再問 information,  佢哋叫我試吓 ' lost and found ' 
--> ' lost and found ' 又叫我去 ' aviation lost and found ' 

' lost and found ' !
' aviation lost and found ' !!

天呀 ~  駛唔駛分得咁細呀 ?

喺變身羅馬人球嘅與此同時, 當然有嘗試過打去 CX 香港同意大利嘅所謂熱線, 一係唔通, 一係就 automated system, 噤嚟噤去, hold 住條線聽佢啲 promotional message, 播音樂等了又等, 成 15 分鐘都未駁到同個真人講, 真係火都嚟 !  

大佬, 我打緊長途, 分分鐘都係錢嚟㗎.  諗番起, 都怪自己蠢, 應該第一時間打去 ticketing and sales, 包保即刻有真人接.

最後希望, 禁區裡面 ' aviation lost and found ', 櫃檯當值都算有啲效率, 以比正常意大利人快咗少少嘅速度去反應, 冇耐已經聯絡到 CX 仲竟然搵得番個銀包.

交還銀包當刻啲人叫我 check 吓, 一攞上手已經 feel 到唔妥, 因為薄咗好多.  打開一數, 啲歐羅比人攞剩 1/3, 港紙就冇人吼.  但見身份證同信用咭都齊哂, 唯有扮冇事走人.  嘩, 趕住轉機, 唔得閒同佢玩報警啦.

老豆話齋, 意大利係賊竇, 果然有智慧.
諗深一層, 呢次都算衰運中嘅好運, 因為喺意大利跌咗銀包, 又可以搵得番嘅機會係 0.   同埋啲人仲咁有人性留番少少錢比條生路我行, 真係奇蹟中嘅奇蹟. 

深深不忿, 返到香港第一時間寫去 CX 投訴, 因為出事嗰陣我摷勻全個網頁都找唔到個 emergency contact. 結果 CX 答覆 : 係真係冇嘅 😵

個客戶服務仲建議我下次如果遇上同類事件, 應該先報警處理. 真係想小佢, 打比意大利警察 ? 算吧啦.  心諗打 999 比香港警察仲有機會搵得番.

明知個銀包喺飛機, 而班機又仲未飛走, 係咪應該搵羅馬機場啲 CX 人 make sense 啲呀.  佢話係, 但我話佢知當刻所有 counter 都冇人當值, 佢竟敢問我有冇試過打去 marco polo club, 痴線, 緊係有啦 !  

嗰個電話號碼係比所有綠咭 / 銀咭 / 金咭會員 share 㗎, 又唔係鑽石咭專線, 永遠打唔通囉.

跟住條友都有啲無言以對, 唉, 算啦, 再講落去都係冇結果㗎喇.  都係嗰句 : 以後搭國泰唔好帶銀包, 咁咪唔會唔見囉 !

廁紙王

Office 正式合併, 兩間公司同事已經 ' 行埋 ' 個半月.

共處一室, 眾人表面河蟹 ( 和諧 ), 實質水溝油貌合神離. 



Round 1 - 意大利人 vs 意大利人 :

喺香港嘅意大利幫好團結, 極關照自己友, 驚死啲鄉里撈唔掂死 Q 晒, 大部份意大利公司九唔答八無論任何事, 由內到外再到內, 乜都幫襯番意大利人, 務求全部 made in Italy / made in China by Italians 😆

因為咁, 合併後, 好自然推理老闆會同亞太區啲意大利同事埋堆打成一片, 點知君子之交淡如水, 傾多句都冇喎.

呢個老闆非一般, 完全估唔到佢開邊瓣.


Round 2 - 意大利人 vs 亞洲人 :

一字記之曰 : 狗咬狗骨.  

已經聽聞過幾單正面衝突, 其中一鑊, 香港 PR 敢作敢為, 同坐喺隔離位條意粉上司炒, 要搞到 HR 去調停.  我認為呢條女為華人爭光, 要讚 ! 

對住啲成日以為自己大 x 晒嘅番幫, 中國人 '忍' 同 '以和為貴' 嘅美德, 要擺埋一邊.  

據多年外資公司工作經驗, 一定要 fight !   其實職場上老外比較 buy 啲有主見同會作出合理反抗嘅人, 嗰啲默默耕耘得個做字嘅, 佢哋真係眼尾都唔梢, 仲會蝦得就蝦, 你唔出聲 say no 嘛, 咁即係 ok 啦.

Round 3 - 亞洲人 vs 亞洲人 :

職場經典, 同事啲私隱瘡疤喺 office 廣泛流傳 :

• 某 40 幾 accounting 同事, 有超臭狐, 下晝 4 點後陣味最濃 ;  

• 某 50 幾 finance 一姐, 自稱卵巢有 cyst ( 囊腫 ) , 三日唔埋就話血崩, 但又唔去做手術處理, 總知一血崩就走去 CFO 房話自己病搾死, 乜都唔使做 ;

• 某 60 幾, 個 title 長到都唔知佢做乜嘅亞婆, 日日都著住同一件勁厚墊膊嘅西裝褸, 分分鐘廿年冇洗過, 冇誇張 !  入佢間房, 真係聞到成陣老人除.  

最經典係佢喺廁所逗留每次至少一粒鐘 ! 一日幾 round.

 
成幾粒鐘, 喺屎坑搞乜 ?

其實我真係冇興趣 find out, 不幸地, 啲八婆同事一字不漏, 繪影繪聲話晒我知.

 

首先, 佢喺廁格外將條半身裙轉嚟轉去 ( ?? ) , 跟住不斷重複洗手, 大洗 15 分鐘先去小解, 小解時一定用極大量廁紙去抹乾淨同鋪好坐廁, 先坐落去. 

屙嘅時候仲會不斷喃喃自語, 有人嘗試去聽, 但聽唔明佢噏乜, 總之唔係祈禱啦.

屙完後, 再會用 20 - 30 分鐘重複洗手 + 再轉嚟轉去抽條裙. 

My god, 有日佢仲話想同我食 lunch, 唔好 lu 掛, 我驚驚豬呀 !

重慶土飛機

重慶地勢起伏, 高樓大廈密質質, 有時喺岸邊霎眼一望, 真係會以為係香港, 不過佢哋啲樓比香港起得更高更狠, 電梯喺嗰度必定大賣.

好彩幾次去都唔係盛夏, 暫時未感受到 ' 重慶熔爐 ' 嘅樂趣.

其實重慶觀光點唔多, 咁仲正, 可以疊埋心水主攻地道重慶火鍋.  但係有另一樣嘢我好有興趣, 就係佢哋嘅 ' 過河纜車 ', 當地人稱之 ' 重慶索道 '.

條隊人多但郁得好快

上兩次去已經好想搭, 但時間緊迫去唔到, 今次終於可以試吓, 唔係講笑, 去到雖然要排大隊, 不過真係未上車先興奮.

大陸同事話今次好得多, 因為天氣涼.  佢上次夏天搭, 架車人味汗味臭到冤 ( 註 :  連大陸人都頂唔順覺得惡劣, 我哋必死無疑 ), 所以今次真係執番身彩.






每架車可以企 50 人, 來回 RMB 30, 車程 2:30 分鐘, 其實都幾 efficient, 除咗遊客, 好多當地人返工放工都會搭, 因為重慶塞車實在太勁, 連埋排隊嗰 15-20 分鐘, 都一定快過坐車過對面岸.

車上拍到勁空氣污染嘅重慶

 
職業病,  當然要注意吓呢個偉大工程嘅設計及施工單位啦.

噢, 原來揚子江即係長江嚟㗎 ? 你話我幾膚淺.

我喺 10 分鐘內連環飛越咗長江兩次, 咁應該係一個壯舉囉 😂