上海桑拿

去上海啱啱遇著 ' 桑拿天 ' ( 即幾日大雨後突然變得極度暴曬嘅天氣 ), 地面熱氣不斷蒸上嚟, 行路真係有啲呼吸困難, 太陽下路邊不銹鋼扶手千萬唔好掂, 摸落去分分鐘連皮都煎熟 ! 

加上去完工場工地呢啲人間煉獄, 身心受創, 可能熱壞咗, 失調.  尋日下晝返香港覺得涼, 後來睇報紙先知原來有成 34.2 ℃, 破開埠以嚟立秋第二熱嘅記錄.

喺上海住近東方明珠塔, 以前覺得佢醜夾 K 型, 但唔知點解而家睇落順眼咗, 好 futuristic.   上海人食飽飯會一家大細出嚟睇夜景, 打咭影相, 成街人都同個塔 selfie, 好搞笑.




同 10 年前相比, 上海進步神速, 現在要幾奢華有幾奢華, 有韻味, 有歷史.  

香港 ? 同馬經批啲垃圾馬嘅評語一樣, 4 個字 :  可以不理  😆
  
去任何國家, 最緊要食好嘢, 儘量點啲喺香港冇嘅材料同菜式, 今次 lunch meeting 趁機叫 < 青辣椒水煮蛙 >.  香港唔係冇, 但啲人成日提倡健康飲食, 蛙呢啲咁多寄生蟲嘅食物, 應該買少見少, 就快消失.

盆蛙, 睇相都睇得出肉質彈牙鮮味啦, 估唔到同枱人人都 like, 一輪強勁攻勢, 話咁快食晒, 要追加囉.  頂 ~  order 嗰陣問有冇人食又冇人答我, 如果唔係一次叫兩盆就唔駛等啦.