而家做個品牌, 掹車邊都算係世界頂級名牌之一, 打咗差唔多兩年工, 真正領教到乜先叫 "LUXURY" !
1. 前女老闆 (已被辭職) 去意大利出 trip, 叫同行男同事幫佢帶啲 samples 返香港, 個袋成廿斤重, 同事攞起嗰陣, 比啲一舊舊嘅嘢 '亨' 到腳眼, 鬼咁痛.
返酒店打開睇, yiu ~~~~ "Sam" 乜 Q "ple" 吖, 原來係老闆喺意大利超市掃比自己仔女食嘅罐頭.
2. 喺我未入公司之前, 牌子喺中環店搞 event,
'某女高層' cheap 上腦, 嫌舖頭樓上間文 X 酒店到會咖啡貴, 竟然叫人喺 office pantry 抬部咖啡機落舖, 沖比啲客飲算.
唉...... 好心啦, 咁山寨都比佢諗到.
3. 今年 annual dinner 好多 vendors 都 sponsor 現金, 好疊水吓.
原本有錢抽, 好開心, 點知 '某女高層' 話派錢唔係公司作風, 要 HR 用啲錢買埋啲唔等駛嘅小家電 (風扇, 風筒, 電飯煲, 仲要係唔知乜牌子), 搞到抽到啲人黑口黑面.
4. 同一 annual dinner, 隔離同事抽到份所謂大獎 : 公司酒莊一套三支猴年特別版紅酒.
見佢攞完獎, 番埋位想打人咁款, 𥄫吓乜料.
Diu ! 所謂一套三支嘅套裝, 得番兩支, 仲要係乜 packing 都冇, 淨係攞個爛鬼公司舊紙袋入住.
當刻覺得好奇怪, 但因為大家飲咗太多, 太 wing, 冇人發圍去問責.
第日有工作人員透露, 份獎原本的確有三支, 只不過係 '某女高層' 臨場落 order, 話抽起一支自己鍾意 label 嘅自用.
抽水!! 連人哋啲獎品都唔放過!
Cheap 爆! 咁同送盒朱古力比人, 但預先打開, 食咗最靚最好味嗰幾粒, 有乜分別?!
尋晚, 喺舊同事父母屋企飯局.
席間一對夫婦, 老公冇乜嘢, 老婆正一係標準八婆 : 金絲眼鏡, 電短髮, 哨牙, 人講乜佢都要搭咀, 粗魯, 大聲夾冇準, 吓吓都擘大喉嚨嚟笑, 驚死人唔知佢豪邁.
成晚開口埋口, 曬自己幾有生活品味, 乜夜晚兩公婆開支紅酒食鮑魚睇英超, 又話自己識飲識食, 咀刁到可以寫食評.
他媽的, 呢隻就係我最怕遇到, 但又不時遇到嘅香港 (醜) 女人.
吹到自己幾把炮, 原來只係無業司奶一名. 相對女主人, 身高 5' 7", 秀外慧中, 舉止優雅, 咁勁 package, 都低調都痺, 好心你學吓人啦 !
論生活品味, 人家屋企套發燒音響, 淨係條純金 hi-fi 線都廿幾三十萬, 喺人面前曬你啲所謂紅酒鮑魚, 哈哈哈, 真係好笑.
開飯嗰陣, 金絲眼鏡電短髮八婆一路食, 一路哨牙 'jep jep' 聲, 一路話而家淨係會比啲靚酒比兩個女飲, 等佢哋知道乜先係好嘢, 唔駛比人呃, 仲教佢哋第日大個同男仔出街, 要有要求, 食飯都叫啲貴夾唔飽嘅.
望住佢兩夫婦, 再望吓佢哋兩位千金嘅尊容...... 金正恩女版.
如果我個女索到好似何超蓮, 又或者上山安娜個女Hilary 咁, 可能我都會咁教佢.
你嗰啲 ?! 第日有男人約, 要劏雞還神啦 !
跟住講起讀書, 話個女細細個已經好叻, 考到間國際名校讀 K1, 但個女話悶, 唔想返學, 咁佢就親自去班房瞭解吓發生乜事. 去到, 竟然發現班中大部分同學係細 B (因佢千金 2 月出世, 係大 B, 所以聰明啲喎), 個個流晒口水, 成舊飯咁 (我心諗...... 流口水, 有冇咁誇呀).
最後轉咗間 local K1, 好驚喜, 竟然個個同學都講英文嘅, 個女同鬼婆老師多多嘢講, 見到中國人班主任就粒聲唔出, 佢見個女有嘅咁表現, 開心死喎.
超~ 崇洋 !
有啲咁心態嘅家長去教育下一代, 香港唔方有希望啦.
由細到大同國語冇緣, 學極唔識. 到做舊公司嗰陣, 尤其反感, 因舊老闆成日笑我國語唔好.
挑~ 都唔明佢有乜資格笑我 ! 佢係鬼, 學咗十幾年都講得麻麻. 不過都唔怪得佢, 因當年大陸業主個個擦佢鞋, 明明講到成 pet 屎咁, 啲人都會激讚, 搞到佢自我膨漲, 以為自己真係好叻.
屋企完全冇人講國語, 我講得唔好, 好正常啩, 國語同廣東話啲音都唔同, 點會無端端識講 ? 講歪啲廣東話, 就當流利國語咁核突 ? No laa.
多年後嘅今日, 我依然唔掂......
今朝, 同大陸隻馬 (同事) 喺電話吹水, 八吓尋日上海 office 睇風水啲嘢.
佢話風水師話某高層間房三尖八角, 殺氣重, 要化解. 隻馬跟住話個高層可能自己都識少少風水, 今朝就擺咗個觀音喺枱.
我話 : "吓 ! 观音?"
佢答 : "对吖, 观音."
我問 : "女神那个观音?! "
佢答 : "不是吖, 是王帝用的 官印 ."
哇哈哈哈哈哈哈哈哈哈~~~~~~~ 哦, 原來唔係观音, 係官印 !!!
呢壇嘢, 令我諗起好多期之前, 明報副刊有篇關於香港人講爛國語嘅故事.
話說筆者有個上咗大陸做嘢好耐嘅香港朋友, 雖然打滾咗十幾廿年, 啲國語都係麻麻, pick up 唔到.
有日食完飯, 香港朋友個土豪客話帶佢去見識吓啲好嘢, 佢心諗...... 有乜好嘢我會未試過呀 ?
土豪笑淫淫...... 舌头按摩吖.
香港朋友再度反思...... 哇~ 舌頭按摩咁正 !? 咁多年又真係未試過喎, 唔通韓國引入 ?
跟住, 佢就帶住期待又激動嘅心情, 入房趴喺張按摩床度, 等待舌頭按摩.......
等等等, 小姐入房, 就喺當刻, 佢瞌埋眼...... 屌咗聲.
原來係石頭按摩, 唔係舌头.
Vaffanculo, 係我工作時候聽意大利佬講得最多嘅語句.
Vaffanculo 點解 ? Vaffanculo 係意文粗口 (即中文 x 你). 公司可惡嘅 CFO 竟然教女同事講, 仲話呢個字解 PK, 唔係嘛, 點止 PK 咁簡單呀. 擺明老點, 真係冇陰功.
其實 Vaffanculo 係 CFO 常用金句, 每當佢發現自己賴屎, 遭逢不幸, 比人辣慶, 或公司生意差, 就會聽到佢唸唸有詞 Vaffanculo.
最近我都忍唔住加入戰團, Vaffanculo 埋一份.
'潔闢' 同事, 時常開口埋口話想學意文, 見佢咁熱心, 搵咗啲課程資料比佢啦, 點知原來得個講字, 過咗成年都冇下文.
死好命, 公司最近安排意大利老師午飯時間上門教意文, 足不出戶, 完全免費, 仲要包埋午餐, 唔駛測驗考試, 純粹 for fun 嗰隻.
有嘢食又有嘢學, 仲要唔駛負責任, 就算我識, 都入去坐吓攞著數啦.
條友懶過鬼唔做功課, 次次抄人, 上咗幾堂而家竟然周圍同人講, 話上堂好嘥佢時間, 搞到夜晚要開 OT.
Vaffanculo ! 呢啲正一係冇衣食, 𡁻完鬆, 屙屎唔出賴地硬.
意文一個禮拜一堂, 仲要喺 lunchtime, 就算你唔上, 都會 '攔' 咗出街食飯㗎啦, 明明自己唔 efficient, 開工時間同人吹水講是非, 日日係要等到人哋放工走晒先嚟做嘢, 有乜辦法唔 OT?
仲賴人.
另一壇, 當然係關於我虔誠教徒 '好同事'.
我剛剛入呢間公司嗰陣, 佢扮到好慘, 晚晚 OT 做到 10 點11 點 (我而家當然知點解啦).
當時信以為真, 同老闆喺香港 fight 咗個 part-time headcount 幫佢; 喺澳門, 佢當正自己阿姐成日駛人哋部門嘅人做嘢, 部門阿頭怕咗佢, 比咗個原本屬於自己嘅 headcount 任佢用.
一年後嘅今日, '好同事' 竟然同我話 "其實佢 (澳門同事) 都冇乜嘢做".
咁即係乜意思? 冇乜嘢做, 都係因為你霸住人, 又冇嘢比人做啫!!
Vaffanculo ! 佛都有火! 同佢講, 個 headcount 係人哋讓出嚟比我哋部門㗎, 如果冇需要, 我可以同老闆講比番人. 佢當場收聲.
唔記得講, '潔癖' 同 '好同事' 一樣, 都係 xx 徒, 只係 '潔癖' 冇 '好同事' 咁激進.
Vaffanculo ! 物以類聚, 人以群分, 真係家門不幸, 公司請埋晒啲咁嘅人.
