睇樓記 I

成兩個月冇出 blog, 係因為有太多嘢發生, 唔知由邊度開始寫.

首先係四月頭收到業主 whatsapp 今年唔再續租, 想收番層樓年尾結婚用, 爆咗句粗, 跟住腦海就一片空白.  唉, 住咗成 11 年, 真係好唔捨得, 不過冇辦法啦, 第朝疊埋心水網上搵樓, 好快已約好地產經紀睇樓.

銀根短, budget 有限但又諸多要求 : 連車位, 冇傢俬, 最好樓底高, 景觀開揚, 樓齡唔太舊 😆

有諗過搬番出市區, 喺廣播道附近睇咗間簡約裝修實用 530 呎單位, 不過最後冇考慮, 因為睇樓感覺唔係咁良好 :

1. 業主係自讓, 叫佢阿媽上去開門, 阿媽個樣唔係咁友善, 仲扐住背心袋兩盒外賣飯盒, 好明顯係等我睇完返屋企開飯啦, 好大壓力.

2. 層樓同我一樣咁老 50 幾年樓齡, 一梯四伙.  睇完樓出門口嗰陣對面屋啱啱開門出嚟 " 裝香 ", 先留意到佢哋啲 [ 門口土地 ] 同 [ 天官賜福 ] 神主牌非常之有氣勢, 對到我門口正一正.  哇, no laa......

3. 層樓係華懋物業, 更加 no no laa......

4. 原來唔包車位, 要另外比錢租

活在當下

Asia's World City 亞洲國際都會 😂😂😂

香港也 !  但唔知幾時香港變成個非常凶險, 出街堂食就等如會染疫嘅都會, 多得班成世人都未層有過 life 嘅無能廢官, 一味洗腦靠嚇, 搞到市民人人自危, 覺得連喺外面食餐晏都會有病.

" 明知山有虎, 偏向虎山行 " : 係我, 同路人可幸身邊還有幾個 😅

台灣舊同事話猶豫咗陣先敢約今日食 lunch, 驚我因 covid 唔敢出街, 我叫佢收皮.  驚 ?!  明知我中咗好番埋啦, 㷫烚烚屌佢 :  [ 要發生嘅總要發生, 為逃避而逃避, 就算去到邊, 最終都係一樣 ].  呢個係事實, 不過咁深佢當然唔明, 對下三白眼迷思中嘅佢再追問 : [ 咁你今日同我出嚟, 唔驚瀨嘢咩 ? ], 佢用唔鹹唔淡廣東話回答 : [ 瀨嘢 ? so what ?! ], 好 L 正, 笑死我 😆

講完正題, 講吓 lunch 食乜 : 中環石板街 H Code 一間 C 字頭嘅法國菜, 廚師唔駛多介紹, 除咗煮嘢叻亦相當識食, 張打茄輪相睇唔到係邊個女明星 ? 自己上網摷啦 ! 

今日到場賓客竟然 9 成係男士, 客源同廚師喜好 ( 女人 ) 不符合 😂.

做乜全部客都係男人 ?

嘢食味道非常 ok 的, 法國材料日式 yaki 做法, 價錢最貴都唔過 $ 89 串, 每人 4 串又頭盤又 side dish 兩個人埋單每位 $550, 以咁高級嘅格局裝潢同服務, 相當合理.  美中不足, 係餐廳未攞到酒牌, 冇酒賣要自己帶.  呢度依然未可以成為我人生中香港食最好食嘅法國餐廳, 事實係勁好食嗰啲已經執咗十世, 所以呢間, 還未試過不妨一試, 食咗嘅, 可以試下間.

無敵午飯

尋日約咗同樣中完招啱啱出關嘅朋友食晏, 大家咁高咁大, 唔怕邊個傳染邊個. 

地點係大埔紅林路嘅 Le Vow ( 金鷺湖 ) 中菜, 以前搭火車經過見到白鷺湖邊座白色建築覺得好靚, 而家終於得償所願揾到人同我顛, 入內一窺全豹.

餐廳設計我比 like 👍 :  簡約, 明亮, 地方寬敞, 落地大玻璃, 樓底高空間感十足.

食物主打手工點心同鑊氣小炒, 我哋叫咗玫瑰金蝦餃, 鮑魚海鮮煲仔飯 ( 我唔食鮑魚呢, 但我 friend 想食 😉 ) 同脆皮鷄, 三樣味道都好好. 

新界地方, 食客果然係比較自我隨性, 進食期間隔離枱條冬菇頭肥仔喺地上爬嚟爬去, 佢阿媽都只能用勸喻方式叫佢起身, 因為條肥仔實在太重, 我見佢媽試過想扯起呢條發力中嘅肥仔, 但徹底失敗, 完全扯唔起 😂

右邊肥仔剛剛表演完, 左邊一枱嘅阿姨已經急不及待露股, 正在 ' 孔雀開屏 ' 中 😱😱😱.

心諗, 張櫈質地唔通真係有佢特異之處, 搞到阿姨要毫無隔膜地打真軍, 同佢埋身肉搏 ?

磨爛蓆坐到人哋六點關門, 既然一場嚟到喺餐廳附近四圍行吓.  哈, 嗰啲就算已經開到水尾嘅鬱金香都仲 ok 靚喎, 唔怪得早排咁多人嚟打卡啦.  

餐廳旁邊有花店賣鬱金香, 我都買咗盆, 趁吓熱鬧.

血的教訓

中咗啦 ! 不過以我半躺平嘅抗疫姿態, 中 covid 根本係遲早嘅事. 

上禮拜二晚半夜瞓瞓吓覺得喉嚨好乾, 直情乾到要起身飲幾次水咁誇張. 第朝冇再 dry 但就有啲周身唔聚財, 手痕攞支快測驗吓啦, diu ~ 唔係嘛 : 兩劃.  但條 T-bar 極淺色唔知堅定流, 整多兩支唔同牌子試吓, 點知仲淺色但點睇都係有, 好明顯瀨咗嘢喇 😷.  

[ * 病徵藍色表示, 每日不同, 無重疊或重複 😆  ]  

[ * 每日感受紅色表示, 不斷重疊或重複 ]

DAY 0 ( 9 Mar ) : 第一時間網上申報, 大佬呀, 以為公司請假要攞染疫證明嘛, 點知一失足成千古恨, 呢個多餘嘅申報 ( 因 HR 回覆染疫隔離原來唔駛請 sick leave ), 揭開連日精神折磨序幕, 搞到自己無時無刻都被 [ 無症狀或輕症人士要入社區隔離營 ] 呢個陰影籠罩.

[ 少少作感冒 feel ] [ 仲未知驚, 以為輕症家居隔離就搞掂, 點知只係自己一廂情願 ]

DAY 1 ( 10 Mar ) : 啱啱由 DAY 0 轉 DAY 1 幾分鐘, 已經收到午夜凶鈴 😲, 消防處 sms 要求 24 小時內回覆, 是否願意盡快入住社區隔離設施, 我當然漏夜 say NO 啦. 

點知下晝兩點幾又有電話, 話我被抽中做核酸覆核檢測 ( PCR ), 當晚會有人上門俾樣本瓶我, 要廿分鐘內完成.  頂 ~ 唔係咁好彩嘛, 六合彩又唔見我中 😠.  我話 : " 吓 ~ 夜晚 ? 幾夜㗎 ? 唔會成 12 點先上嚟嘛 ? "  對方話要等安排, 答咗等於冇答, 結果等到 11:45pm 都冇人嚟, 妖, 唔等了 ! 

[ 頭痛 | 發燒 | 勁 hangover feel ] [ 好驚要入營 | 頭昏腦脹食咗藥勁眼瞓呆等成晚, 結果俾人放飛機, 真係好嬲, 政府好擾民 ! ]

DAY 2 ( 11 Mar ) : 好多個小時後嘅 11:40am, 終於有速遞員聯絡, 話一陣會擺低核酸檢測套裝喺門口, 但因為有極多 ' 單 ' 要跑, 想麻煩我 5 分鐘做好, 吓...... ?! 盡力啦.  速遞員在門外等候, 好有壓力, 又要對 serial number 又要填 form 又要撩鼻, 結果快鏡都要用 10 分鐘先完成到 !  撩完鼻搞到鼻敏感連續打咗二三十個乞嗤 , 之後啲鼻水就停唔到, 流足成日用咗成盒 tempo. 

[ 連環打乞嗤 | 狂流鼻水 ] [ 好 L 驚要入營 | 已經病㗎啦, 無端端搵人嚟撩我個鼻, 引發新症狀, 政府正仆街 ! ]

DAY 3 ( 12 Mar ) : 11:45am 左右, 收到 HKSARG sms 通知核酸檢測結果陽性, 要 24 小時內網上申報.  吓 ~ 早幾日咪報 L 咗囉, 搞乜又要再報 ? 再申報隔離日期會唔會從頭起錶㗎 ? 同埋報多次咪即係增加入隔離營嘅機會 ?!  妖 ! 今次打死都唔會中計, 我以後都唔會再理佢哋任何 sms 😤.  

查市民有冇虛報就可以調配咁多 resources, 咁積極咁快, 但個抗疫包就完全冇影, 好彩唔駛等佢啲藥救命啫.

[ 咳 ] [ 極度驚同擔心要入營 | 勁㷫政府發明個網上申報系統比市民自願申報, 但又精神分裂, 懷疑自己個機制令人做假, 要走去抽查市民係咪虛報, 痴 9 線 😡, 都唔知乜 L 邏輯思維 ! ]

DAY 4 ( 13 Mar ) : 又係大約 11:30am 衛生署電話到 !  哇 ~ 都隔離第 4 日啦, 唔係而家先嚟捉我入營咁大鑊掛 😓   同埋捉還捉, 千祈咪擺我同啲唔識嘅人同倉, 萬一真係, 我會扮周身搲, 同佢哋講我有皮膚病會傳染人, 嚇到佢哋自己要求調走.

好彩只係虛驚一場, 原來問我要唔要抗疫包, 真係比佢嚇破膽 !  我話 : " 唔駛啦, 我好番啦, 你派比啲有需要嘅人啦 ! "  對方問 : " 你 RAT 已經陰性 ? "  我答 : " 未, 聽日陰啦. "  佢俾呢個比較特別嘅回應 surprise 到, dead air 咗 1 秒, 跟住禮貌地多謝我, 仲祝早日康復添.

[ 起痰 ] [ 仍然擔心要入營, 因為仲俾人關注緊 ]

DAY 5 ( 14 Mar ) : 等咗成朝都冇乜動靜. 政府, 請你忽略我, 放棄我吧. 一如所料, 下晝快測變陰, 我做番陰人了 😂

[ 康復中 | 咳痰 ] [ 不安 | 驚臨尾香要入營 ]  

DAY 6 ( 15 Mar ) : 有曙光喇, 快測繼續地陰, 明天再陰就可以出關 !  

傍晚收到食物及衛生局 sms, 叫我登記 ICMS 隔離護理觀察系統, 食屎啦 ! 

[ 康復 ] [ 好想爆粗大嗌, 叫班 9 官唔好再 involve 幾廿萬個部門去搞咁多花臣 ! 自己又廢又 handle 唔到, 個個部門分工而不合作, 日日收唔同信息, 亂七八糟, 搞到香港 一 pet 屎咁 !  ] 

DAY 7 ( 16 Mar ) : 教鬧鐘 5:30am 起身, 早驗早享受, 快測結果當然係係 negative !  立即換衫衝出街, 第一件想做嘅事, 當然係探吓隻馬啦. 

[ 開心 | 自由, 原來真是十分可貴 ]

PS :  我真係中六合彩呀 ~ 40 蚊咁多 😆

野獸派工作

夠喇 ~~~~~~

呢世人除咗驚蟲 ( 前日騎樓盆香草有條好 Q 大青綠色, diu ! ) 同冇 $ 之外, 最怕就係悶.

剛剛過完正月十五, 公司終於有人中 omicron, HR 立即出電郵禁止員工返 office 直至另行通告為止, 都好嘅, 無謂攬炒.  

連續 WFH 咗差不多成個月, 日以繼夜對住 3 個 mon 辦公開 VC, 因為唔駛見人而疏於打扮蓬頭垢面, 加上日坐夜坐粗到差啲 31" 嘅中央肥胖, 實在樣衰, 目睹鏡中自己, 差不多滴咗滴眼淚出嚟.

唔得再宅喺屋企沉淪落去, 今朝起身天氣良好, 靈光一閃決定搞搞新意思到戶外走動吓, 8 點幾邋埋部 laptop 趕出門, 飛車準時 9am 到達, 喺空無一人嘅園野中 " 公幹 ".

睇戲睇得多, 成日幻想屋企好似戲中人咁有個花園曬太陽, relax 吓飲吓酒🍸🍸🍸 BBQ , 做吓嘢傾生意 😆.  諗多咗啦, 呢世應該都冇乜可能, 不過今朝可以有咁大個戶外場地自肥, 小橋流水 😂😂, 仲有馬, 貓, 狗, 牛, 羊, 雀鳥, 錦鯉同烏蠅陪伴開工, 真係夠晒 raw.  又因為冇咗雪櫃, 電視, 音響嘅誘惑, 同埋驚部電腦走向末日中嘅電池冇電, 結果十分專注坐定定, 個半鐘就搞掂原本要用 3 粒鐘先可以完成嘅嘢.

虎父無犬子

前日比 IT 同事笑我搵命搏, 話 office 同座三日出現兩單確診都仲返工, 比佢一嚇當堂有啲怯, 決定嚟緊嘅日子 WFH 算喇, 橫掂 HR 話可以.  大佬, 打份工啫, 無啦啦俾人迫去強檢就好唔抵. 

之前提過唔太享受 WFH, 好 free 嗎 ? 幾嘅, 但一日到黑對住個 mon 開會講嘢, 真係人都癲眼都盲.

疫情爆成咁, 睇怕至少都要 WFH 到二月底三月頭.  同好多人一樣, 成日踎喺屋企冇嘢好搞自然就會廚神上身煮番兩味, 今日整咗塊見得吓人嘅 sirloin, 正當煎好 rest 緊塊扒, 行出廳等候美滿成果之際, 聽到樓下好嘈, 我咁八當然第一時間衝去騎樓𥄫吓.

嘩 ~ 係我最鍾意睇嘅嗌交呀 😆 !! 

 一對中年男女 [ 黃圈 ] 為啲𡃁仔喺屋苑平台踩單車嘅問題吵大鑊 ( 男人應該係其中一個嘅老豆 ), 殺聲震天, 黑衫肥婆個老公好嘢 [ 桃紅圈 ], 企開 10 呎隔岸觀火. 

除咗我, 火爆場面亦吸引不少樓上住客齊齊睇 show [ 紅箭嘴 ].  講真, 條佬好唔掂, 肥婆其實都行開唔想再嘈, 佢仲追住人一路大吵大鬧, 講埋啲爛到震嘅英文, 什麼 : " Shame for you ! ", " Why you not apologize ! " 唔係撩交打係乜 ? 比著我係肥婆都再同佢死過啦.

激烈嘅一刻值得拍片留念, 影咗大約兩分鐘比條細路發現, 走去同佢個正在吵到手舞足蹈嘅老豆報寸, 跟住成班人望上嚟見到我鏡頭對住佢哋, 就突然四散.

一切回報平靜不到 10分鐘又傳來吵鬧聲, 原來肥婆搵埋老公趁人哋老豆行開咗, 走去凶人個仔, 秋後算帳 !  哈 ~ 有老豆身教, 條𡃁仔一啲都唔弱, 雙語並用句句頂到行不特止, 仲叫埋幾個 friend 幫拖同肥婆對駡添, 最後肥婆不敵, 無癮離開.

呵 ~ 又係你 ?

聽日開始港人要進入獨家村模式, 今日趕死線, 仆出去尖東食 5 人開年飯局.

12:30 開局 12:00 都未出門口, 遲晒大到, 屎淋尿瀨要 call 的啦, 上車一刻定神一望, 呵 ~~~ 又係你 ?!

唔係遇著仇家, 而係非常有緣地, 兩年內第 4 次搭到同一架的士 😝.  點解咁肯定 ? 因為記性好加上極强嘅觀察力囉 !  天生, 冇辦法, 控制唔到.

講笑啫, 查實車上裝飾太易認 : 

1. 中國 . 香港 HONG KONG 龍形擺設

2. 紫色垃圾桶

3. 眼珠怪物

大約一個月前第 3 次坐到同一架的士去沙田第一城嗰陣, 已經忍唔住同司機表態 ( 唔係表白 ), 佢聽後有啲愕然, 問點解會記得, 我話因為車上嘅 3 樣特徵囉 😂 :

1. 中國 . 香港 HONG KONG 龍形擺設

2. 紫色垃圾桶

3. 眼珠怪物  ( *司機話香港買唔到 )

所以今朝我同司機講第 4 次坐佢車, 急口令重複車上 3 寶以作確認 😂😂😂 : 

1. 中國 . 香港 HONG KONG 龍形擺設

2. 紫色垃圾桶

3. 眼珠怪物香港買唔到嘅

司機 loop 咗幾秒然後話 : " 呵 ~~~ 上次車你去 ( 沙田 ) 第一城嗰個嘛 ! 呢兩年見你多過見親戚 "  嘩好嘢, 同我鬥好記性, 今次你 win !

坐坐吓, 差不多到達尖東目的地之際, 司機透露將要換新車, 揸緊嗰㗎下禮拜要劏了.

其實部車都好殘係時候舊換新, 不過建議保留 3 寶 擺設做暗號. 祈望可以好快第 5 次重遇, 坐吓佢部新的 !