室內設計人人都識 . 唔駛讀㗎

朋友搬屋, 搵咗個 BNO 英國 friend 隔空室內設計, 點知自己又多心兼選擇困難, 兩日一小改三日一大改, 仲成日問我攞意見.  

我都係做室內設計出身, 同佢講 : 你日日咁改, 點起貨呀 ?  同埋有新 idea 最好直接問番 BNO 設計師 friend 尊重吓人啦.

千叮萬囑, 叫佢千祈唔好喺農曆七月 ( 2022 新曆 :  29 July - 27 Aug ) 搬屋.  Diu ~ 當我發噏風 ! 竟然約搬屋公司照搬如也.

霍金 & 黑洞

此外, 朋友突然非常沉迷黑色廚房設計 : 廚櫃, 枱面, 牆身都用全黑 / 深色物料, 最弊廚房面積唔大, 間屋樓底唔高, 搞到成個 [ 黑洞 ] 咁.  好想提醒佢咁搞瀨正風水 ' 水火不容 ' 嘅其中一瓣.  不過既然佢連 [ 鬼月搬屋 ] 都唔 care, 呢啲 ? 簡直係 nothing 啦.

( 網上圖片 ) 啲橫樑咁深色, 靚咩 ?

間屋勁多橫樑, 唔計沿牆身走嗰啲, 剩係客飯廳已經有打橫三大條 ; 二合一打通睡房仲誇張, 啲樑縱橫交錯, 八陣圖咁.

朋友老公酷愛工業風室內設計, 入晒血當正自己屋企係廠, highlight 啲陣不特止仲油晒水泥灰色, [ 自製橫樑壓頂 ], 驚嚇度爆燈 😱 

好地地拆晒所有清玻璃窗, 換成夾硬加咗幾行橫直條 ' 扮 ' warehouse look 嘅窗, 但啲格仔大細粗幼比例全錯, 成屋鐵框一格格, 十足 [ 坐監 ] 咁 😲

唉...... 可能喺佢心目中咁叫型格掛.

交吉無幾耐朋友邀請我上去實地考察, 發現間屋 [ 地台斜 ] ( 即係擺粒波子喺地下, 粒波子會自動由房嘅一角轆去另一角 😮 ). 提佢  : 地台非常斜喎, 你哋睇樓嗰陣冇察覺到 ?  跟住佢話 : 噢, 你咁講又好似係喎. 真吹漲 !

作為朋友, 理應提醒佢哋呢啲左抄右抄, 百鳥歸巢嘅創作其實已經好 out 同好伏, 但連 BNO 設計師都冇 say no, 無謂咁多事喺度 ' 阿吱阿咗 ' 唱反調搞串個 party 啦.

大暑 air fryer

尋日大暑, 偏偏就喺一年中陽光最猛烈, 最炎熱嘅呢一日, 老點咗幾個 friend 一齊報工聯會攪嘅 [ 魚菜共生 ] 體驗團, 去粉嶺山旮旯 ' 鶴藪 ' ( 音鬥 ) 參觀魚菜共生農場.

鶴藪村 . 李X鉅當年被綁架地點

報團嗰陣係五月, 完全冇意識到參觀 23 July 當日會撞正大暑 😒 !  

新界北比市區熱好多, 未出發先爆汗, 喺集合地點完全冇郁動啲汗都已經瀨尿咁喺褲管內亂流, 跟住步行入農場嘅 10 分鐘暴曬路程, 真係熱到爆炸, 好甘 ! 用嚟嗍汗條毛巾仔竟然嗍到全濕, 好誇張.  

40C 人間煉獄

參加者非常熱血, 我熱到由最初戴住口罩講粗口, 到之後完全入定呆 L 埋, 但眾人喺 40C 嘅溫室內竟然仲可以留心聽導師講解, 不斷發問同做筆記, 確實要寫個服字比佢哋. ( 註 : 好彩同場冇人有臭狐, 如果唔係真係會搞出人命 ! )

大樹菠蘿有得試食

除咗魚菜共生, 農場仲栽種咗極多不同種類樹木, 水果, 蔬菜, 瓜類, 奇花異草...... 應該超過一百個品種, 大開眼界.  因農場只供教學同培訓用途, 唔作大量生產, 所以每個品種只有限量幾棵.

條兩呎長大瓜生到上棚頂 . 笑爆咀 😆

同埋我一入場就留意到吊係天花嗰幾個透明水袋, 作用究竟係乜呢 ?

導師最終開故, 原來係用嚟趕烏蠅 !  話台灣朋友教, 由於水袋會折射光線, 複眼嘅烏蠅會睇到無數個 disco ball 反射光線, 顏色同動作, 搞到佢哋頭暈就會飛走 😂 

總括今次體驗真係好正, 好滿意同回味, 不過如果唔係超級酷熱天氣就更加一流, 一直覺得落地盤好辛苦, 原來做農夫辛苦過 x 倍 !

騎呢考試 II

上回講到, 人云亦云無啦啦走去考 [ 地產代理牌 ], 仲要去到試場先發現自己報錯用英文作答, 咁夠竟最後考唔考到呢 ?

唔賣關子了 : 考到 😂

因為冇打算立即轉行, 所以下年中先申請出牌, 拖得就拖今年慳番幾千蚊先, 不過有樣嘢可能要趕住報 : 地產 MMA, 學打交 👊👊👊   

 

關於地產, 有一個課題係永遠迷思 : 基督徒之選 ( 凶宅 ). 

[ 自然死亡 ] 通常唔算凶宅, 例如 : 老人在睡夢中過世宅內死.  但都有灰色地帶 :  夢中過世但幾日後先被人發現, 全身腐爛;  or 在家跌傷送院時清醒, 最終喺醫院死亡.  咁算唔算呢 ?

[ 非自然死亡 ] 即 BBQ, bungy jump, 吊頸, 服毒自殺, 謀殺, 但唔係太大鑊冇上過新聞冇出報紙, 凶宅網都未必摷到.  買樓嘅, 搵銀行做唔到按揭要一畢過畀就知有料到, 不過租樓嘅有啲難度, 要小心.

就算買樓做物業查冊, 若然瓜嗰個唔係樓契上嘅業權擁有人, 例子 : 層樓屬阿爺個人名下, 除咗阿爺自己喺宅內非自然死亡, 其餘家人 / 外人 / 租客就算喺屋內非自然死亡, 因為冇需要同土地註冊處登記, 誇張啲講, 即使有 100 個人喺裡面死過但冇見報, 間屋都未必查到係凶宅 😮

所以市面存在相當多伏盤, 接受唔到凶宅嘅人士真係要施展渾身解數, 用土炮方式查證, 即係問樓下看更或者鄰居.

尤其係看更, 好正㗎, 佢哋知道好多嘢㗎.

 

騎呢考試 I

十幾年冇讀書考試, 估唔到今年六月一日竟然走去咗考個我一世人都冇諗過嘅 [ 地產代理大牌 ] 考試 😂

成件事, 只可以用騎呢衝動 😝 4 個字形容 : 由報考, 上堂, 到應考, 發生到完成都唔夠一個月, 仲要同一時間搞搬屋喎, 呵呵, 好有火呀 😂😂 ! 

令我萌起念頭應該係 : 

1. ( 前幾個 blog 講過嘅 ) 租屋事件, 當刻真實體驗到好同差嘅地產營業員天堂與地獄的差別, 令我非常好奇呢班人平時除咗撈車 / 爭客打交之外做緊乜, 同埋喺專業層面上佢哋其實應該要 deliver 啲乜.  

2. 四月尾大澳一日遊, 下午茶期間同 friend 一席對話, 原來佢哋都想考, 咁一齊啦 ! 結果認真便輸了, end up 係達明一派首 [ 十個救火的少年 ] 咁 : 唉呀呀 ~ 唉呀呀呀 ~ 😤

報讀雞精班 ( 一共八堂, 每星期三晚 zoom  6:45-9:45pm ), 大佬, 放工趕返屋企 6:30pm 快吞完餐飯跟住連 chur 三粒鐘, 堅攰 !  我不嬲缺乏專注力, 加上必須要飲酒嘛, 所以唔駛 9:00pm 已經 black out ( 試過有鑊瞓着咗, 成 11:30pm 先識醒去熄 zoom 😂😂😂 ), 跟住唯有次次錄低, 第朝返工搭車懶勤力咁聽番啦. 

課程內容查實都幾有趣, 唔係太難, 同讀 econ 差唔多, 但做完幾個 mock exam 就發現試題原來好陰濕同好多灰色地帶, 唔怪得合格率偏低啦.

考試當日, 我安排咗一個超級玩笑俾自己 : 我親自報錯咗用英文考呀 ! 😩  其實去到試場都覺得怪㗎喇, 點解坐我附近兩行全部都係外國人 ?  打開份券, 英文嘅 😱 ?!! 當刻, 終於感受到乜嘢叫眼前一黑, 舉手問派券員可唔可以轉番用中文, 佢答 : " 小姐, 你報咗用英文考個喎 ", 當堂收晒皮.  

唉 ~~ 算啦, 天意. 一場嚟到, 冇理由立即起身走人咁樣衰㗎, 唯有搏一搏, 睇睇吓, 又唔係咁不堪, 都有 70-80% 明嘅.

結果點呢 ? 

交吉記

 

五月尾, 舊屋臨搬之前業主 ( 三十幾, very nice guy but 識投胎, 老豆老母幾層樓畀佢收租 ) 話帶兩個師傅上嚟睇吓間屋可以點裝修得唔得, 當然 ok 啦.  

打開門有 5 條友, 3 個師傅 + 業主兩兄弟.

同年紀最大嗰個叔輩師傅講 : " 你哋隨便睇隨便度 ( 尺 ) 啦, 啲房全部都入得㗎. "   10 秒後阿叔原封不動, oh...... S H I T 😱 ! 瀨咗嘢喇, 原來阿叔唔係師傅而係業主個老豆 😂😂😂 !!!  哇, 真係攞你命 3000 尷尬到一個點 !  不過唔怪得我, 住咗咁多年業主都係同細佬阿媽上嚟, 老豆完全冇露過面.  

扮鎮定當冇事發生, 老豆亦好快扯開話題, 多謝我住得間屋咁新淨, 答佢可能之前勁飛, 少接觸啫 😆.  

佢哋覺得環境好舒服, 我絕對同意, 不過鄰居就怪咗啲囉 :  

1. 左邊對夫婦女嘅近年應該有情緒病, 成日歇斯底里鬧老公 / 掟嘢, 掟到啲牆彭彭聲 ; 

2. 右邊嗰間 🌈 仲激, 早幾年三更半夜玩跳樓, 見過幾次報添.  

3. 遠啲嗰個單位有個 [ 大喊十 ], 成日喊仲喊得好大聲, 條 BB 係屋裡面喊就算我閂埋門都聽到 !  由出世到而家喊足一年都未收聲, 一出門喺𨋢口又喊, 返到屋企喺門口又喊, 好 Q 煩.

真心唔係嚇, 係善意提醒, 希望佢哋有定心理準備.

業主細佬 ( 廿歲出頭 ) 好醒𥄫到我幾箱準備搬走嘅酒杯 : " 阿哥都好鍾意紅酒㗎 ! "  我話 : " 咁啱嘅 ? 我都好鍾意飲酒㗎, 酒真係好好飲㗎 ! "

結果, 6 月 15 號正式交吉, 業主 3 父子送咗支過千嘅法國紅酒我.

祝願業主住得開開心心, 平平安安🎊🎊

睇樓記 III

運吉完幾間騎呢屋, 輪到睇個同舊屋

一樣坐向但細啲嘅兩房一廳單位.  打外門, 景觀開陽感覺良好, 廚房仲有個大窗, 可惜兩間房入面頂天立地深色全高入牆櫃大剎風景 ( 睇相唔覺, 現場真係好有壓迫感 ) 😶

廳嗰兩支天花燈仲搞嘢 : 蜘蛛鬥蜈蚣 !!! 😦  咩料呀 ?!

同 [ 地產 ] 講間屋 very ok, 但啲奇形怪狀配置真係接受唔到, 可唔可以幫我問業主, 租客 ( 我 ) 自費拆走, 租約期滿按現狀還完得唔得 ?

結果 [ 地產 ] 嘅答案*, 激發我做咗另一件更騎呢嘅事 ( 後話 ).

1. 如果你打算拆除屋內某啲裝修但之後將會按原狀還完, 根本冇需要知會業主.   

2.  租住期內, 除非得租客同意, 業主係冇權入屋.

噢, 原來係咁, 長知識 💡.  其實已經再冇其他嘢想問, 點知 [ 地產 ] 突然主動提出 : 物業業主有三個人, 其中一個已經過身, 不過唔駛驚, 佢唔喺屋裡面拜拜 😅    

確實有驚喜, 打破我一直對地產佬嘅印象. 

接下嚟嘅文件, 簽約, 爭取特長免租期, 執漏, 好多好多 follow up, 雖然租約佣金冇肉食, 但 [ 地產 ] 都跟得非常足.  心諗, 條友幾有 heart 喎...... 後來網上起底, 原來 [ 地產 ] 甚有來頭, 喺行內攞過唔少獎, 點解會服務我啲呢客 ? 唔知呀.

結果, 拆 Q 晒 😆

睇樓記 II

再戰睇樓第二回合, 目標包括現居屋苑, 同隔兩個山頭嘅玖瓏山.

玖瓏山租盤較多, 可惜全部唔連車位, 就算肯另外比錢租都 6-7 千蚊一個月, 仲要 waitlist 排隊, 黐 x 線 !  發展商 planning 差, 車位單位比例 1:2 ( 即兩戶爭一個車位 ), 住呢啲隔涉地方冇車出入, 玩人咩.

住緊嘅屋苑不嬲租盤極少, 好難得先搵到兩三個睇吓, 有一間冇鎖匙要等姐姐開門, 點知條姐姐唔知屙屎定 ' 吞噗 ', 我哋約好 3pm上到樓喺門口乾等咗成 5 分鐘㩒極鐘都冇人應 !  後來仲因同層唔知邊條 pk 住客投訴, 話有不明來歷人士逗留而被看更趕番我哋落地下大堂 😡😡😡

我同地產講, 唔睇喇 ! 佢好慘咁話 : 不如試吓 call 業主啦. 好...... 畀面你.  結果喺大堂呆等 15 分鐘, 𨋢門開啟, 條姐姐面露尷尬終於蒲頭, 原來出咗去躝街放我哋飛機 !!

沉住度氣入屋, 眼前一遍亂像, 成屋雜物行都行唔到 !  Diu~~ 啲人究竟係咪有心放租㗎 ?! 😠

佛都有🔥, 呢間屋, 30 秒睇完, 走人 !

 

下一間面積同價錢都 ok, 地產話業主仲特登裝修間屋, 開門一睇, 裝修師傅正在 work in progress, 業主 " 品味 " 驚嚇離奇.

咩設計嚟㗎 ?! 玄關天假花金字塔形設計 😂  好地地唔知做乜將啲木門油晒光面啡色, 無啦啦又整個框去框住部電視, 仲要係手工奇差, 小學生勞作都靚過佢.

啲紙皮石顏色同圖案都咁 Q 核突, 夠竟喺邊度搵番嚟 ?

最致命係客廳中間天花個 " 血滴子 " 吊扇連天花燈, 唔知點解近年好興, 其實係風水大忌 ! 日日坐喺下面睇電視, 唔死一身潺.