巴黎躺平再彈起

巴黎好彩冇限電令, 酒店房暖笠笠, 搞到晚晚都好好瞓, 尋晚仲破記錄瞓到成 9 粒鐘添, 真係好耐都未試過 !  其實可以再晏啲, 不過晨早 5 點幾睇咗個 whatsapp 之後就極度 hyper 再瞓唔番.

做乜咁高興 ?  因為我條賤 ex-老闆 ( 乞兒 ) 俾人炒咗, 三月尾到期, 咁佢當然同人講話係自己辭職啦, 想多啲時間同家人一齊喎, 我呸 !  上年已經出公數飛咗歐洲成 4-5 次同家人見面, 仲唔夠皮 ! ?  

條友乜都唔識所以乜都唔做, 喺香港擺明呃飯食, 呃都唔緊要, 唔好煩到我就得, 點知條乞兒老虎頭上釘蝨乸, 做埋佢嗰份倒轉頭仲要受佢氣俾佢大支嘢串串貢.

條氣 chok 咗 : 足足成年 !  

 

同自己講, 無論如何一定要忍, 要親眼睇住乞兒點收皮.  

 

今日終於願望達成, YES 💪💪💪

可能 covid 關係巴黎變咗好多, 變得好悶好平凡, 好多特式小店都執晒笠, 剩低嗰啲都係香港有嘅連鎖法式品牌, 行兩日街行到腳痛都買唔到心頭好. 發爛渣, 都係返酒店躺平 : 飲吓酒, 睇電視暖吓好過 ( btw, 法國電視幾好睇㗎 ).

今日呢個喜訊俾到我好大激勵, 嗱嗱聲仆出去買香檳同魚子醬, 嚟個自 high mini-party 先 🥳🥳

羅馬辣招

熟我嘅人, 都知我最鍾意啲又殘又舊嘅嘢, 意大利羅馬完全符合條件, 係我心中嘅天堂.

點知天堂原來由 2022 年尾開始有限電令, 每戶每日最多只可以開 10 粒鐘暖氣, 即其餘 14 小時 ( 強制性包括晚上 11pm 至第朝 5am ) 要完全熄機, 真係著羽絨瞓都唔掂 😦.

咁啱, 我喺意大利全年最凍嗰 3 日 ( 3 giorni della meria / 3 days of the female blackbird ) 到訪, 咁橋, 住嘅係私人樓宇, 受限電令限制 !  

樓底高暖氣升晒上天花, 我呢類身短哈比人, 唯有忍受沉積喺地面嘅冷空氣, 奇凍無比, 之前喺街見有羽絨褲賣, 心諗邊個著, 而家知答案啦 😆

可幸是呢幾日羅馬陽光普照, 心理上感覺還好, 如果好似早排落雨, 喺街又凍, 喺屋企仲凍 😂, 死得.

更好彩嘅, 係俾我喺衣櫃摷到個小型電暖爐, 冇暖氣期間可以頂到吓.

過兩日去巴黎, 而家好驚法國會唔會又行呢招, check 咗好似冇, 希望真係冇.

文藝復興之西人西面

前晚係 Florence 之旅最後一晚, 食咗好無奈嘅一餐, 乜料 ? 

同枱食飯嘅舊同事, 由一坐低就開始發脾氣啦, 乜都睇唔順眼, 話餐廳氣氛完全令佢 relax 唔到, 餐牌又鬧, 侍應又鬧, 遊客多又鬧, 啲枱擺得密又鬧, 隔離枱講嘢笑吓又𥇣住人, 好似同人有仇咁 😂.

西晒面, 不滿情緒毫無保留地表現出嚟, 完全當我死嘅 !  

最搞嘢個地方係佢自己揀個喎, 之前上網睇搵唔到有乜特別之處, 裝修又老派, 俾著我一定唔會去, 不過見佢強力推薦唯有勉強一試, 點知佢喺度發癲, 搞到周圍啲人望住晒, 咁勁, 學人反枱 storm out 囉 !  

叫佢飲多幾啖酒冷靜吓, 唔好再喺度嘈失禮人. 情緒稍為平伏後, 佢話個地方連自己都未去過, 吓, 咁你又講到好正話一定要試 ?! 

老實講, 間嘢唔係咁掂, 但又冇佢數到咁不堪, 起碼食物味道還可以, 唔係喇, 都係快啲隊晒支酒跟住埋單走人.

倫敦百美

🎇🎇🎇 恭喜發財 🎇🎇🎇

來到歐洲第 5 日仍在 jet lag 中, 無論之前嗰晚玩得幾夜幾攰, 第日晨早四五點就自然醒, 仲要係好醒好生猛嗰隻, 真吹漲 !  無所事事, 今朝開支白酒飲吓上吓網, 不經不覺, 七點都未夠已經成支隊晒.  

Kate Middleton 喺英國應該算喺極品 !

 

 

 

 

 

剛剛去完久別從逢嘅倫敦, 再次感受到英國女人嗰種醜 😳 , 唔靚 😳 , 影響市容 😳 都唔係罪, 最攞膽喺佢哋著衫風格.

唔使多講, 睇圖 😳

外面零下幾度, 搞乜要除晒衫唧晒啲肉出嚟 😳 ? 食 lunch ju 喎 !

如果靚女,  咁大方派福利, 真係冇人會介意, 但佢哋 ...... 😳

倫敦 4 日之旅扭盡六壬食盡好嘢, 尋日, 飛意大利喺倫敦機場 ( London City Airport ), 終於面對倫敦人日常飲食真相 !  下面碟傳統英式早餐, 喺香港一定夠晒資格上 [ 中伏飲食報料區 ]. 

我係雞蛋控乜 Q 蛋都食, 但見到煮到椰菜花咁款淨係得忌廉味嘅碎蛋 😳 , 加上天狗食月好似比人咬咗啖嘅薯餅 😳 

同埋我唔知英國早餐原來會上埋甜品 :  甜過紅豆沙嘅茄汁焗豆 😳   突然, 好掛住麥當勞.

You are what you eat --> 英國女人 self-explanatory 😳

大迷信 2023 _ 加推

下午剛剛上完風水實戰堂, 即場師傅同學互動 Q&A, 穫益良多, 不過我覺得最正, 就係查證到一個假設係正確嘅 :  屋如其人 | 人如其屋

屋主就係之前提過, 一個極度迷信, 攞個成尺大八掛鏡比師傅開光嘅同學, 佢係馬拉華僑, 後生, 仲幾靚女添, 純品, 易信人, 可惜思緒混亂魂魄唔齊, 講嘢時常跳制.  好在我哋班人夠正氣, 如果遇着班淫棍, 實行一早比人呃去性交轉運.

一入屋以為去咗睇地盤, 全屋啲牆爛笪笪, 大門同廚房門框竟然完全未裝, 啲框棟晒喺度 😮   靚女同學話半年前裝修爛尾師傅走咗佬, 佢又再冇錢去搵其他人執屎 ( 手尾 ), 所以就一直喺間爛屋住.  

廚房貌似正常, 點知望真原來係冇燈嘅, 因為裝修師傅冇同佢完成安裝 !  佢話晚黑如果要喺廚房攞嘢, 就要用 iphone 嘅電筒照明, 唔係掛 ?! 😨

最搞嘢係原本廚房裡面嘅爐灶比啲門框同裝修物料擋住晒, 行都行唔入 ! 唔怪得同學要另起爐灶喺個廳用電爐煮食啦.

奇景, 今日真係大開眼界 !

結果師傅同男同學頂唔順, 得到事主同意下幫佢大掃除, 抬晒啲裝修廢料落樓下垃圾房棄置, 夠晒義氣吧.

最令人費解, 係唔知點解靚女同學一直對屋外三條老鍊咁遠嘅 天斬剎 耿耿於懷.  師傅話會有影響, 但因為咁遠影響不大, 但靚女完全聽唔入耳, 只係不斷將佢不幸經歷 ( 喪父, 失業, 莫財, 冇朋友, 屋企漏水落樓下 ) 入晒 天斬剎 數 😆

遠方天斬剎

計我話, 遠方 天斬剎 嘅影響, 絕對不及佢間甩皮甩骨屋嚟得應, 致命傷係廚房 !  女仔之家廚房一塌糊塗, 廚房係女主人舞台, 爐灶亦代表屋企嘅財嘛.  雪上加霜, 係佢咁不堪嘅廚房又咁啱坐落喺屋企嘅西南方, 風水學上西南方又係女主人方位, 兩件事加埋, 真係想有運行都難 !

不過最令我 O 咀嘅, 係師傅問個鞋櫃喺邊, 靚女答 : 我得一對鞋咋, 所以冇鞋櫃.  一對鞋 ? 條女...... 乜人嚟㗎 ?! 😱

齋睇間屋唔使開羅庚, 都知女同學點解成個人會咁遊魂.

大迷信 2023

近期參考 youtube 一眾香港風水名師 2023 家居風水開運建議, 再對照吓自己起嘅盤, 原來唔係差得太遠, 好彩冇讀屎片嘥晒啲學費啫 😆   

呢排發錢寒, 所以特別關注財運 💰 議題.  

唔可以用蒸餾水

要旺 💰, 最簡單方法當然係搵出屋企基本財位 + 流年財位當旺位, 然後去催谷吓啦. 

喺一間屋邊度 " 立極 " ( 即整個空間正中心點 ) 同找出正確東南西北方向, 係一種學問, 唔係靠睇吓邊邊日出日落, 或者攞部 iphone 指南針咁簡單.

講番催旺方法先, 由 [ Peter 蘇 ] 話齋擺杯水, 到 [ jok 邪 jok 鬼大迷信 ] 件件賣成千蚊以上嘅加持聖物都可以.

紅色蟾蜍頭要向屋內

我就當然主打低成本 :  擺水啦.  

不過諗諗吓, 又忍唔住要加對貔貅, 一個聚寶盆, 一隻紅色蟾蜍, 一舊白玉大石春, 再整棵水種植物係大門旁邊,  嚟個十面埋伏 😆😆😆😆 . 雖然濫, 但有殺錯冇放過, 如果搏中是但一瓣就掂當 !  

同埋咁多樣嘢加埋唔使三舊仲包埋送貨, budget-wise 完全接受到.

聚寶盆要放貔貅前面

好多師傅話立春 2 月 4 後先開始擺, 但我上堂個師傅就話其實冬至後已經可以擺來年風水陣. 

我份人咁心急, 喺聖誕前已經搞好晒, 唔係講笑, 好快見效 : 

1. 上年 30 Dec 去朋友公司 annual dinner 抽到其中一個大獎, 潮牌手袋一個, 價值皮幾嘢.

2. 前晚六合彩中咗 4 個字 😂  我知好少錢, 但真係好耐好耐好耐冇中過, 對上一次差不多 10 年前中 3.5 個字, 之後一直食白果, 今次都叫做有啲進步吖 😆  

小食神

浪接浪, 又有朋友離港了, 尋晚又出嚟食 farewell 飯, 又係去好難訂嗰間 Bxxxxd.

特別嘉賓係位眼仔碌碌嘅 8 歲小朋友, 咁細個就要出嚟行, 混喺成班阿叔阿嬸中, 但似乎佢見慣大場面, 成晚一啲怯場都冇.

小朋友已經係第二次被邀請出席, 因為我哋想睇表演 😂   皆因佢對食好有天份同非常之有要求, 聽佢精準地分析菜式材料 / 烹調手法, 唔使睇你班人面色嗰種老實不客氣嘅評價, 過癮 ! 

童言無忌, 永遠精彩 !

訂位嗰個唔想用腦所以 pre-order 咗 tasting menu. 不過一睇個餐牌就唔係幾開心, 因為 5 道菜當中 3 個竟然有我最怕嘅 : 黑松露 | 番茄 | 熟帶子.

之前講過嘅 魚子醬贏在起跑線 論 http://shirliek.blogspot.com/2022/10/blog-post_28.html, 唔好意思, 今日要收回, 因尋晚碟 [ 魚子醬 . 昆布 . 天使冷麵 ] 收咗我皮 !  九唔搭八, 整 pet 魚子醬落去都唔知為乜 ?!  啲臭狐味黑松露油完全騎劫咗碟嘢, 成口油, 但一啲魚子醬味都食唔到.

跟住貌似 pizza 造型嘅 [ 日本番茄 . 布拉塔乳酪撻 ], 掂都冇掂過就直接請咗肥仔朋友食.

再嚟嘅 [ 法國黃酒 . 北海道帶子 . 鱒魚卵 ], 牛油落得太重手, 食咗一舊, 好膩, 頂唔順, 俾埋肥仔.

食到差不多尾聲, 所有成人外出呼吸新鮮空氣, 剩低我同小朋友, 乘機訪問吓佢對當晚食物意見.  佢話還可以, 但都係上次嗰間好啲 ( 果然識貨 ! ), 成晚最好食係個佢食唔飽而後加嘅薯條, 但唔鍾意啲秘製茄醬, 因為加咗 tabasco 😆 

小朋友, 服咗你, 你真係堅 !  等多 10 年應該可以同你一齊出動, 飲好嘢 🍷🍷🍷🍷🍷🍷