品牌新上任 CEO 出巡到港, 公司高層大為緊張, 扭盡六壬, 施展渾身解數, 曬冷, 竟然厚顏到同某地產大亨借船, 要成班管理層一齊出海 " 與 CEO 進餐 " .
My 吉! 睇到通告當刻, 個心一沉, 真心覺得好唔開心.
遊船河係高危公務, 最易賴嘢, 有乜 '依郁' 暈浪作嘔喺 CEO 面前出醜, 以後點見人?
( 咁多年, 好僥倖, 只係暈過一次船浪.
回想嗰次, 天漩地轉不在話下, 由好想嘔 --> 嘔唔出 --> 正在嘔 --> 到嘔完, 每一刻, 隻船都不停搖晃, 坐又唔係瞓又唔係.
隔一陣, 整個嘔嘅程序又再循環. 唔係誇, 黃膽水都嘔埋, 直到上到岸為止 ).
如果唔暈浪, boat trip 應該係好開心好 free , 一班 friend 吹水劈酒, 曬太陽, 跳海游水.
( 要由頭到尾坐直條腰, 食風仲要扮留心, 聽啲完全聽唔明嘅生意經, 笑啲所謂 '笑話 ' ? 不幸地, 尋晚全中 ! )
明明天文台話尋日落雨, 諗住有機 cancel. 唉 ~ 最後點解一滴雨都冇㗎 !
上到艇, 好彩有酒飲, 總算可以自得其樂 / 麻醉.
某同事演技超班, 雖然成晚一粒聲冇出, 但就不停猛力點頭, 明確示意認同高層講話, 識 do ! 唔似我同另一同事咁, 一路聽一路反白眼.
嗰位某同事仲竟然為咗呢個飯局, 食完 lunch 一早閃咗去搵人用咗 3 粒鐘專業化妝 ! 藝高人膽大, 為求可以高一啲 (雖然著咗都仲係 5 呎掙 1 吋), 冒仆街之險, 踩對 4 吋高跟長靴上船, 好有鬥心.
人哋咁搏咁揼本, 睇嚟我都要攞番幾草嘢, 報工聯會, 睇吓有冇周星馳套喜劇之王成日提嗰個 "史坦尼斯拉夫斯基" 嘅課程, 提升吓 "由外到內，由內到外" 演技先.
公司大革新, 由年頭計, 到目前為止, 已經兜咗 3 個冗員 (包括我部門之前嗰件極品).
不約而同, 佢哋都係做咗 6+ 年以上.
嗰啲所謂老臣子 (平時擺晒款日日喺度渣流灘, 返工等放工, 不思進取, 有事 A 字膊, 要交 report 就攞 sick leave), 仲敢周圍同人講, 話公司炒晒啲舊人, 無人情味.
無人情味 ? 真好笑 ! 問心嗰句, 自己有幾多本錢 ? 做乜錯乜, 閉關自守, 外面發生緊乜都唔知. 冇 network, 冇學歷又冇 added value, 咁嘅質素表現仲有得留低, 公司其實已經對佢哋好關愛.
...... 咁長嘅引子只係想帶出, 喺可見將來, 即 2016 結束之前, 會再 out 多件.
答案, 呼之欲出...... 登登登凳 !
想郁佢單料, 早有傳聞, 但多個月嚟毫無動靜, 月頭 HR 收 order 叫佢唔好再喺 office 著繡花拖鞋, 以為擺平咗.
前幾日 HR 同事小小聲, 原來 '繡花拖鞋' 最後都冇得留低, 仲要係被即時死亡嗰隻, 為乜? 原來GM 話唔想人哋年尾流流12月31日收大信封, 所以早啲通知喎. 正一多舊魚.
敢做唔敢認, 唔知驚乜, 多多藉口, 又話 jet-lag 又話要開會, 總之炒魷儀式當日就設法不在場, 龜縮, 叫HR 同 '繡花拖鞋' 搞掂, 話之後會打電話同人交代.
搞錯呀, 咁都想閃...... 人哋跟你咁多年, 唔係連親自講句 bye 都冇嘛 ?
最狗係明知即炒, 就唔好隊HR 去嘈人對繡花鞋啦, 製造分裂, 搞到 '繡花拖鞋' 而家當正HR 係仇人, 面阻阻.
啲咁婆媽老土嘅事, 好快傳到大老闆耳中, 我估佢聽到後一定反咗幾轉白眼.
End up 大老闆下令條GM 要親自出馬兜 '繡花拖鞋', 自己的事自己做, 唔得假手於人.
避無可避, 最終都係要做番醜人. GM, 你要爭氣呀, 千祈唔好比我估中你要埋人單當日請病假囉.
今日食晏, HR 同事好懊惱同我哋講, 收到 GM order, 聽日要同某 director 級要員表態, 提醒佢嘅衣著品味, 尤其一定唔可以再喺 office 著繡花拖鞋.
哈哈, 真好笑, 條八婆 GM 就係咁, 永遠唔做醜人. 明明朝見口晚見面自己條𡃁, 點解唔直接講, 要借 HR 把口 ?
不過諗起 director 嗰對繡花拖鞋, 被佢肥胖身軀, 日積月纍下踩到 "噠" 晒. 有時佢出咗街, 我哋喺佢位望到嗰對又梅又扁嘅拖鞋屍, 確實嘔心.
繡花拖鞋, 一係名門淑女喺自己深閨裡面著, 一係就喺鬼故廁所某格條罅先會見到, 冇諗過一間所謂 MNC office 會有肥人敢著住嚟行出行入.
調較吓, 係時候.
有口話人, 冇口話自己...... 我都發現自己條小鮮肉 (工作條𡃁), 衣著品味有問題.
最怕佢嘅休閒 look : 著鞋唔著襪 (我諗其實好多人都知, 著鞋唔著襪對腳會好嗅), 都唔緊要, 仲要著條貼身牛仔褲 + 摺腳 (下圖左).
My god, 摺腳呢吓好難頂, 唔知佢喺邊度學番嚟, 成件事根本錯晒 !
好人好者, 無啦啦做乜著窄腳褲, 男人之家, 想 show 啲乜? 同埋窄腳褲, 如果唔係腳長, 唔好搞啦.
唉, 可能我都要學條八婆咁, 搵 HR 幫助吓手.
大約 5 - 6 年前, 發現右邊面下顎智慧齒蛀咗個細窿, 自始得閒無事就用條俐頂吓佢, 日子有功, 愈頂愈大.
今年個窿已經變到粒綠豆咁大, 食嘢成日攝咗啲食物碎入去, 雖然唔痛, 但好麻煩. 其實未變到咁大嗰陣, 上年年頭已經想去剝, 但畏疾忌醫, 終於上禮拜牙痛, 非常困擾, 唔搞唔得.
實在好耐冇睇牙醫, 對上一次剝牙係 10 年前, 仲要間牙醫診所因為拆樓, 唔知搬咗去邊.
迷茫中, 剛好同肥仔 consultant 食飯, 佢女友原來做過 10 幾年牙科護士, 喺佢幫忙之下約咗佢舊老闆睇牙.
聽佢講呢個牙醫好多人幫襯, 去到起碼要等個幾鐘; 佢叫我最好早上睇, 因為就算返屋企止唔到血, 都可以立即去醫院, 仲提醒我食飽啲先好去, 咁驚 ?
原本都 ok, 點知剝之前嗰日條肥仔 consultant whatsapp 問我驚唔驚, 比佢嚇一嚇, 之後又手痕search 吓, 原來剝智慧齒可以有好多 complications, 跟住真係淆底有啲驚 .
出發前最後衝刺上網 check, 好彩網上啲人對呢個牙醫評價幾好, 唯一投訴就係要等好耐.
加上肥仔 consultant 話佢上次登記咗, 姑娘叫做佢去附近行吓, 輪到佢就 call 佢返嚟, 點知一等等咗兩個鐘 ! 所以做定資料搜集, 睇吓診所附近有乜做, 可以打發時間, 結果係冇嘅.
尋朝去到, 竟然唔駛半個鐘就有得睇, 而且牙醫好 nice, 講解非常清晰. 照咗 X 光片, 解釋隻牙嘅狀況, 拔牙手術過程, 風險, 價錢.
問我做唔做, 我 9 秒 9 答 " 做 ~ ! "
嚟得呢度, 就係要決心剷除隻牙嘛.
我隻智慧牙打橫生, 牙腳好肥, 又粗又圓. 牙醫用咗超過 20 分鐘先可以徹底移除, 其間雖然個口做咗麻醉, 但始終身體其他哋方如視覺, 聽覺, 嗅覺如常運作.
頭頂手術燈照住, 眼見條膠管 '索索' 聲吸緊啲紅色血水出嚟, 聽見機器高速磨牙發出嘅吱吱聲, 聞到牙齒嘅金屬打磨味, 色香味俱全. 雖然姑娘醫生不斷叫我 relax, 咁搞, 睇怕超人先 relax 到.
手術做完返家休息, 一廂情願, 諗住黎緊幾日冇牙咬, 食少啲, 乘機減磅, 飲咗罐罐頭湯, 唔夠一個鐘, 已經極度飢餓. 頂 ~ 電視又不停播飲食節目, 最大鑊係手術 24 小時內唔可以飲酒. 唉...... 你哋點解唔提我除咗食飽啲, 仲要飲夠啲先去呢 ?
嚟緊今晚仲好笑, 判頭請食飯, 同佢講我剝咗牙咬唔到嘢, 點知收到佢 whatsapp, 今晚去食 ICC Ritz-Carlton 自助餐.
大佬, 你玩嘢 ?!
唔知老咗係咪會固執啲, 家陣好容易對啲完全事不關己嘅事而動氣, 激心, 耿耿於懷.
今朝返工喺沙田上火車, 車廂坐滿人, 但唔係好逼. 有個 70 幾歲滿頭白髮, 揸拐杖嘅阿伯上車, 冇位坐, 企咗喺度.
佢附近嘅人, 完全冇反應, 連扮睇唔到都費事, 擺明唔讓坐. 架車一開, 阿伯左搖右擺, 當刻心諗, 乜啲人咁賤, 咁冷血㗎.
唔係掛住玩手機, 就瞓到面容扭曲, 皺晒眉頭, 死去活來咁. 唔明點解瞓覺唔喺床, 要喺火車.
大圍站有一大班人落車, 阿伯有得坐, 佢坐咗喺窗邊, 隔離同對面全部都係女人, 三娘教子.
點知去到旺角站, 阿伯落車. 坐路口位嗰兩條八婆, 竟然完全唔縮腳, 阿伯要連人帶拐杖, 跨過佢哋啲腳先出到去 !
正人渣, 冇人性, 躝靼 !
兩條八婆 : 你老味, 你知唔知乜嘢係敬老, 你屋企冇老人家 ? 如果他人用同樣方法對待佢哋, 你覺得 ok ?
 |
| 人渣, 咁賤 ! 影你哋相 ! |
餘怒未消, 臨落車, 睇吓你兩個嘅衰相.
一個鼻蹋, 一個冇腮, 擺明等報應, 你哋老嗰陣慢慢捱啦 !
講開酒店, 好多都會 offer corporate rates 特惠價比啲 MNC (國際化商業機構), 因一般嚟講, MNC 員工日理萬機, 個個公幹飛完又飛, 咁啲 jet-setter 住密啲, 酒店就可以跑量, 提升營業額.
最近同事口中得知, 公司喺中國大陸 book 酒店, 已經再冇任何 corporate rate, 應該係入住率太低, 被取消資格.
對我嚟講, 反而有好處, 因為只要 within budget, 而家想住乜都得, 唔駛再住埋公司個 list 嗰啲狂潮年代裝修, 老套噏耷酒店.
最近走灰色地帶, 喺 booking.com 執到筍嘢, 住咗兩個地方 : 上海國金軒 (IFC Residence) 同 廣州文華東方 (Mandarin Oriental).
新鴻基嘅 IFC 國金軒, 留意咗好耐, 因當年喺 service apartment 樓下商場店舖做工程, 聲浪過大 "嘈" 親佢哋嘅貴客, 所以被邀請同佢哋揸 fit 人對話.
𨋢門打開, 看見眼前景象, 心諗 : "啲裝修做乜得咁靚, 好多 art pieces, 有氣派得嚟唔俗氣, 喺上海, 實屬難得".
 | |
| IFC apartment lobby 其中一角 |
|
|
|
|
|
|
|
|
|
|
|
|
 |
| Apartment 信箱 |
當時都幾羨慕啲貴客, 有咁好地方住.
近年可能生意唔好, 要面對現實, 變通, 拆開嚟賣.
估唔到而家, 竟然可以逐晚嚟租住. 90 m2 apartment 每晚都係人民幣 1,500 左右.
好彩地被 upgrade 咗去間 127 m2 open kitchen , 兩房兩廳, 兩廁, 仲冇鬼添.
窗外仲有浦東景致.
Friend 叫我一定要游吓頂樓個特色泳池, no 啦, 前嗰晚劈得咁勁, 點游?
下次去上海如果呢度再做特價, 必定要再試, 同埋游泳.
以前文華東方走成熟路線, 廣告揸得把扇嘅都係 35+ 嘅明星 / 明人. 但近年好似有革新, modern 番啲. 通常房價人民幣 2300 以上, 唔知今期做乜賣大包, booking.com 1300 就得.
廣州, 有啲奇怪, 到底幾時講國語, 幾時講廣東話呢 ? 同的士司機講廣東話, 佢會用國語重複一次你要去嘅目的地; 到你講國語, 啲人又會用廣東話應你.
講番文華東方, 今次入住印象特別, 有幾個細節覺得好好.
 |
| Front Desk |
Check-in 時候, 前枱真係比到 warm welcoming 感覺.
同期 check-in 兩個男人 classy 又有 manner, 明顯係 corporate 客. 但前枱對我嘅服務態度係一模一樣咁好, 冇歧視我呢啲 booking.com 客.
因第一次住, staff 陪我上房介紹房間設備, 講咗 wifi 密碼後, 建議我攞部手機出嚟, 等到我連到線, 佢先離開, 好細心. 最厲害臨走前講 : " 我哋好多客人住過一次, 之後都會再返嚟 ".
暗示式催眠 !? 有啲料到.
 |
| Hotel Entrance Lobby |
放低行李要即刻趕去開會, 酒店門口一架的士都冇, bellboy 話放工時間好難有車, 如果唔介意, 佢用自己戶口幫我 call 滴滴 (大陸 uber), 估唔到服務可以咁 flexible.
 |
| 窗紗係由下向上拉嘅, 好搞野 |
最細嘅房都有 60 m2, 房間設計似曾相識.
噢, 原來都係出自以前上海常住嘅 Park Hyatt 設計師 Tony Chi 手筆.
無論街外幾咁混沌 (chaos), 一踏入酒店門口, 就完全唔覺自己喺大陸, 神奇嗎 ?
第二朝要搭早班火車返香港. 唉, 如果早知間嘢咁正, 一定 book 下晝車, 歎埋早餐, 做完 spa 先撇.
落樓下, 喺 front desk 見番昨天介紹房間嘅 staff, 佢好熱情咁同我打招呼.
跟住有位講廣東話嘅靚女 (唔係整容樣, 係航空公司廣告好 exotic, 啲牙好齊, 有女人味嗰種) 幫我 check-out. 最煞食, 係佢埋完單, 用親切嘅眼神加上好靚嘅笑容, 溫婉但又好 firm 嘅語調, 同我講 "真係好希望好快再見到你 "
我心裡默默回應 "唉, 我都好希望快啲可以再返嚟 ...... 唔知仲攞唔攞到咁平嘅 rate 啫 "
 |
| YES YOU CAN !!! |
|
