說時遲那時快, 公司炒魷行動, 星期三結束. 聽 HR 講, 今次大開眼界, 睇清晒亞太區 office 同事嘅質地, 派大信封嗰陣, 啲人當正佢哋殺父仇人咁.
不過呢層可以理解, 亞太區 office 好食好住, 大部份 staff 都踎咗十幾廿年, 而家裁咗出去, 搵唔搵得番都成問題.
個個 job title 勁到爆, 一個部門 3 個人, 竟然可以係 : executive director 加一個 director 再加一個 senior manager !! 除咗兩個 receptionists, 基本上最低級嗰啲已經由 assistant manager 起跳 !
有見及此, 總部乘機整頓, re-title 啲人, executive directors 同 directors --> 而家將會變成 directors 同 senior managers, 人工不變, 如此類推.
HR 話啲人知道後個個歇斯底里, 發晒爛渣老淚縱橫. 宣佈後第日, 仲集體請病假.
講番要 " 起身 " 嗰批, 有個男人玩晒野大鬧 HR, 話明明係 redundancy, 點解要比 letter of termination 佢, 認為 termination 呢個字暗示佢有過錯, 好有問題, 要比律師睇過先. 封信佢唔會收, 亦唔會簽 😂😂😂😂
不過我覺得公司係 cheap, 一啲都唔抵爭.
炒人魷竟然要人做埋通知期, 如果想即走就要自己賠錢 ! 遣散費又剩係跟足勞工法例, 對啲做咗好耐嘅員工, 連一毫子額外補償都冇 ! 長期服務金, 仲要攞人啲強積金去對沖 !
此事我會引以為鑑, 知道公司可以幾咁絕情, 而家有得挖就挖, 唔駛同佢客氣.
公司呢期大地震, 真係有排寫.
自從六月頭宣佈合併之後, office 個個人心惶惶.
大佬呀, 剩係見到 HR 同老闆, 日日喱埋房開會. 禁室培慾, 都成個月啦, 公司最新安排遲遲未有指引.
唔好話身有屎, 就算平時行得正企得正, 都會慌.
將啲部門撈亂骨頭重組, 留得低, 都唔知會比人派去跟邊個; 做阿頭嘅, 派着件蛋散跟自己, 唔啱咀形有排愁.
工作量唔駛多講, 原本 8 個人做嘅, 而家分分鐘 4 - 5 人要搞掂.
正當大家都震過貓王之際, " 潔癖 " 同事竟然擺出一副隔岸觀火嘅姿態, 話 : < 一早就應該炒晒 (亞太區) 嗰邊啲廢柴啦 ! >
哈, 咁樣話人哋, 你又知自己唔係廢柴 ?
呢個同事, 一直自我感覺極度良好, 覺得自己好叻, 好有作為. 喺公司做咗都 3 年啦, 開口埋口仲成日講住自己之前做過嗰兩個牌子點好點好. 人哋咁好, 你都走 ?
有病 !
有次同 HR 食 lunch, 講起有個 candidate 幾好, 會考攞幾個 A. 聽後, " 潔癖 " 好大反應, 9 秒 9 超級尖聲大嗌 : < 我都有 6 個 A 啦 ~~~~~~~~~~~~~~~~~~~~~~~~ >
6 個 A ?
喺公司同你上意文堂, 完全睇唔出你有乜慧根 bor, 聽同發音都唔準, 同班聰明過你, 理解力強過你嘅, 大把 !
總部 HR 大粒, 尋日終於喺 office 現身, 即係代表一切有所定案.
派完大信封, 就算自己冇份, 見到被裁同事嘅面口 ( 雖然有幾個係抵死嘅 ), 都唔會好受. 但潔癖食飯嗰陣, 竟然好興奮, 周圍八邊幾個比人炒咗, 問點解炒人可以咁靜, 佢乜聲都聽唔到.
簡直不知所謂 !
結果, 今日佢都變得好靜.
都係嗰句 :
" 今夕吾軀歸故土, 他朝君体也相同 "
今朝返工, 見總部 HR 大粒又出現, 一定仲有餘震, 估唔到原來係 " 潔癖 " 比人燉冬菇, 要 under 一個平起平坐嘅人 (佢認為人同佢同 " 呢 ", 其實大家都知道呢個人高佢好多班啦 !)
HR 話同 " 潔癖 " 宣佈嗰陣, 佢直情好似拍戲咁, 失控發晒癲, 乜失儀同 non sense 嘅野都做晒講晒出嚟.
呢啲, 咪就係 6 個 A 囉.
舒特拉的名單 ( Schindler's List ) 呢部廿幾年前嘅電影, 有冇睇過 ?
當年隨波逐流, 人去我去, 戇居居入到場先發現原來係黑白片, 頂唔順差啲想起身走人.
點知主角 Liam Neeson 一出場, 勁高勁有型, 立刻決定坐定定睇埋落去, 你話我係咪膚淺到極 ?
名單有好多種, 舒特拉攞住佢嗰張, 拯救咗好多猶太人. 但係有啲名單, 例如裁員名單, 相反地就可以致人於死地.
公司總部近排多事之秋, 竟然喺地區 ( 當然除咗我老闆 ) 毫不知情下, 上星期無啦啦突然宣佈合併亞太 / 大中華, 大鑊喇 ! 好聽就話 " 二合為一 " 更壯大, 其實大家心照, 最後咪就係裁員收科 ?
邊個去邊個留, 唔到我話事. 可惜身不由己, 好快已經捲入漩渦, 因為合併後嘅 office design , 由我負責.
由初頭隱隱瞞瞞, 到而家 " 醜婦終須見家翁 ", 雖則未開名, 但喺非官方但十分可靠嘅途徑, 得知最後 office 總人數, 簡單推理, 基本上已經計出亞太 / 大中華一共有幾多人會走.
諗住下一部推算每個 office, 邊啲友要起身.
點知今日已經收到進一步指引, 大致裁員名單, 呼之欲出 !
十居其九, 都係典型廢柴, 成日蜆口蜆面, 抵 L 死嘅. 但睇到有一兩個, 其實平時都 perform 㗎, 唔知點解會上名 ?
仲有兩位我覺得係超級 < 大毒瘤 > 嘅, 竟然有得留低 ! 莫名其妙.
後來醒起, 有幾次食 lunch, 同事都齊齊數臭某 manager grade下屬 ( 我認為嘅其中之一毒瘤 ) 點縮骨點唔掂, 一次兩次三次咁不停冼佢哋. 我話, 不如快啲做低條友, 請過個個新啦, 點知同事話 : " 唔好, 留番件野喺度, 孭鑊都好吖 ! "
哦 ...... 原來係咁運行嘅, 唔怪得毒瘤 有得留低啦, " 孭鑊 " 就係佢嘅價值.
姑息養奸, 如果最後為咗呢粒毒瘤而搞到個 team 冚包散, 唔好怪我冇提你喎.
通常喺 blog 寫出 trip 美食見聞, 今次改變吓, 寫難吃食物.
上次賴野, 係 2 年前喺公司意大利 office 嘅員工飯堂, 領教過一條人生食過 終極腥 嘅魚柳, 嗰陣腥, 我諗到我香嗰日都記得.
塊魚柳, 用鮮魚做, 因為雪藏魚係唔會腥嘅. 而且冇魚皮 ( 即係冇銀色皮 / 皮與肉之間嗰啲勁腥嘅紅色部位 ) ,都可以搞到咁腥, 我認為出事在煮法.
基本上, 廚房啲人完全無調味無添加地煮熟條魚, 唔知點整, 但一定唔係蒸煎炸同焗, 我懷疑係烚.
應該係晨早烚咗擺埋一邊, 臨開午市先攞番出嚟比啲熱燈照吓, 上到碟一啲都唔熱, 摸吓部啱啱講完嘅 iphone, 都仲熨過佢.
 |
| 金黃 |
 |
| Juicy |
可惜當場冇拍低條魚個款為證 ( 總之唔係圖片咁金黃同 juicy 啦 ), 因為我肯定如果有相, 睇你哋都可以睇得出條魚點腥.
望住碟野, 賣相唔討好不突止, 仲要完全冇味道, 味如嚼蠟.
見同枱意大利人勁洒鹽又落油, 有樣學樣. WTF ~ 原來橄欖油撈魚腥會搞到腥上加腥, 勁難食, 但佢哋又好似完全冇野喎.
唔係講笑, 可能食嗰陣頭髮揩到, 搞到成個頭都有陣腥味. 最大鑊係口裡面嗰陣腥嘅感覺, 狂刷牙都唔掂, last 到第朝起身都仲有.
前日喺上海, 不幸遇到另一奇腥無比嘅食物.
大家覺得下面呢盆係乜呢 ???
我都唔知.
呢盆 " 海鮮 " 上到枱, 基本上擺咗 10 分鐘都冇人夾嚟食. 成盆油, 甩皮甩骨, 十足食完嘅餸頭餸尾倒埋一碟 (事實上, 味道真係差唔多).
好奇心驅使, 夾咗一條魚同一隻蝦仔試吓.
望落似多春魚之類, 點知完全冇肉, 又腥又苦, 勁多幼骨, 刺親個口. 隻蝦仲差, 索晒啲魚腥, 一擺落口仲比個死人蝦頭再刺多吓, 已經無名火起三千. 點知再咬落去啲滾油 '必' 晒出嚟, 辣親條脷. 我頂, 真係要 claim 工傷 !
最諷刺係點呢個菜條 PK, 自己一啖都冇食過.
唔得, 以後食飯要行問責制, 有乜滯銷 / 食剩, 邊個點, 邊個要自己認頭食番晒先得 !
上星期五 19 May, 係我喺公司三周年嘅日子. 同同事去食咗餐豐富少少嘅午飯慶祝, 席間大無私樣, 許咗個願 : 希望唔會留多過 5 年.
星期日沙田賭馬, 同行某退休名牌掌舵人, 曾經叱吒風雲嘅霸氣女強人, 聽到我做咗三年 " wa~ " 咗聲, 跟住話 : " 你好野, 咁都得 ! ". 初頭唔知佢讚我定寸我, 後尾 sense 到佢真心覺得我好野, 喺咁難頂嘅 brand 捱到 3 年. 原來公司喺其他品牌心目中嘅形象真係差成咁.
捱 ?! 我話 " 忍 " 仲貼切.
 |
| 80s 年代圖像 - 參考only |
公司嘅落後同混亂程度, 慘不忍睹. 近期 ad campaign ( 唔知有幾多人留意到 ) 口號 high xxxx high tech 嗰啲圖像 out 爆, 老土陳舊, 80 年代到不得了.
睇埋嗰段公司覺得極為 < 創新 ! >, < 突破 ! >, < contemporary ! >, < high tech ! > 嘅短片, 真係呆 L 咗, 足足 5 分鐘諗唔到野.
今日聽同事講, 隔離房 " 潔癖 " 而家好積極咁準備緊個 PPT presentation, 而呢個 presentation 唔係 for 任何嘅會個 bor.
冇人要或者想睇個 presentation, 究竟佢整嚟做乜 ?
原來佢想向大家 ( 最主要係老闆 ) 宣洩不滿, 因為佢覺得自己一直都 < 為他人作嫁衣裳 >, < 被屈 > 去幫其他人做緊啲唔係自己工作範圍嘅事, 條氣好唔順, 要整個 presentation 去向各界澄清自己應做嘅工作, 平反, 確認自己喺公司嘅地位, 價值.
真奇怪, 年幾前公司飯局 ( 人哋冇請佢, 佢自己死跟住去 ) 當晚比條意大利老坑 ( 仲要唔係高層 ) 搭佢膊頭, 佢覺得人哋鹹豬手抽佢水, 返到 office 四周唱.
咁我話, 如果條麻甩佬咁淫, 你又唔閃, 比人鹹濕成晚 ? ( 心諗 : 一個願打, 一個願捱 )
佢話 : " 做得意大利公司, 預咗㗎啦 ! "
果然世風日下, 道德淪亡, 當個 brand 係跨國賣淫集團.
我建議你個 presentation 不如簡潔啲, 白啲, 澄清 " 呢啲 (鹹濕) " 先至係你工作範圍啦.
好明顯, 條女精神, 思想, 同態度都勁有問題.
天呀, 唔可以再同呢啲人相處太耐, 我唔要變成佢哋呀, 要快啲走呀 !!
唔怕生壞命, 最怕改壞名
以前超級名牌集團, 其中一個 L 字頭品牌, 其實啲貨幾唔錯, 但做極都唔起, 無論總部投放幾多資源, 心血, 始終谷極唔行.
無他嘅, 我覺得係改壞名囉.
人哋 L 字頭, 佢又 L 字頭, 但係佢嘅串法兩個響音 ( e - o ) 走埋一齊, 好難併音. 我都係入咗公司, 老闆教先識點叫. 同人講起呢個牌子, 90% 以上都唔識讀, 或者讀錯.
其實集團另一品牌, 仲多響音, 有齊 o - u - i , 但吹咩 ? 生意同佢差天拱地, 點解 ? 個朵易記囉, 牌子字頭簡寫 " 乜 V ", 文盲都識啦 !
除非喺網頁 / 電視狂賣廣告洗腦, 試問一個冇人識讀嘅品牌名稱, 點會有 attention, 有 noise ? 就算有人提, 但都永遠叫錯, 如同返工, 老闆硬係叫唔出或叫錯你個名, 你覺得會有發圍咩 ?
同埋我發現, 認識嗰啲標奇立異, 改啲懶特別名嘅人 ( 例如 : Tramp, Sinner, Lick ), 際遇果然人如其名, 好極有限.
唔該英文唔好, 就學人查吓字典, 瞭解個字解乜先用.
有人唔識英文, 有人就識過龍, 驚死人唔知自己有文化.
睇雜誌 < 過氣玉女 > 啱啱生咗, 竟然同對孖仔改咗拉丁文嘅天主教聖人名, 當正自己屋企係梵蒂岡.
係 ex-玉女啫, 又唔係聖母, 真係以為自己生嘅係耶穌 ?
Ignatius, Aloysius...... sorry, 我才疏學淺, 真係唔知點發音先啱.
有冇諗過咁離地, 咁高深嘅名, 對你對仔以後嘅生活, 會帶嚟好多不便同麻煩. 喺嚟緊嘅日子, 佢哋一定多得你唔少.
今個月 ( 5 月 ) 有兩次 < 請 1 日 = 放 5 日 > 嘅大好機會, 絕對不容錯過 !
查實一連 5 日假期, 都係騎吓馬, 劈吓酒, 喺屋企天然呆, 雖然浪費時間, 但點都好過屈喺黃竹坑 office 鬼地方, 又或者去行街食飯, 駛錢仲要同人爭, 同人迫.
尋日發呆發到咁上下, 喺電視睇到 Big Boys Club 宣傳片, "馬菲" 做嘉賓.
"馬菲" 原本係個做救護員, 又有陰陽眼嘅業餘寫手, 喺網上發表有關前線救護工作嘅 post, 大受歡迎, 而家上岸唔做救護, 正職出書, 好厲害.
重溫佢啲 post, 唔係全部講鬼, 就算係, 都係聽到耳邊有人講野, 或者睇到啲黑白影之類 ( 佢係堅, 因我後生見嘅都係咁上下, 只有一千零一次見到實體 ). 反而, 佢寫屍體發現 / 處理嗰啲仲恐怖 ( 比起我消防 friend 做新仔嗰陣, 啲人跳樓要去搵眼珠, "馬菲" 嗰啲再驚嚇少少 ).
最好笑係同事有乜鬼靈精怪都搵佢出頭, 陰功. 佢不斷重申自己只係陰陽眼, 唔係法科師傅, 同埋有時見到 " 嗰啲 " 都會驚 ! 無論點澄清, 啲朋友買樓都堅持佢上去睇吓間屋有冇野, 好在原來香港啲屋, 十居其九冇嘅.
講起睇樓, 屋我就冇錢買喇, 但租都有啲經驗 : 入到屋, 第一感覺好緊要.
試過十幾年前, 喺跑馬地鳳輝臺睇個單位, 三面單邊, 成屋窗, 但唔知點解, 就算開晒燈仲係好暗. 唉也...... 呢間唔租啦.
再睇, 跑馬地真係奇形怪狀乜都有. 最後有間喺山村道養 x 醫院對面, 間隔 / 價錢 / 景觀都 ok , 雖然對到醫院正一正, 冇所謂, 因平時都喺養 x 睇啦, 呵...... 入伙冇耐, 請家人朋友嚟屋企, 當時六月尾, 但個個坐坐吓都叫我較細啲冷氣.
大佬, 根本都冇開 !
諗諗吓, 有啲唔對勁, 嗰間絕對係西斜屋, 夏天冇理由會涼, 請咗個風水師 set 咗啲陣, 之後成間屋當堂 warm 晒.
好多人話住墳場醫院隔離, 陰氣重, 其實見仁見智. 我住咗 4 年, 升咗 3 次職, 同埋基本上 4 年間睇病次數少於 3 次, 諗番都覺得奇.
咁老黎, 除咗風水, 唯一解釋就係 個人努力 同 年輕 (強健體魄), 但我覺得一定唔係囉.
上年八月, 無啦啦屎忽痕走去睇樓, 大埔豪宅屋苑, 有 " 三疊水 " 之名 ( 瀑布 + 泳池 + 吐露港 ) 嘅 x x 山.
地產經紀話同座頂樓兩層一梯兩伙 4 個單位都係同一業主嘅, 有兩間 available. 搭𨋢中, 經紀仲話業主喺同區仲有 10 幾個樓盤, 如果有興趣, 可以問吓邊間未租出, 去睇埋. 第一反應 : 人哋咁大把, 自己毛都冇條, 正一少年不努力, 老大徒傷悲. 唉......
上到頂樓, 電梯門打開, 業主兩夫婦竟然親自恭候 ( 註 : 間屋冇傢俬吉嘅, 業主係特登去預先開冷氣同開門 ). 嚇一跳, 心諗 ...... 租 ju bor, 唔駛咁高規格嘛 .
入屋唔夠 5 秒, 已經心感不妙, 天旋地轉. 其實單位唔錯, 景觀又開揚, 但唔知點解, 周身唔聚財, 直覺嗰度住不得. 跟住再睇附近幾個單位, 根本都 " wing*** " 到集中唔到, 草草了事.
*** 首先要澄清, 當時我完全未飲酒.
最搞野係個地產臨走前帶我走去睇嗰條出晒名嘅瀑布, 望住潺潺流水從上面一舊舊大石流落嚟, 諗起當年景象不寒而慄, 暑氣全消.
車我返歸途中, 仲講佢同事喺大埔太和 x x 花園夜晚帶客睇樓喺騎樓聽到 BB 喊, 唔知係中暑定嚇親, 返到屋企好 Q 暈, 再天旋地轉多兩三個鐘, 先覺得好啲.
當晚地產經紀 follow-up 打嚟會報, 話業主好 like 我, 話如果冇乜其他可以隨時簽約. 其實個地產同業主亦都好 nice, 但真唔得. 好坦白同地產講, 我唔租喇, 因為 feel 到間屋有野.
事隔幾月, 都淡忘咗件事. 有日睇東方頭條, 有對年輕夫婦買樓買到凶宅, details 唔記得, 總之就蝕晒辛辛苦苦儲落嘅幾十萬訂, 好慘啦.
心血來潮, 唔知做乜突然上網搜尋, 度度唔打偏係打咗 < 大埔凶宅 > 四個字. 嘩 ~ 好快, 就搜尋到我睇過嗰個單位 : x 座 x 樓, 原來 2004 有人喺度跳樓 !
 |
| 香港凶宅 |
