要發生嘅終於都發生. 三月尾公司通知, 香港 office 唔玩喇 ! 亞洲總部將會遷移上海, 呢件事我覺得一啲都唔出奇, 好多品牌都係咁. 何況上年已經做緊上海 office expansion 設計, 知道當地員工人數將要增加一倍, 不過冇諗過香港 office 要摺得咁 L 急, 所有 director grade 都要即走啫.
都唔係完全冚家剷嘅, 啲細反而有得留低善後同維持香港舖頭基本營運. 就係咁, 我四月尾就走得.
比着以前梗係飛轉法國 / 意大利散個心, 沉澱吓先再諗下一步點行. 而家冇啦, 比 covid 搞爆晒, 邊 L 度都唔駛去, 唯有留港自閉, 日思夜想, 得閒就鑽吓牛角尖 😆
有日真係鑽冇可鑽, 極度無聊, 忽然諗起之前舊同事同我講過某交友 app 好好玩, 本着無聊心態一試, 嚇一跳 ! 回覆全部只得女人, 連一條佬都冇, 實在不可能吧. 再 check 吓, 原來自己性別喜好 set 錯咗 : 女人 😂
Oh, 唔怪得啦......
Reset 後回覆雖不至雨後春筍, 但數量亦頗為驚人, 千奇百趣, 有幾個好似幾啱傾, 身份特徵如下 :
人種 - 居港外籍人士 ( 非英語國家 ) , 居港國內人士
語言 - 英文, 同非常堅持用英文
狀況 - 離婚, 喪偶, 喜歡小孩
職業 - 金融才俊, 地產發展商, 鑽油台承包商 😂😂😂😂😂
居住地點 - Peninsula Hotel 😂😂😂😂😂😂, Grand Yoho ( 強調用 1300 萬買 ! )
咁到底點發現破綻呢 ?
1. 話自己意大利人, 咁轉台講意大利話啦, 佢成晚唔覆, 第日照用英文溝通, 擺明流啦.
2. Background 明明寫自己 UCL ( University College London ) 畢業, 傾傾吓變咗 University of Nottingham, 差好遠啫.
3. 話自己住香港, 但將天星 star ferry 形容為 boat, 實在冇可能吧, 細路都識 boat ( 小船 ) 同 ferry ( 渡輪 ) 嘅分別囉.
4. 電話 ( +46 ) 挪威號碼, 話自己係挪威 / 新加坡混血兒, 啱啱嚟香港做嘢, 但睇相丁點混血都冇, 結果 fb 摷到根本條友造假, 開戶係條叫 mohammed nasiruddin robbi 嘅印度星.
不過最想 highlight 嘅 case, 係呢個 :
[ 大陸來港工作金融才俊但現時又身在廈門嘅 Edward, 你亦可以叫佢 Shijie, Satan 😂😂😂😂😂😂😂😂😂 都得 ]
Post 相全部英國影, 但又話自己英文唔掂, 要靠翻譯 app 溝通, 下晝 5 幾點開始 chat, 夜晚 8 點已經講 : " 真想而家坐喺對面同你食飯嗰個係我 ( 英譯中 ) ", 咩料呀 ? 發展會唔會太 chur 咗啲 ?
上網諗住起佢底不過一啲都摷唔到. 哈哈 ~~ " 遠在天邊, 近在眼前 ", 果然冇錯, 打開 wechat, 不費吹灰之力 Edward 嘅電話號碼已經出現喺我 contacts 嘅 new friends 名單.
Edward 竟然變身為來自遼寧, 逆來順受, 生活不容易嘅 " 東北一支花 " 😂😂😂😂😂😂 ! 條大陸女人真係百密一疏, 實在太唔小心喇.
痴線㗎, 個 app 全部都係呃人, 呃錢呃蝦條. 妖 ~
