米芝蓮得唔得 ?

隨波逐流, 尋晚去咗海運新翼一間喺東京連續 6 年獲米芝蓮一星, 由日本廚師主理嘅法菜餐廳分店. 

一坐低, 水都未 serve 個 waiter 已經急不及待介紹餐廳名字由來, 個名 x Nu 法文意思係 nothing, 代表主廚想帶出食材 " just as it is " 嘅理念.  
啊, 原來係咁......

因 Nu 法文亦可以係 ' 裸體 ' / ' 廢 ', 法國話人廢, 係 t'es Nu ( = you are 廢 ).

仲以為個廚好謙添 😆 ( 好似中國人話自己屋企係 " 寒舍 " / 自己個仔係 " 我個乞兒仔 " ).

餐廳 180 度維港景, fine dining 格局, 但服務水準有待改善, 坐低 10 分鐘剩係問我哋飲乜水, 竟然完全冇人攞個餐飲業最賣錢嘅 wine list 嚟, 真係唔識做生意.

唔計 VIP 房, 尋晚 7 枱客有 5 個 waiters 做 ( 即每人負責一張半枱, 唔算多 ). 可惜班人手忙腳亂, 幾次我哋啲酒飲到乾晒塘, 都冇人發現.  上菜速度奇慢, 隔離枱條女等到黑晒面, 條仔見勢色唔對開口不停催.

講番食物, 睇得出廚師嘅認真同用心.  點解係睇 ?  因為賣相極靚, 但味道呢, 其實都好㗎, 可惜個人口味有啲怕 fusion 煮法, 例如 : 用日本食材做法國料理 = 呢間.

點麵包牛油

用嚟點麵包嘅牛油澄半固體狀態, 奶油加亞洲香料去整, 陣椰油味我唔係好頂得順, 不如比番舊普通牛油我好過.

Amuse Bouche

Amuse bouche 幾得意, 但唔明點解中間黃色嗰個會係甜味仲有啲似咳藥水.

辣 ( wasabi 法國青豆 ) + 甜 ( 南瓜泡沫 ) + 鹹 ( 鮟康魚肝 ), 個 combination 有啲怪.

第一道 - Lotus

第一道菜 ' 金菇蓮藕 ' very ok.

第二道 - 北海道海膽

第二道 ' 北海道海膽蒸蛋 ', 磨菇湯泡沫同海膽有啲夾硬嚟.

食畢, 發覺同海膽已經緣盡, 今回真的 certified 了.   

事緣數月前屎忽痕買咗 pack 海膽自己啪, 可能唔夠新鮮有啲腥, 食咗兩口就掉咗, 但嗰陣鹹腥味竟然齒頰留香, 陰魂不散.

幾日後出街食飯, 啲 friend 記得我鍾意食海膽, 嗌咗大量 ! 嗰晚, 衝擊好大, 我明乜叫食到怕.

生蠔沙律

跟住嚟嘅 ' 沙律 ' 基本上係唔錯嘅, 驚就驚在啲半熟嘅生蠔, 如果唔連埋柚子醬油啫喱一齊食, 生蠔海水味 + 0 調味沙律菜, 口感好怪.

鱈魚白子

成餐飯轉捩點, 就係呢道  ' 鱈魚白子 '.

乜嘢係白子 ?  

我都唔知, 所以問 waiter 囉, 佢話係魚嘅 sperm ( 精子 *** ).  My god, 當堂嚇窒, 胃口大減 !  碟白子上到枱, 望住啲泡沫, 唉吔, 搞呢啲......  後尾發現一舊舊嗰啲先係白子 😝.  
可能心理作用, 食咗一舊已經唔可以再繼續落去.

( *** 後話 : waiter 講錯, 應該係精囊先啱 )

其實成晚尿急咗好耐, 既然食唔到, 就趁呢個空檔去廁所, 點知行行吓, 後面 waiter 快步追上嚟, 問我喺咪去廁所嘔 😂.  連忙澄清, 我純粹去屙尿.

哇 ~ 哈哈哈, 相由心生, 原來我個樣真係好想嘔 😭😭😭

之後食嘅牛同羊, 冇心機影相了, 比啲白子搞爆咗. 可憐我因為 waiter 誤導, 成晚形住魚精落肚, 周身唔聚財.

食到差不多尾聲,  waiter 問我哋要乜 dessert, 好奇怪, 由最初介紹餐單有 3 個甜品變到得番兩個.

玫瑰芒果蛋糕

噢, 原來佢哋食糊招牌 玫瑰芒果蛋糕 經已售罄 !  成晚得嗰 20 個客都唔夠分 ?  如果咁限定, 而我哋又係最早到嗰枱, 點解點菜時唔提醒我哋要一早落 order 😠 ?





其實我唔食甜嘢, 不過見同枱人咁失落嘅表情, 係時候出手, 反映一吓.  End up 經理送每人一杯 Puligny-Montrachet 補數, 算係咁啦.