好心人

今朝打長途的, 同的士佬談論近期路面狀況, 各區徹底淪陷危機四伏, 兵荒馬亂, 根本同內戰冇分別.

上星期四朝早原本 book 咗騎馬, 點知必經之路全封, 但又非常心掛掛想探吓隻馬, 結果轉接地打的去荃灣西 --> 搭西鐵入元朗 --> 之後再打的 --> 去八鄉.    點解唔喺錦上路直接去 ?  我都想, 可惜架西鐵行行吓突然宣佈錦上路站收皮, 吹 L 漲.

好戲在後頭, 9:15am 睇完馬要出尖沙咀返工, 出到騎術學校門口, 成條粉錦根本塞死晒郁都唔郁 ! ( highway 唔通, 啲人個個諗住行荃錦公路出九龍, 但又自不量力, 上斜架車唔夠力, 搞到跟尾成條隊個個變龜行囉 ).  Call 的士 apps 同 Uber 加成 $100 都冇人應機, 唔對路, 唯有出粉錦公路邊行邊截,.

咁當然冇車啦, 9 點半喇, 點算呢 ?  忽然間心裡祈求 :  [ 天呀, 麻煩比條生路行吓, 比架車我走啦...... ] ( exact wordings 😆)

成隻無主孤魂咁喺路邊行嚟行去揾車搭,  行咗 3 分鐘左右, 突然有架黑色 van 停低, 裡面好心司機竟然 offer 順路載我一程去上水 😮😮😮😮.   

你話係咪極度神奇呢 !!!!!!!!!!!!!!!!!!!!!!!!!!!!!!!!!!!

上水去大欖 3 號幹線雖然塞咗成兩粒幾鐘車, 但全靠好心司機幫忙, 我先可以途出生天, 中午前回到 office.  真心祝願佢事事順利, 好心有好報 !

貪新忘舊

無驚無險新工踏入第二週, 雖未至如魚得水, 但都算漸入佳景, 起碼仲未有想立即走人嘅感覺.    

返幾日就唔撈我當然有往績 😆   之前雞毛 HR 同事成日咆哮, 話啲新人玩嘢做幾日就劈炮 ; 我反而認為合情合理, 唔 like 不如趁早閃, 冇得夾硬嚟委屈自己, end up 浪費大家時間同心機.  

喺雞毛長期被灌輸 [ 因為 under staff 所以唔 efficient ] 嘅概念, 但入咗新公司, 先知品牌生死存亡, 唔係人多人少, 根本係關乎產品, 管理層決策同 staff 質數囉.

早幾日 product training 嘆為觀止, 太耐冇見啲咁華麗嘅貨品, 鹿撞心情比如二奶攞住張附屬咭去任碌一樣 = X 咁 high 😂😂😂.    附屬咭我就冇份喇, 靚舖都 ok 嘅, 新公司品牌對店舖設計好有要求, 睇番 budget 竟然貴雞毛唔多, 但效果同氣勢差好遠.  點解呢 ? 

新公司品牌 Venice shop

新公司品牌 Miami shop

雞毛 Beijing China World shop

適應進行中

享受完短暫的 in-between jobs ( unemployment 代名詞 😂 ) 12 日美好時光, 終於返回現實.
唔好誤會, 我唔係吃回頭草, 上圖只係用嚟顯示新工上班地點 : 喺廣東道比 LV Chanel 夾住, 相對舊公司黃竹坑鬼地方, 天堂與地獄, 剩係個勢都唔同啦 !

First day 前嗰晚雖未至失眠, 但瞓得非常唔好.  幾日前已經不停催眠 / 調較 / 安慰自己 : " 新環境之嘛, 又唔係未見過大蛇嘔水, 驚乜啫 ? ", 點知週末返屋企食飯, 老豆一句 : " 你大年紀喇, 仲有人請, 要比心機做嘢啦 ...... "  比佢一嘢嚇爆, 壓力由 0 火速飆升至 100.   好彩有預早踩線, 綵排咗返工一次, 掌握到點樣 / 要幾多時間由屋企去廣東道, 如果唔係, 情況真係會變得極度糟糕.

心跳加速踏入公司門口之際, receptionist 笑容親切, 跟住茶水阿姐殷勤招待, 並非因為我職位, 記得見工嗰陣都係一樣咁好招呼, 令人感覺超 warm 喎.  呵 ~ 新舊公司大家都係意粉嚟啫, 點解個 mood 差咁遠 ?    ( 答 : 人工差別 😂 )

第一日都係嗰啲啦 : HR 好 Q 多 forms 要填, 各類 access card 交收, 介紹 office 設施, 同全人類握手 ( 基本上介紹完 5 秒內就會忘記咗人哋個名 😆 ), 同條 team 食 welcome lunch, 執拾吓房間啲嘢, 跟住 send 電郵同海外同事打招呼, 無驚無險 6pm 準時收工.

第二日返 office 途中竟然仲緊張過第一日, 皆因要面對自己最大死穴 : 勁驚一條友自己出街食飯 ( 早餐除外 ), 連飲嘢都唔得.   好白痴, 好低能, 不過由細到大都係咁, 控制唔到, 就算出 trip 我都只會叫 room service 或買嘢返酒店房食.   最後, 有幸同事邀請一齊食, 可惜要拒絕, 因為 lunchtime 要飛撲去花墟買風水植物, 風水呢啲, 愈早搞愈好啦.

事原咁啱得咁橋, 新舊公司都係請同一個風水師傅, 佢好人地免費教我間房要點樣擺, 仲話我坐咗喺 office 其中風水最佳位置之一, 咁個心都安樂啲 ......

不過聽聞老闆諗住改動 office 間隔 ( 項目當然係由我負責 ), 完成後我就要搬去坐近老闆嗰邊了.

吃得到的葡萄

多得意大利同事好介紹, 得知離 Florence 不遠有個 Antinori 酒莊可以組團預約參觀, 品酒 + 食晏 3 道菜連 wine pairing, 每人 Eur 160 ( 餐廳仲係米芝蓮一星 ), 超值.  唯一難度就係冇公車去, 個個劈又冇人想開車, 最後只好包車.  

Spiral staircase

出發前上網𥄫過都知道 Antinori 酒莊唔嘢小, 估唔到去到落車當刻望見佢條旋轉樓梯, 竟然心跳 !  佢老味, 開瓶器形 5 層樓梯直徑 弧度 斜度全無重複 - engineering 至高境界.  
再望吓整個建築群, ultra-modern 設計同四周翠綠山巒全無違和感, 意大利建築師果然好嘢 💪   呢個正好推翻啲人話意大利人蠢嘅說法, 經多年相處, 我認為佢哋絕對唔蠢, 好多時只係被國民表徵 [ 凌亂思維 ] 同 [ 揗雞 ] 誤咗大事啫.

急不及待進入酒窖, 兩個字 : 震撼.   相中兩間凌空玻璃屋, 係品酒嘅 private suites.

沉醉之際, 有人突然專業上身, 問點解天花冇 sprinklers ( 消防嚨頭 ), 扯火答佢 : 呢度啲例唔駛囉 !   痴線, 井底蛙, 戇居, 各處鄉村各處例, 冇聽過咩 ?!

品酒前, 職員帶去葡萄園行轉, 太過份, 嗰度連 ☁☁ 都靚啲.   

十月葡萄成熟時, 職員話可以試食, 初頭有啲猶豫, 因以前學品酒阿 sir ( 粉腸 😂 ) 話葡萄皮好苦澀......  咬一口, 直頭甜過利賓立, 一啲都唔苦囉, 我哋搏晒老命試, 食咗人幾廿粒 😆.   呵 ~ 我知喇, 條粉腸咁寸, 應該係當年得罪人, 比人耍, 點佢去食啲 " 苦果 " 啦.

品完酒午飯時間到, 走上旋轉梯頂就係田園風格露天餐廳, 明明閒日坐無虛席, 有啲仲係食 business lunch, 厲害. 

不過諗諗吓都唔係咁出奇, 因為由市中心開車嚟呢度只須半粒鐘多少少, 2:30pm 食完再揸車返 office 頂攏都係 3 點幾, 坐陣扮覆 email 散吓酒氣好快又收工, very happy 啦.

3 courses set menu

餐廳好 flexible, 雖然我哋 package 包嗰個係 set menu, 但侍應話如果唔啱食其實可以喺 a la carte 餐牌揀另一道菜調換.

Beef tartare

我將羊鞍換成 beef tartare, 生牛肉成日食, 未食過咁有牛味嘅, 唔駛靠調味, 入口即溶有啲似中拖羅, 鮮味到唔識形容.

Seasonal cheese platter

而羊鞍喜獲全民激讚, 全枱個個隻碟照晒鏡, 連舊骨都吮到乾埋.  不過佢哋對跟住嚟嘅芝士併盤就唔多受落, 咁點解我開頭大大聲話食芝士, 問佢哋改唔改其他食物嗰陣冇人回應呢 ?  

後尾諗番, 應該係我漏咗翻譯餐牌嘅甜品部份, 所以冇人知自己想換乜所以冇提出 😅   大佬, 你哋其中一人曾經留學 New York 7 年, 另外 3 個喺 MNC 做高層, 日日英文電話電郵, 唔識睇 menu, 咪玩啦.

Solaia 2013

夠喇 ! 佢哋咁樣令我覺得好大壓力, 所以另外加咗支 Solaia 嘆吓, 喺酒莊現場就地正法呢支 Super Tuscan, 爽 !