Paris welcome you!



 

今年一月去巴黎, 發現以前成日住嘅一間酒店執咗笠, 好失落.

酒店老板係個阿伯, 每次去, 都會同佢吹水, 大家都有共通點, 就係好唔 like 美國人. 

 

 

其實每次去, 都有意無意𥄫吓以前去開嘅地方, 睇吓仲喺唔喺度.  好多時, 人去樓空, 或者已經比啲潮流品牌取締咗, 覺得好欺虛.

 

好彩, 今次見番間老朋友 ~  呢間賣殺蟲用品嘅店舖!

 

所有有害嘅害蟲動物, 佢哋都有配方, 最爆係佢嘅 window display.

 

1925 年喺附近街市捉嘅老鼠, 1995 年第一次見到, D 標本都係完風不動, 好大隻, 成尺長! 

 



靈感的泉源

早輪電視旅遊節目, 台灣女主持喺法國飲 Absinthe (苦艾酒) , 見佢個飲樣十足第一次, 好驚好純情, 搞到我都好想飲埋一份.

以前讀書, 聽聞過呢隻酒嘅厲害, 法國好多大文豪, 藝術家, 飲到欲仙欲死, 上晒癮, 一句講晒, high 爆.

加上網上嘅介紹 (如下) ......   嘩, 真係好想飲呀!!!!!!

<苦艾酒係烈酒，酒精含量68%，足以令人"酒後亂性"，釀成不少悲劇.  1906年起，苦艾酒在歐洲各國及美國都成為禁酒，直至最近，歐洲才解除了苦艾酒的禁令。>

隻酒喺香港唔易搵, 揾咗幾日, 終於喺 Olivers 找到.   回家途中, 心情既興奮, 又忐忑, 十足十癮君子等開飯!   

苦艾酒飲法 : 

1) 先將 1 part 綠色苦艾酒加入杯內;

2) 然後攞支匙羹或者叉, 放粒方糖喺上面, 擺喺杯面;

3) 慢慢淋兩 part 冰水喺糖度, 跟住糖水就會滴落 D 酒度;

4) D 酒變成奶白綠色, 飲得!


苦艾酒味道 :  好似草藥喉糖 (liquorice) + 茴香 (fennel) + 八角 (star annis). 我就好like, 不過我諗好多人會頂唔順.

連飲三杯, 完全冇反應, 第二日試吓加重料, 多 D 酒少 D 水, 睇吓點.....   哈, 結果完全收皮, 竟然由晏晝 4 點瞓到第二朝 4 點, 瞓足 12 個鐘, 真係十幾年都未試過! 

恐怖......

London welcome you!

上次去倫敦係2005年, 今次重遊, 發覺街道市容冇乜變, 英國女人, 都係咁醜樣.  但啲人, 就明顯友善咗好多同好有禮貌.

無論海關, 餐廳侍應, 舖頭, 酒店, 售票處職員, etc. 個個都會同你 say hello 寒暄兩句, 就算係行貨, 假風度, 至少人哋肯講出口.

例如喺 Harrods 人頭湧湧嘅超市, 買礦泉水比錢嗰陣, 收銀阿叔見我手上揸住盒藥, 會同我講 : "(支水) 用嚟食藥㗎 ?  不如喺呢邊食吖 (用手示意), 少啲人, 冇咁迫."   嘩! 咁 nice 嘅?!  以為自己聽錯......

有晚去高檔餐廳, 之前為某原因趕唔切喺酒店換 <戰衣>, 著到頗 casual, 竟然完全冇比人白眼.  食嗰陣啲 waiter / waitress 好 friendly, 招呼好周到添.

隔離枱咁啱都係香港人, 食緊個 8 度菜嘅 tasting menu, 佢哋有個完全唔得意唔 cute 嘅仔 (7-8歲), 可能上菜過程太漫長, 悶到半個身趴晒喺枱度.  啲侍應見佢咁, 走去撩佢傾計, 點知條細路唔睬人仲 9秒9 走咗去佢老豆身後呢埋, 啲咁嘅港童, 帶佢去遊埠簡直係晒錢晒時間啦!

HK welcome you!

早幾日去完 trip , 一落機, 接觸到喺機場服務嘅香港同胞 (包括 : 地勤, 海關, 的士司機), 晨早溜溜, 個個黑口黑面, 腦海立即浮現一句 : <熱情香港 . 好客之道 . 點少得你>,  x@#Yz!

指示 connecting flight 嘅女地勤 -- 目無表情死魚眼, 個個行路踢住個鞋掙. 

班機師空姐 -- 冇人互動㗎, 一出機倉, 個個攞住部手機噤! 噤!噤!

海關 -- 攞住你張身份證, 但永遠都係同隔離個伙記吹緊水, 講部門壞話. 

的士司機 -- 你講完目的地, 永遠唔應.  行錯路, 你提佢, 佢就會用好似你好傷害到佢尊嚴同專業嘅語氣講 : "得啦! 得啦! 我知啦!"   

呢啲.......  就係外國旅客見到  <熱情香港 . 好客之道 . 點少得你> 嘅第一印象. 

咁都仲有人嚟, 一係啲人好厚顏, 唔係就香港嘅吸引力無比巨大, 可以 compensate 晒所有冷漠, 不禮貌嘅屈辱.



好客之道
主唱: 林子祥
Your every smile
Your every hello
Every hand that you lend
You make a difference
Every step that you take
you make a difference

Whatsapp 阿叔

家陣啲人用 apps 去周街識人, 溝仔, 我就真係食古不化, 恐龍時代, 仲覺得 whatsapp 係要留比同自己熟啲嘅人用.

 

Whatsapp 好正, 唔駛錢, 但最煩係可以比人睇到自己最近一次online 時間, 搞到有啲唔想覆嘅, 唔覆都唔得;   睇咗 message 又有個✓✓, 唔可以扮收唔到.

 

我住嗰度租約到期, 業主加租, 佢搵咗個地產經紀做中間人. 條友好搞野, 係個阿叔, 口水多過茶, 攞住個電話重複又重複, 一味講唔收線. 後尾可能 feel 到我唔耐煩, 改用whatsapp.

 

每次收到佢啲 whatsapp, 都忍唔住 "哈" 一聲笑咗出嚟, 因為超騎呢, 勁爆笑!

 

佢話自己係喇沙仔嚟㗎, 嘩~ 喇沙啲中文, 實在太勁喇!

 

(留意橙色highlight金句)

 

國恥

 

TVB <May姐有請>, 其實第二輯唔鍾意睇, 覺得嗰兩個女主持平庸到不得了, 一啲都唔入流, 加上三個女人幾句唔埋就擘大喉嚨哈~哈~哈~哈, 人哋劏條魚又笑, "bok"隻蟹又笑, 都唔知係咪食咗過期春藥.

今晚有我最憎, 好鬼作狀嘅梁詠琪做嘉賓, 講自己乜乜物物食齋, 懶係 pure 咁, 嘔~

啱啱諗住轉台, 𥄫到 May姐會教人整意粉, 睇埋啦...... 
整完碟意粉冇乜特別, 但我就比梁詠琪一個觸目驚心嘅行為嚇咗一跳!

佢食嗰陣竟然用刀叉將啲意粉切到碎晒, 話佢老公教佢, 可以用匙羹一羹羹嗶嚟食!  哇~ 唔係嘛?!

呢鑊真係國恥!

喺意大利, 食意粉只係用右手攞叉捲嚟食. 冇咁靈活, 會用埋左手攞支羹去幫, 但就絕冇人會用刀!

希望電視觀眾唔好信佢, 因為呢個係極端冇文化,  uneducated, uncivilized 嘅舉動, 更加希望梁小姐同佢個老公, 唔好喺外地再做出啲有辱國體嘅行為.

港燦







尋日公幹, 走咗轉深圳, 順道食午飯.  上菜嗰陣, 見碟碟都貼咗個綠色號碼 sticker, 以為係上菜次序.

 

哈~  點知個號碼原來係負責炒碟餸嘅廚師編號, 如果味道品質有問題, 可以即刻篤佢出嚟.   而家真係好先進, 連食飯都咁有系統, 實施問責制.

 

 

大陸搵食, 高檔次地方貴到飛起又靚到飛起, 如果走平民路線, order 真係要有啲功力, 因為好多時食物量詞嘅定義, 份量嘅scale, 同香港好唔同.   

 

例如食水餃, 香港一腕 6-8 隻, 但大陸有啲地方係斷斤計, 冇一腕腕叫, 係淨秤乾嘅水餃皮.   用半斤水餃皮包出嚟嘅餃, 幾十隻, 早午晚三餐都食唔晒!

 

諗起幾年前喺成都做project, 同個consultant 學人去食local 嘢, 叫咗蒸飽, 餃子, 擔擔麵, etc etc......  見有老鴨湯, 9 蚊個, 一人整腕啦.    

 

嚟嗰陣, 原來用面盆上,  一人一盆, 大到連張枱都唔夠放!  唔止上菜個阿叔笑我哋, 連周圍啲人都眼望望, 笑爆咀.

 

 

 

同一個consultant, 有次喺北京同人去四合院食私房菜, 忽然慶起想食魚.

成個餐牌只有一種魚, 叫 [甲魚].   好, 就叫啦!  個侍應問佢想點煮, 佢話清蒸.   嘩, 一上菜, 勁呀~~~~~  原來 [甲魚] 唔係魚, 係龜(水魚), 仲要用薑蔥蒸, 真係見到都想嘔.