最靚是誰

早幾日, 原本寫咗有關農曆七月禁忌 + 自己今年對呢個 ' 節慶 ' 感覺嘅 blog, 點知 post 咗唔夠一粒鐘, 突然頭暈作嘔.  可能純粹心理作用, 自己諗多咗, 但無謂老虎頭上釘虱乸, 所以 delete 咗.

唔講 ' 朋友 ' 不如講公司. 

我公司 ' 自以為 ' 仲話得事嗰個女 GM  ( 註 : 佢已經冇實權, 老闆出去開會見客冇佢份, 閒來只係管吓 office 啲雞毛蒜皮, 我都好想收佢份人工, 做呢啲無謂嘢 ).  每年一到 annual dinner 意見多多, HR 建議玩乜 theme 佢都 ban, 話唔 proper 唔 luxury 唔 elegant 唔靚意識唔好, 乜都唔准唔比唔得, 搞到公司成間修道院師姑奄咁. 

次次都堅持啲冇創意悶蛋主題, 自己幾廿歲年老色衰仲學人扮 Audrey Hepburn, 嘔 !   扁口扁面, 好心照吓鏡, 望吓自己邊忽似柯德莉夏萍啦 !

今日 lunch 講起上次 annual dinner 卡通主題, ' 潔癖 ' 女同事突然上身, 一發不可收拾, 高頻尖聲, 激烈指責部門 hehe 男上司, 扮 Alice in Wonderland 個愛麗斯扮到鬼火咁靚, 但就要全 team 10 幾人做茄哩啡襯托佢.

' 潔癖 ' 女對自己被迫扮綠精靈一事耿耿於懷, 成餐飯鬼殺咁嘈, 聽覺污染.  佢咬牙切齒, 話下年 annual dinner 一定唔要再整醜自己 !  

想食餐安樂茶飯啫, 都比佢嘈乸住晒, 無明火起三千, 忍唔住疙佢 : " 做乜 annual dinner 一定要靚 ? 又唔係選美, 又唔係結婚  "  

' 潔癖 ' 女聽罷, 無言;   全枱其他人, 無語陰笑;  大概係我疙得佢太淋漓盡致, 大快人心吧 😆