五月之暴食 II

 

好慶幸, 今次曼谷之旅同行都係大膽之輩, 所以可以食到地踎嘢.

主打牛雜邊爐, 但亦有小量豬雜供應, 我哋好癲 38-40 度熱屎辣辣走去 lunch hotpot, 但原來同我哋同類嘅痴漢都不少, 差不多成兩點都竟然要排長龍, 好彩最後唔駛等好耐就有枱. 

嗰度應該已經黃咗, 香港遊客有幾枱 ( 包括我哋 ), 另一半就係當地泰國人, 各人目標一致 : 風味炭爐火鍋 😙 

我哋點嘅牛肉湯底好似檸茶咁清徹, 一啲都睇唔出原來味道非常濃厚, 但同時又散出陣陣泰式香料幽香, 實在令人無法抗拒, 邊爐都未開始打就飲咗 1/3 😂 

佢啲豬牛雜配料最貴都係 HKD 15 碟, 粉麵一碗 HKD 2.5, 好似話近期已經加咗價之前仲平. 

講真, 嘢食真得, 而家都仲記得佢牛肉湯底個味. 

地方殘但一啲都唔污糟, 仲有 girl 造型齊陰髮型哥哥仔熱情招待, 呢間係會推薦俾 ( 唔怕熱同唔怕地踎 ) 朋友嘅, 個名叫 [ 王春盛 ], 自己搵啦 !

五月之暴食 I

自從轉 team 做澳洲 project, 一日到黑開 call, 成日坐搞個人肥 Q 晒, 胃腩肥腰一發不可收拾, 諗住五月尾去泰國前作最後衝刺, 減吓肥等著泳衣嗰陣冇咁羞家, 不過唔駛講都知結果徹底失敗咗啦.

同行友人以前喺曼谷住過幾年, 今次食殘廢餐, 任由佢哋全程擺佈租車四圍去.  太耐無玩點到點旅遊, 差啲忘記咗成件事可以有幾正👍 : 唔怕熱因為唔駛曬, 唔怕攰因為唔駛行, shopping 更加要盡情發揮, 因為唔駛再扐住啲重嘢行九條街搭車返酒店.

曼谷除咗食玩瞓買, 我哋仲出城去咗春武里府 Chonburi + 芭堤雅 Pattaya 一日遊.

Friend 話喺 Chonburi  book 咗食 omakase, 吓...... ?  

原來係好嘢, 餐廳喺一間位處沙灘對住大海木屋嘅二樓, 非常有特色, 我未食都已經比咗 70 分佢 😆.  

入到去一望個 sushi bar, OMG !!! 180 度 panorama 全海景, 點解可以咁㗎, 激動到差啲嗌咗出嚟.  我見識少, 喺咁環境食 omakase 咁大個人真係第一次.

可能希望客人由頭到尾欣賞日落景緻, 餐廳要求所有人 5:30pm 入座, 對我哋嚟講真係有啲早, 下晝嗰餐都未落隔.  

𥄫吓餐牌, 哇 ~~ 16 個菜 😅 以我當刻飽脹程度頂多食到 10 個, 搞唔掂嗰啲唯有靠朋友幫手食埋.  

開頭懷疑會唔會靠個海景嚟分散客人注意, 啲嘢食就求求其其.  哈, 我錯, 完全錯, 泰國人師傅做嘅各種壽司都非常正宗, 魚生又新鮮, 個人覺得甚至可以媲美日本師傅 ( 除咗頭盤, 意粉, 甜品, 應該係助廚做, 所以口味好似爭少少 ).

大約 7:10pm 啱啱天黑所有菜已經上齊, 美女侍應開始同各人埋單 😂😂 , 真係有啲早.  成個配套加埋食物環境招呼, 原本比 90 分, 咁趕而家扣 5 分, 點知望吓張單每人只係 1,011 港紙, 實在太抵食, 又要加番 10 分.

結果呢個地方我比 95, 好高分. 

https://www.instagram.com/sushi_kaijou/

法國五月

好懶, 五月過咗成大半先嚟寫 blog, 今次再講飲食連環不幸事件.

話說尋晚喺上環差館上街食法蘭西菜, 裝修骨子地方細細, 頂籠得 16 個位. Chef's counter 最佳位置望住廚師們搏鬥本應十分過癮, 可惜餐廳兩部冷氣壞咗一部, 我哋座位近貼廚房爐火, 唔夠幾分鐘已經熱到底褲都濕埋.

5 度菜 tasting menu 口味過分豐富, 每碟至少用到 8-12 種不同食材, 天花亂墜太 complex, 不過最後回味, 都算好味可以收貨嘅, 但食過今次就真係冇回頭, 點解 ? 因為條西面侍應囉 ! 

前因係當日公司附近食晏, 瀨嘢叫咗條勁難食嘅炭燒北海道花魚, 炭都未燒紅就夾硬擺條魚落去燒, 燒到唔生唔熟, 魚肉苦兼超級腥, 搞到成個下晝都有啲反胃. 

法國廚師示範單眼

後果咪夜晚無福消受法國佬嗰個 tasting menu, 食到第 3 碟已經開始食剩, 點知比條八婆侍應用質問語氣問我點解唔食晒, 仲西晒面好嬲咁收走隻我碟 😡 !  

餐廳食剩嘢要同侍應交代真係第一次, 廚師成晚企正我面前都未出聲, 條八婆都唔知嬲乜春.  超 ~ 你嬲, 我都識嬲囉, 同枱朋友見勢色唔對暴風雨前夕, 出口制止我發圍, 叫我由得佢, 話條女之前 serve 佢哋都經已係目無表情黑口黑面.

影低佢個厭世 look

今次, 又再多一個理由令我離棄法國.

又食又賭

澳門做嘢去過 N 咁多次, 真正去玩次數極少, 三隻手指數得晒.   啱啱星期一請咗日假同馬友經港珠澳過大海, 以為係美食之旅, 去到先發現同行嘅只係一心諗住去賭. 中國人, 真係好鍾意賭錢.

賭唔係咁啱我, 但唔通自己返香港先咩 😆, 唯有跟大隊啦.  一落車先去營地街市覓食, 整缽 [ 梓記 ] 牛雜開心 share, 牛雜有嚼勁, 搭配秘製辣油我覺得認真唔錯, 可惜同行前輩唔係咁欣賞, 搞到我同帶路朋友都唔好意思再出聲.

呢頭先食完牛雜嗰頭又話食晏 😂  幫襯爐石塘巷 [ 毛記 ], 阿姐熱情招呼介紹生猛海鮮, 可惜我哋趕住去賭 😄, 最後只叫咗 3 碟小炒 : 雞蛋蒸魚腸, 炒鮮魷, 上湯菜心. 帶路朋友懶神秘, 問我哋飲唔飲 " 湯 ", 我話唔飲了, 彈牛雜唔掂嗰位前輩起初都大大聲話唔飲, 但當得悉 " 湯 " 原來係 " 紅燒飽翅 " 就立即轉軚話飲 😂    

呢間 [ 毛記 ] ok, 全部嘢都整得好好味, 埋單仲只係 $320 超抵 👍.

食飽有氣力連走兩個場玩百家樂, 帶路朋友話策略係 " 見好就收 ", 結果佢一坐低喺賭枱就起唔番身 😂.  

原本頭段有唔錯斬獲 ( 30% gain ), 唔知搞乜明明已經起咗身, 望吓望吓竟然又坐番落第二枱再賭過, 接住第三枱, 第四枱......  攞咗彩就好走啦, 結果輸凸晒喇 ( 60% lost ).

好彩我一早割禾青冇喺賭海沉淪, 所以係佢哋當中唯一可以贏錢嘅 😅  

財散人安樂, 帶路朋友建議去黑沙灘 [ 美麗華 ] 食葡國菜, 間嘢除咗有個沙灘靚境之外, 唔明點解會係網紅店囉. 

招牌乳豬雖然皮唔脆肉唔嫩, 至少個樣都似番隻豬. 碟牛扒, 賣相口感同樣驚嚇, 如果要我解構 : 應該係塊用生粉醃過夜鬆到鬆無可鬆嘅肉, 汆完水, 煎熟兩面, 跟住放隻煎蛋加啲同碟底血水融埋一 pet 嘅薯菜就賣俾人食嘅黑料理 !

對住呢啲劣質食物, 無言. 成晚除咗飲酒, 我只係食咗啖難食到吐番出嚟嘅牛扒, 一塊乳豬, 半隻煎蛋同兩條菜. 呢間 [ 美麗華 ] 我一定會推薦俾仇家食.

餐廳進化論

本應天真可愛, 8 歲嘅我早已洞悉天機 : 講大話, 必須 make sure 自己往後喺任何情況下都要記得之前講過啲乜.

人受教訓先會學懂, 8 歲嗰次經歷其實都唔算乜教訓, 只不過係忘記咗自己講過關於一份生日禮物無關痛癢嘅大話, 幾日後因同學問咗個小問題而發現我前言不對後語當眾踢爆 ! 人生第一個尷尬, 特別刻骨銘心, 所以年小嘅我就此決定以後如果要講大話就要 pro, 一定要緊記細節, 不能露出破綻.  

呢個諗法孕育出兩個優點 / 缺點 : 

• 唔鍾意講大話, 因為記 details 太攰
• 時常處於有機會講大話嘅警惕狀態, 鍛煉到記性比一般人好 😂

寫咗二百幾字前奏, 要入肉分享前言不對後語連朋友都講到自己當咗係真嘅大話兩則, 咁啱都關於食.

前言不對後語 #1 - 車仔麪餐廳

車仔麪中學時期已經愛上, 當年食極唔肥三兩日就食一大碗.  至愛組合 : 魚蛋 + 牛腩 + 豬紅 + 紅腸 + 牛筋 + 通菜 + 油麪 + 腩汁, 搏晒命勁落辣椒油, 嗰種辣到飆眼水流鼻涕要攞 tempo 抹嘅攞命 feel, 勁正.

朋友 A 話佢阿媽做車仔麪養大佢兩姐弟, 每朝 5-6 點起身預備各種配料開檔好辛苦.

近年 A 似乎忘記自己講過阿媽做車仔麪, 改口話 ' 媽咪 ' ( 叫法都改埋 😆 ) 開餐廳所以識煮好多好嘢, 搞到自己對食非常有要求.  車仔麪檔忽然變餐廳 😆😆😆 !  前排出街食飯嫌人花膠薄, 話同 ' 媽咪 ' 整嗰啲塊塊 1cm 厚成大盤上嘅靚膠完全冇得比 !  哇, 會唔會有啲 over 咗 ? 就算李嘉誠屋企都唔會成盤成盤花膠咁食啦.

前言不對後語 #2 - 茶餐廳飲食集團

朋友 B 年過 40 單身多年, 上年年中同我分享愛情疑惑, 話比條其貌不揚但同人夾份開茶餐廳嘅肥仔溝緊, 問我點睇, 車 ~ 我又冇見過條肥仔, 點知啫 ?!  

但根據 B 平日擇偶要求 : 有樣 + 有樓 + 有靚車, 諗住肥仔冇機啦, 點知肥仔兩個禮拜後竟然變咗 B 口中嘅男朋友, B 仲周圍同人曬話自己男朋友搞飲食集團 😆😆😆.  咁快升呢茶餐廳變飲食集團, 唔通 B 真係咁旺夫 ?! 😜  我勁賤玩踢爆當眾追問係邊個集團，睇吓去食嘢有冇 discount ? B 連肥仔飲食集團個名都噏唔出, 好明顯喺度講大話. 其實, 茶餐廳又有乜咁失禮呢 ?

食神你快 D 復活啦

Cheers 🍾🍾🍾   有冇留意 ? 我同時飲緊兩杯檳 😂

唔知係咪今個月八字四柱食神受沖 ( 我兩柱都有食神 😆 ), 剛過去嘅禮拜光顧多間高級食府都失望而回.

小食神食到成晚冇晒表情嘅 tasting menu

其中幾接受唔到係中環一間 ' 四個相同數目字 ' 嘅中法 fusion 菜, 上年十二月尾第一次去食晏, 港式食材配合法蘭西烹調手法實在令人刮目相看, 朋友讚不絕口堅持要再返去食 dinner, 三月頭訂枱, 復活假期前一晚邀約埋小食神打算同佢一齊食好西. 

估唔到餐廳而家跌晒 watt ! 

左下角 : 九唔搭八網燒花膠 . 嘥料 😒

千祈唔好誤會, 跌 watt 意思唔係話佢唔好味, 而係我哋食到嘅, 只係一啲擺盆精緻但冇乜 character 嘅西餐, 唔知主廚係咪放咗復活假定心情唔靚, 總之之前驚艷中法 synergy 今次完全消失於無形.

復活假期另一個不爽 : 上星期五喺東涌 Sheraton 食 lunch, 唔好問點解要走到老蓮咁遠食, 我只係跟大隊, 去同十年冇見外地回港主打遊迪士尼嘅舊同事一家見面, 因為住迪士尼酒店唔方便出市區所以要就佢哋.

原本諗住打的去, 但成三百蚊車錢又覺得肉赤, 結果 on9 地用時間買金錢走去荃灣搭 E32A ( 市區直達東涌巴士 ), 點知去到巴士站送車尾 😠   懶醒上咗尾隨嘅機場巴士, 以為可以喺機場搭大嶼山的士去東涌.  

點知喺的士站等咗成 10 幾分鐘連車影都冇, call 的士 app 冇, 的士台又冇, uber 仲冇 !!  聽職員老點搭巴士...... 行到去巴士站又送車尾 😡, 巴士啱啱開出下班要再等 45 分鐘 !  大佬, 食餐晏啫, 玩到我咁盡.

終於等到接駁巴士

入咗機場結界又餓又攰, 發脾四如果再搵唔到其他途徑去 Sheraton 就回航返屋企 !  最後打去酒店問, 佢哋話有接駁巴士但要等多 30 分鐘 😠.  

由早上 10:30am 出門口直至到達目的地成兩粒鐘, CLS 真係台灣都去到! 坐低當刻不斷催眠自己要抑壓憤怒, 同埋無論食物味道如何都一定要覺得 ok, 如果唔係, 之前出咗嘅力氣同時間就白白浪費.  不過最後餐廳質素係 very ok 嘅, 但下次要山長水遠入去 ? 咪搞. https://www.facebook.com/MaisonDuMezzehk/

法國名廚龍蝦粥

復活假期最大打擊 :

都感覺到近排冇食神㗎喇, 估唔到可以差成咁, 今日晏晝口痕諗住試吓某 ' 法國名廚 ' 出品嘅即食龍蝦粥, 結果係有記憶以嚟最 Q 難食嘅粥.

根本就係龍蝦水溝白粥, 注意 : 係龍蝦水, 唔係龍蝦汁或者湯 ( bisque ), 零調味.  好少嘥嘢但真係頂唔順, 試咗一羹已經再食唔落口, 成碗請咗屎塔飲.  

唔明點解呢個味如嚼蠟嘅產品 ' 法國名廚 ' 可以攞去賣 ?!  今日上 HKTV mall, 發現佢全線貨品已經下架, 點解嘅 ? 我都未寫負評 😆

最貴的一杯香檳

過咗嘅星期五 31 Mar 2023 係乞兒 ( 舊老闆 ) last day.  好嘢, 終於唔駛再見到條廢柴篤眼篤鼻 ! 

乞兒其實三日前已經閃咗冇再返 office, 最賤係明明約咗隔離部門開會 ( 注意 : 係佢自己約人嘅 ), 但竟然粒聲唔出放晒人飛機搞到成 team 坐喺 meeting room 空等一場 !  好心佢死就死遠啲, 臨尾都做埋啲衰格行為影衰我哋部門.

不過我哋部門自己都係好有問題唔抵爭, 最大粒個阿頭唔知係咪飲咗乞兒迷湯, 竟然喺公司炒咗乞兒後立即又請番佢做 consultant ! 乜冇 conflicts of interest 咩 ?!  仲要叫佢搞埋啲完全同公事無關九唔搭八嘅環保撚嘢, consultancy fee 仲一定高過佢之前份糧, 真係冇天理 !  

得知呢個決定唔止我一個人血壓爆升, 同事們都嘩聲四起, 大家覺得部門係咪真係咁黑暗, 廢人當道垃圾到呢個田地.

好彩收到風, 上星期被乞兒放咗飛機隔離部門個老闆 ( 方丈 . 小器系列 ) 去咗集團總部 compliance 舉報環保撚壇嘢, 擺明要打爛乞兒個乞兒缽 😂   而家, 我可以做嘅, 就係買定花生爆谷等睇戲.

設計圖片

樂極生悲 :

上星期五晚斟咗杯比平時特大杯嘅香檳上網睇片慶祝, 突然個 wifi speaker 窒吓窒吓, 諗住起身去㩒 restart 掣之際, 重大災難發生 !

Restart 完個 speaker 竟然手踭撞到杯檳, 將一整杯完全未飲嘅檳淋晒落 keyboard 度 😆, 跟住我都有盡力跑去廚房攞紙巾去力挽狂瀾, 雖然部機仲着但個 mon 已經完全熄滅, 當刻心知不妙, 部機應該 bye 9 bye 了.  

整佢個制, 上年十二月先出機, 估唔到咁快就打柴, 仲要係我親手 KO !  xy#@z...... 愈諗愈㷫, 成晚都瞓得唔好.

尋日喺蘋果維修, staff 拆開部機睇後問我有冇買家居保, 冇喎......  跟住佢就俾咗嗰好 subtle 嘅節哀順變表情我 😂  最後唯有即場出過部新, 趕住用, 冇辦法.  

近期打邊爐打得太密, 太熱氣兩邊鼻翼都各爆咗粒又紅又腫嘅破財大瘡, 以為買對 channel 鞋可以化解啦, 原來要仲要買多個蘋果先得 😡.