再見螢火蟲

Wang Hinghoi  王興海 ? 汪慶海 ?  相信大部份人都會覺得呢個係中文人名嘅英文拼音.  

如果喺 google search 曼谷食肆, 一定會以為 Wang Hinghoi  係中國菜手快快 skip 咗, 根本諗唔到 Wang Hinghoi 原來係泰文 วังหิ่งห้อย ( 螢火蟲宮殿 ) 嘅英文發音.


https://www.wanghinghoi.com/en/

食足幾日決定繼續都要食好啲, 誤打誤撞喺網上摷到呢間以螢火蟲做主題, 期間限定 pop-up 餐廳.   雖然喺曼谷蒲區 RCA 左近, 但地點唔顯眼, Grab 司機連睇導航都唔識, 兜嚟兜去成半粒鐘都去唔到, 我哋唯有落車行, 黑麻麻喺馬路邊走過去, 險象環生.

泥牆

終於到達目的地, 四野冇人但有一發光物體, 再行近啲, 原來係 5 米高泥牆做成嘅長廊, 通往餐廳入口, 非常有氣勢. 


餐廳入面神秘又浪漫, 燈光亮度只能照到枱面碟菜, 點解咁暗 ?  因為用餐區心臟地帶有個落地玻璃圍住嘅小樹林, 裡面養咗螢火蟲, 所以要 dim 暗啲燈唔好 " 𥋇 " 親佢哋.

玻璃外小樹林

現場除咗散發住陣陣大自然幽香, 仲有兩女一男 acoustic live band, 歌聲飄逸, 感觀享受非筆墨可形容, 只能 conclude 如下 :   

"...... 若然早啲發現呢個地方, 一定會施展渾身解數極力推薦各界友好, 親身飛去曼谷體驗吓......"

iPhone 捕光兩秒先影到嘅用餐區

香港除咗胡慧沖同 kknew.cc, 根本冇人介紹過, 可惜呢個非凡體驗而家想要都冇, 因為餐廳只經營 18 個月, 現在已到尾聲, 快要關門了.

甜點 + 雪條

冬蔭功 👍👍👍

主菜 Duck Confit

各類頭盤

Amuse bouche

10 道菜 tasting menu 以 [ 金 木 水 火 ] 為主題 ( 唔知點解冇 [ 土 ] ), 造型別緻, 連冇食 N 世嘅爆炸糖都可以在此一嚐.

爆炸糖沙律 ( 唔係甜品 😙 )

火燒蜜蜂竇

成晚其中一個高潮, 就係個要攞藍色火 ( Maa Jai Dum 烈酒 ) 淋落去灼嘅頭盤, presentation 夠晒 dramatic.  

火燒完望吓, 舊嘢一個個六角形, 應該係蜂窩掛...... 咦 ~~~~ 咪住, 點解六角形裡面, 有一條條白色肥腯腯, 疑似肉蟲嘅物體嘅 ?  問吓侍應, 頂 ~ 原來真係 larvae ( 蜜蜂幼蟲 ) 嚟囉 !  OMG 嚇得頭皮發麻, 腎上腺素飆升 !!

九秒九將碟嘢移開視線範圍, 可憐朋友已經咬咗啖, 唔掂呀好驚, 要叫侍應收走.

恐怖肉蟲 close up

好在跟住再冇嚟啲騎呢食材, 論全晚最好吃, 唔係主菜, 反而係啲 amuse bouche, 頭盤 ( 除咗肉蟲 ), 沙律, 尤其個冬蔭功番茄蟹肉忌廉濃湯, 非常有 character, 係食完會令人回味嗰隻.

螢火蟲房間 daytime 樣貌 ( 網上圖片 )

話明螢火蟲宮殿, 梗係唔只食咁簡單啦, 喺用餐區後欄有個神秘房間, 推門而入伸手不見五指, 定神望吓, 又唔係完全漆黑一片, 有啲超微弱嘅光點喺度閃吓閃吓.  再望真, 玻璃窗外小樹叢原來有大量螢火蟲, 過百隻喺空中飛舞, 畫面真係靚到好似發緊夢 ( 同下面幅 " 再見螢火蟲 " cap 圖一模一樣 ! ), 可惜手機影唔到呢個高潮中嘅高潮 😂.

再見螢火蟲動畫

房內原來仲有兩張 loveseat 比情侶坐低慢慢睇, 跑番出去再 order 多支檳, 邊飲邊睇, 雙重享受.

新春大茶飯

恭喜發財 !!!!!!!

踏入 2020 懶過條蛇, 剷都唔郁, 除咗飲酒真係乜事都提唔起勁, hea 吓 hea 吓不經不覺就一月尾.   

年三十晚出發曼谷一遊, 而家咁嘅形勢, 可以拋開煩惱行開吓絕對係件好事.  今次因為係後來加入, 所以行程就按朋友喜好, 日上三竿, 中午後先開始出行, 個人激愛嘅 military agenda ( 晨早溜溜起身 + 一浪接一浪嘅活動 ) 完全拋諸腦後.  唔知係咪年頭 hea 到個人 " peh " 咗, 喺曼谷幾日竟然可以瞓到成 7:45am 先起身, 真犀利.

大年初一食好啲, 整個米芝蓮  !

其實未去過 BO.LAN http://www.bolan.co.th/2019/?lang=en.  , 都係搏一鋪搵大家嚟教飛.

妖人迎賓

先望吓呢個不男不女妖人造型, 咁有睇頭嘅迎賓, 就知間嘢係非池中物吧 !

報到後, 迎賓冇立即帶我哋就坐, 反而叫我哋喺前廳安頓, 同其他客人齊齊坐低飲杯冰茶, 吃泰式小食 warm-up 住先, 當各人選好食物同飲料後, 就分批帶入廚房, 話廚師有 surprise 喎. 

一羹飯 surprise

乜驚喜呢...... ?  

原來係每人一匙羹飯, 咬完再整片菠蘿 😂  咁當然唔係普通米飯咁簡單啦, 好有香葉味道嘅, 可惜我食力低, 吃完羹飯已經飽飽哋.

雞尾酒

 



破格頭盤竟然係一 part 超級無敵 40% 酒精雞尾酒 ! 配埋塊青芒果, 又酸又鹹又辣, 旁邊一支口味偏甜嘅 spray, 用嚟清口.  杯嘢其實激 " 啃 ", 飲完個口同喉嚨好似比火燒咁, 好彩支噴霧幾使得吓, 噴落條脷又覺得幾 ok.

一杯乾完還顧四周, 原來人人只係養金魚, 得我一條友 on 9 9 飲清 !

青芒果又鹹又辣, 服務員話飲完再噴旁邊支 spray 落條脷度, 可以舒緩烈酒嘅味道.  杯酒實在相當 " 啃 ", 搞到成個口同喉嚨好似比火燒咁, 不過噴咗支嘢幾吓又好似 work 喎.  環顧四周, 原來個個都養金魚, 得我一個 on 9 9 干晒成杯 lor 😅

Amuse Bouche

" 飲 " 完頭盤, 輪到 amuse bouche, 服務員泰式英文介紹聽得一頭霧水, 應該係咖喱蠔 炸豬肉 魷魚 糯米飯 😜.

緊接落嚟一次過上晒嘅主食 : 苦瓜豬腩肉, 咖喱牛, 炸魚, 勁辣魷魚沙律, 鴨肉鴨紅酸辣湯, 配上原始口感發芽米 ( gaba rice ), 正到爆 !   將泰式料理包裝得如同日式懷石, 味道優雅細緻有層次, 最欣賞個扑扑脆炸魚同鴨肉鴨紅酸辣湯, 夠晒重口味, I like.

用餐踏入尾聲, ( 我唔食嘅 ) 甜品時間到喇, 觀賞完朋友食兩個佢哋話好好好好味嘅珍多冰糖水, 服務員就帶大家出去等候區梳化坐.  

以為係等埋單啦, 點知未喎, 原來廚師再出動, 喺我哋面前做煙燻花生糖同埋 show 咗盤多到令人望而生畏嘅泰式甜點出嚟.  好彩唔駛食晒 只係喺裡面任揀幾款, 嚇得我......

認住呢隻鷹

早幾日 boxing day 出席朋友生日飯局, 每年朋友哥哥都會非常大方同席間各位分享一支私人真藏, 前年 Lafite 上年 Le Pin, 今年係支美國酒. 
 
成枱 12 人, 其實每人只可以配給啲啲 (750ml ÷ 12 = 62.5ml = 量杯綠色線), 到喉唔到肺, 飲咗等於冇飲. 

至於支來自美國加州嘅紅酒, 叫 Screaming Eagle ( 嘯鷹 ), 剩係聽個名就知勁啦.  支 2008 vintage 數年前用 HK$ 13,500 買而家升值到兩皮幾, 即我嗰兩啖 [ 飲咗等於冇飲 62.5ml ] 已經值成 HK$ 1,875.

值唔值 ?

比其他美國酒飲落的確有啲 complexity, 但都係擺脫唔到嗰陣膠味, 得罪講句, 我唔覺得隻酒有aging 潛力囉.   可能我見識少, 唯有請教朋友嘅大佬, 點解支酒要咁貴, 佢話 : 似法國酒囉, 同埋 Robert Parker 比 99/100 分嘛.  吓 😧 ?!

條氣唔順, 上網摷吓隻酒憑乜資格可以賣咁貴, 摷咗好耐, 來來去去都係 : 產量小, 唔易買到 ( scarcity ) 質素高 ( high quality ) 同埋 Robert Parker 比 100 分...... 呢啲完全冇 substance 嘅原因.   High quality ? 點樣 high 呢 ? 同邊個比較 ? 人才 技術 物資 釀酒方法 非常特殊嗎 ? 根本都無實質說明.

全晚最爆笑, 係朋友大佬成晚吹噓自己比咗 5 百幾蚊人仔 ( 佢住上海 ) 上咗堂品酒課, 學識好多, 話紅酒其實完全唔需要醒酒 ( decant ), 會破壞酒體.  心諗, 教嗰條友乜水呀 ? 唔識就咪誤人子弟啦.  醒唔醒, 最基本要睇年份 乜酒 幾時飲 點飲 同 來自邊度嘅酒囉.

最緊要老黎

今日係一年一度冬至大日子, 冬大過年, 技術上計算, 冬至係同新一年嘅交接點, 非常重要.  

以前唔知就冇得搞, 但自從得知 [ 冬至當日際遇如何, 來年運程勢必如何 ] 呢個重要秘訣後, 每年冬至我都會請假龜縮, 留喺屋企避免外出, 將遇到 / 發生勞氣同不幸嘅機會減到最低.   

同埋當日要過得有咁休閒得咁休閒, 將所有事情簡單化, 保持心情愉快, 飲靚酒食好西善待自己, 鋪路來年可以過得老黎同自在啲.  So far 又好似真係幾 work 喎, 有興趣嘅朋友, 可以喺下年開始試吓, 睇吓得唔得 ?