貪字得個𤓓

 

尋日終於都有人陪我顛, 上咗半島 x 天星小輪食 tea.   

呢排天氣同我心情一樣非常之唔穩定, 好在最後天公造美冇落雨, 藍天白雲欣賞維港景色, 喺開天窗嘅小輪裡面涼住冷氣聽 live band, 扮晒優雅嘆下午茶, 原來幾爽.

訂枱二人起跳, 每位 $825, 唔平, 但我覺得又唔算好貴, 半島喎. 

出發前朋友懶緊張問我著咩衫, 駛唔駛呀...... 我話搭船呀而家, 著泳衣啦 😂😂😂 !

 

上到船眾人超 hyper 個個大擘喉嚨講嘢, 真係嘈到頭痛, 好彩一有得食啲人就收聲.

我唔係英式下午茶 fan 屎, 因為三層有兩層我唔食好嘥嘢, 尤其頂層甜點, 不過今次破例, 因為啲水泡、船錨同小輪造型嘅糕餅, 實在太 cute 😍    

底層半島名物 scone ( 英式烘葡萄鬆餅 ) 加埋香檳, 肚內麵包發水, 食一個已經飽咗 9 成 😆.  

四款鹹點其中嘅青瓜三文治, 可能冇肉我覺得普通, 反而吞拿魚 + 鹽漬鯷魚 + 義大利包組合, 好鮮香, yum !

飲飽食醉唔係等屎屙, 而係茶舞時間 😂, 歌手現場演唱多首老歌, 唱 Can't take my eyes off you 嗰陣搞到班老嘢走晒出嚟齊唱齊跳, 三唔識七攬埋一舊係咁 I love u baby !  呢個畫面令我打咗個冷震, 簡直係郵輪困獸之鬥預演, 幸好就快可以落船.

是日 highlight, 竟然係遠在天邊近在眼前嘅 friend, 坐低冇幾耐已經諗點樣可以撻走梳化個綠色 cushion, 話早知攞個大啲嘅袋嚟 😨   雖然現實中做唔到, 但我知佢真心想實踐呢個行為, 因為佢試過扐個 500ml 空樽入酒店 spa 泵晒人哋成支沐浴露走. 

都知佢冇咁易罷休㗎喇, 唔食啲甜品原來係打算臨尾攞走, 點知經理話因為糕點會溶所以唔得, 好肉酸同人拗堅持要 pack 走, 經理一句酒店 policy KO 佢. 唉...... 真係自己搵嚟𤓓.

西九韓食

尋晚靠朋友嘅朋友嘅關係, 走後門 book 到一枱難求嘅二星 Mosu, 同小食神預祝生日. 期待已久, 好彩整個體驗都冇令人失望.

 

Mosu 位處 M+ 三樓平台, 設計時尚, 最鍾意佢完全冇多餘裝飾, 落地玻璃盡覽西九景致, 空間感十足, 符合個人口味可以俾幾個 like 👍 .  

踏進餐廳門口, 要經過金魚缸 show kitchen 先可以進入用餐區, 奇怪地, 廚師們個個都戴住耳機嘅 ? 應該唔該係俾總廚遙控緊掛 ?!

主廚發辦餐單只得一個選擇, 冇標價, 剩睇 service 同排場都 sense 到收費應該唔嘢少, 最後連埋飲酒, 張單果然真係超級甘 😁

話就話韓國菜, 其實係韓式材料用法國 haute cuisine 手法烹調.  講過多次唔 buy fushion 菜, 除咗 Ando 呢間可以算係例外, 仲例外到可以再返轉頭嗰隻, 除咗其中兩個主食啦 : Sweet corn tofu in ajoblanco ( 甜粟米豆腐海膽 ) 同 Ember roasted acorn noodle ( 黑松露橡子麵 )...... 唔係唔好味, 只係唔啱個人口味.

Small Bites - ( 順時針左上至右下 ) 紅菜頭鵝肝醬 . 腐皮鮑魚 . mushroom tart . 甜生蝦薯仔沙律紫菜卷

前者海膽本身冇問題, 但用粟米豆腐嚟包住就似甜品多啲, 奇怪組合.

後者橡子麵非常慷慨超大量黑松露鋪面, 俾著一般人應該會十分欣賞, 但不幸地我最驚黑松露味, 試咗啖麵, 陣味實在太濃郁, 有怪莫怪, 之後成碟冇掂過完全食唔落.  黑松露令我聯想起夏天做完運動臭狐人嘅強烈臭狐, 仲要係人已經離開但陣味都迴盪不散嗰隻.

Main Courses - ( 順時針左下至右下 ) 黑芝麻海鰻 . 風乾 1++韓牛 focaccia . 甜粟米豆腐海膽 . 蜆肉 1++韓牛 striploin . 黑松露橡子麵

主菜同最後嘅甜品當然樣樣都超水準啦, 但成晚印象最深刻最能夠令我回味, 反而係頭盤 ( 4 個 small bites ) : 甜生蝦薯仔沙律紫菜卷, mushroom tart, 紅菜頭鵝肝醬 同 個炭燒腐皮鮑魚 ! 我唔食鮑魚, 諗住俾吓面咬啖就算, 點知佢哋做到鮑魚外脆內軟, 最後都忍唔住食晒.

Sweet Bites

別來無恙的一餐

今次真係寫食嘢喇 ! 

餐廳面積不大 . 只做 8 枱客

香港好多米芝蓮都好味嘅, 但大部份食完一行出餐廳就已經冇印象, 能令我念念不忘, 中環威靈頓街 Ando 同 PMQ Louise 一定冇走雞.

tasting menu . 好彩冇再加嘢食

兩間都唔平, 但 Ando 比較少去, 因為佢哋冇 a la carte, 如果一大班人個個都食一模一樣 tasting menu 好似有啲悶.

5 道菜 lunch tasting menu . 飽到痴肺

上禮拜五, 難得有人唔駛 do 得閒 ' 和我 lunch 😆 ', 久別重逢成兩年冇去, 好在都未至於人面全非, 起碼之前認識嘅廚師 Augustin 同餐廳經理兼侍酒師 C. Chiu 都仲健在.  

阿根廷 x 日本, 一濃一淡竟然可以和諧配搭, 粗幼有序, 上菜過程儀式感十足, 除咗樣靚仲有內涵, 無論 texture 味道同層次都非常鮮明, 味覺衝激浪接浪 !  絕對唔係而家啲所謂高級餐廳整嗰啲嘩眾取寵, 紅橙黃綠青藍紫十幾廿種材料, 又生又熟撈埋一碟, 食完會係肚裡面爆炸嘅合成品.

至愛 caldoso rice

去 Ando 最大誘因, 當然為我的至愛 : Caldoso Rice ( 湯飯 )💗💗. 今次配搭新鮮彈牙 baby squid + 切成 3mm 小粒西班牙辣肉腸 + 海鮮濃湯底, 上枱時淋上一茶匙羹雪莉桶熟成日本清酒, 錦上添花. 天堂的味道, 諗起都想尖叫 ! 

argentinian beef

阿根廷牛肉香味四逸, 不過份量實在太大, 一塊俾我直頭夠分 5 餐 : 早 . 午 . 茶餐. 晚餐同消夜嚟食 😂  

除咗食物, Ando 點解會連續 3 年攞到米芝蓮呢 ? 應該係優質服務, 佢哋員工係我喺香港見過比較細心盡力嘅.  最近例子 : 食客掛係椅背件褸跌咗落地, C. Chiu 見到, 唔係通知客人件衫跌咗落地 / 執起俾番佢, 而係不動聲色用衣架掛起後直接放入衣櫃, 完全冇打擾到客人.

侍酒師 C. Chiu

C. Chiu 呢個 action 應該冇其他食客發現, 但我就親眼見證乜嘢叫 added value.

食我. 住我. 着我

Blog 友回饋鍾意有關飲食話題, 今次一於順應民意, 講吓軟飯.

男士有時會半講笑, 話想搵個富婆包養自己, 唔知最後有幾多人可以夢想成真, 但身邊就確實出現咗一個有女人養嘅成功 例子.

其實我冇直擊 例子 點樣邁進佢嘅成功之路, 識佢嗰陣已經埋街食井水, 同咗個大幾年 + 叻過自己嘅日本女人結婚, 仲生埋女. 一聽到日本妹三個字, 港男羨慕又妒忌吧 !

而每次認識新朋友嘅時候, 例子 介紹自己嗰陣就會曬命同人講自己老婆係日本人, 仲樂於分享被包養細節, 例如 : 老婆會全權負責住宅租金, 包括所有買餸開支同女兒學費, 連全家每年一度返日探親同去其他地方嘅旅費, 都係老婆找數 !  

堂堂男人只負責水電煤雜費, 打理家頭細務, 日常煮食, 餵貓同每日一次吸貓毛 😂, 但唔包括揍女, 因為個女唔黐佢 😂😂.  話自己老婆係女強人, 非一般日本女生, 一啲家務都唔鍾意做, 一啲嘢食都唔識煮 😆   呵 ~ self explanatory 身材肥大, 外表平凡又冇乜才 / 財氣嘅 例子, 點解咁都可以娶到個日本婆.

原本都唔覺得咁鄙視, 一個願打一個願捱之嘛, 點知有次 happy hour, 例子 同我講老婆叫佢不如唔好做嘢, 而佢竟然又認真地考慮辭工等老婆養 😨  ( 註 : 老婆唔算係女強人啦, 年薪都未過百萬 ), 條友果然真係堅冇出息 !  就算我係女人, 有佬話肯養都會諗過先啦.

片尾彩蛋🥚 

例子 其實就係跑馬問我借筆 http://shirliek.blogspot.com/2023/07/blog-post.html, 俾我咆哮嗰條木咀 😆😆😆

風水 ETV

今次又講大迷信, 不喜勿插.

基本上所有關於怪力亂神同玄學術數嘅嘢我都唔會放過, 尤其關注 So 師傅多年來與不同電視平台合作嘅節目 : 由當年有線 "「峰」生水起精讀班, 民峰學院 ", 到無線 " 順峰順水, 民峰而至, 新春開運王, 搵陣 ", 全部都有捧場, 咁當然又冇咁神心所有集數都睇啦. 

而今次 J2 嘅 " 開壇 ", 我覺得有啲料到.  

第 27 集開始 So 師傅教風水, 比起以往佢叫人擺杯水, 水旁邊擺個音樂盒, 廁所擺大葉植物, 病位放英女皇頭硬幣, 門沖就吊兩棵植物化解之類, 今次竟然係堅教, 內容仲係出面要俾錢交學費上堂先學到嗰隻, 認真賣大包 !  不過佢講得好快, 加埋佢手鬼畫符字, 三不像唔知係 2D 定 3D 嘅圖像, 唔知有幾多主持觀眾睇 / 聽得明. 

講開主持, 一路睇, 一路戥佢哋辛苦, 除咗個男嘅 ( 註 : 就算佢話之前學過吓, 又唔見佢特別醒 😆 ), 其餘港女最初連金木水火土五行相生相剋都唔識, 乜都靠死記, 開頭還可以, 但跟住每堂大測小測俾師傅問到口啞啞, 個個拉牛上樹一啲娛樂性都冇, 好心監製就唔好再嘥觀眾時間, 做馬俾稿佢哋背嚟答算把啦.

話雖如此, 好彩自己有啲底, 睇 " 開壇 " 就攞到著數, 直頭好似上補習班咁, 以 So 師傅今時今日球球聲嘅收徒定價, 如果要交學費應該要交幾皮.

大迷信 2023 再加篇

 

近日華語天后突然逝世, 消息震撼之餘又惹來一眾神棍瘋狂抽水, 說什麼逢 3 字尾屬癸水年份就係娛樂圈魔咒, 啲人應該係翻抄李丞責 10 年前東周文章 https://eastweek.my-magazine.me/main/27335, 更有位自稱師傅嘅無恥之徒, 食人口水尾, 將報紙參 ( 抄 ) 考李博士嘅全文, 一字不漏地搬字過紙擺落自己 FB 度當係自己寫, 當睇嘅人係白痴.

早幾日跑馬跑死馬又小題大做, 某師傅話馬會開鑼日擇咗喺破日, 所以不停出事. 

泰坦號失蹤多日, 又有人開局預測話會找到屍體, 結果一有報道話搵到疑似人類殘駭就立即對號入座, 喺 FB show 自己同學生 whatsapp 對話 ( 仲開晒人哋全名 ), 但睇嚟睇去, 都係啲摸稜兩可嘅對答啫.

黃鴨爆仲搞笑, 有人話係凶兆, 有人話爆鴨係幫香港擋煞, 咁即係點呢 😆 ?

 

不過我覺得終極勁, 係某師傅出品嘅仙水, 睇佢 FB post 出嚟嘅用家回饋 ( 見下圖匯編 ). 哇 ~ 仙水效能非常神大, 噴完可以 : 

• 中六合彩, 中獎, 中馬, 贏波, 贏麻雀, 收到街數
• 搵到工, 搵到仔, 請到伙計, 升職, 加薪, 開到單, 考試 pass
• 放租成功, 業主減租
• 講電話過馬路冇俾車車親, 周街食煙冇俾人捉
  
• 皮膚靚咗, 止痕, 好瞓咗, 老豆隻腳好咗, 幫到個女退燒, ( 連老公醫生都搞唔掂 ) 但一噴咗就有 BB 😂😂
• 家庭和睦咗, 老公溫柔咗 😂😂😂
• 買到 Mirror 演唱會靚位飛 😂😂😂😂

咁犀利都唔駛一百蚊支, 好吸引 😍  

 

 

賣出咗咁多仙水令成村人受惠 / 孕 😂, 師傅現在應該有足夠本錢聘請更多打手, 令嚟緊嘅用家回饋無論從文字風格, 語調, 格式同 emoji 用法上, 都冇咁雷同, 兀突同巧合囉.

咆哮快活谷

師傅睇八字話我鱷魚頭老襯底, 識得我耐嘅人又話睇我個樣好惡好得人驚, 但相處落個人好 nice 反差大.  錯 ! 點解唔相信自己第一靈感呢 ?  其實我真係惡同唔 nice 囉, 又小氣又計較又專橫, 只係善於掩飾, 喺平常嘅日子冇發洩出嚟啫.

上禮拜三賽馬日, 部門同事主動要求 book 枱入場賭馬, 當晚全男班出席, 陽氣十足.  真係好耐冇入跑馬地馬場, 連餐廳 staff 都笑我成三年冇嚟 😆,  車 ~ 我夠想場場嚟啦 ...... 又疫情又運動, 嚟到先得㗎, 又唔知自己啲枱難 book.

自從做咗澳洲 project 逢星期三就好多會開, 因為老闆勁鍾意同啲澳洲鬼吹水, 成班人愈講愈得戚, 但每次都係 " 講就天下無敵, 做就無能為力 ", end up 完全冇結論冇進展, 所以一到馬場坐低, 整個人已經陷入燥底狀態 !  

坐隔離條肥仔買棺材唔知埞, 話自己冇帶筆想同我借, 一聽到 " 借 " 呢個字就立即著咗 🔥🔥🔥 !  做 design / project management 呢行, 身上竟然連一支筆都冇 ?! 真係好唔 pro 死得囉.

同埋我入場極之棹忌人哋同我 " 借 " 筆或者攞自己做咗功課嘅馬報嚟 " 抄 " 考, 之後啲運就過咗俾人, 會變咗人哋贏自己輸 !  

條肥仔唔識死問我借筆, 一字記之曰 : 嬲 😡😡😡😡😡😡 所以唔好怪我未開跑就當眾咆哮, 搶先同佢開齋 : " 有冇搞錯呀, 做呢行唔帶筆出街你點搞㗎 ? 你唔好用我嗰支, 你自己去 counter 問人借啦 ! "  

我咁躁狂, 全同枱同事包括肥仔本人可能 / 應該 / 已經喺 office 習慣咗, 知道同更年期無關, 完全冇人表現驚訝, 只係其中一位坐肥仔旁邊嘅同事悄悄摷吓自己個袋, 搵到有多支筆枱底交易隊咗俾肥仔用, 以為我睇唔到 😂.

借筆, 其實好小事啫, 都發咁大脾氣 ! 睇到啦, 我份人好 nice 囉 😅