二十年後

我曾經係日本迷, 痴起條筋, 一年去3 次東京.

 

記得第一次去日本, 係 21年前, 即1991, 嗰日好搞笑, 一上的士去機場, 個司機問我係唔係 <帶guide>, 我問乜係 <帶guide>, oh, 原來係導遊.

 

呵呵, 其實嗰次係我人生第一次出trip, 原來我個樣似<帶guide>......  之後好彩, 第一次坐飛機就比人upgrade去business, 當年日航空姐, 真係好靚㗎, 仲記得啲饅魚飯, 好好味.

 

不過去到東京當晚, 情況有啲恐怖, 一落的士都未攞行李, 就有個醉酒佬扒咗喺車頭嘔!  之後行去旅館, 街邊啲男人喺度屙尿. 

 

跟住仲經歷咗人生第一場 4.2 級地震.  當時瞓係床睇電視, 忽然見到牆邊幅畫拍拍吓, 以為咁猛有鬼!  之後聽到街啲車猛響銨, 停晒喺度, 電視新聞特別報告, 先知咁樣原來係地震. 

 

當年覺得日本人好有禮貌, 好認真,  啲嘢好靚, 好精緻同埋好貴!! 曾經好有衝動去日本讀書, 讀乜?  都係啲日文設計之類嘅無謂嘢啦, 老豆冇反對, 但係佢要我喺大阪讀, 因佢有個friend 喺嗰度, 但係大阪?! 都唔係東京.....?  No 啦.

 

上星期去大阪快閃公幹, 晚機去早機返, 最把炮係食到個正式日本魚生飯set dinner, 頂佢, 香港嗰啲, 真係冇得揮, 啲魚生好Q鮮㗎!

 

 

成個餐唔計魚生飯, 前前後後嚟咗7小碟, 又海膽又和牛 (當然係細細份), 仲包埋咖啡甜點, 都唔駛HKD370, 講都冇人信!

個魚生飯加咗芝麻, 年藕, 香草同黑魚子, 口感豐富有層次, 賣相又精美, 實在令人太回味!