勇闖西洋會

托酒友洪福, 上週二有幸到中環 Club Lusitano 食飯, 佢樓下嘅 Beef Bar 同 Castellana 去唔少, 真正入 Lusitano 西洋會裡面見識其實第一次.

酒友預告應該係包場, 因 book 咗 27 樓嘅場地當晚冇其他會員訂枱, 可以玩晒. 

去到, 原來係會所 ballroom 😆, 三面全高玻璃窗被中環高廈同半山景色包圍, 得我哋一張枱喺中間, 好有氣勢呢.

酒友亦照顧周到, 預早安排 10 款葡國酒 pairing winelist 同埋唔計芝士甜品合共 9 道菜嘅菜單, 唔只酒有驚喜, 連食物都煮得好好味添.

一如以往除咗酒, 食我大部分時間都係 "淺嚐", 尤其啱啱去完泰國喪食, 食到而家連豬都冇我咁肥, 要收斂吓.

純粹個人口味, 當晚最值得回味係 36 個月腌制火腿, 炸鱈魚餅, 銅鍋海鮮飯同 piri piri chicken ( 霹靂霹靂烤雞 ).  我懷疑烤乳豬全體同 tomahawk steak ( 斧頭扒 ) 都應該非常唔錯, 但成晚連環劈成肚水, 真係已經再無福消受.

咁多好嘢食連埋酒每位都唔駛 hkd1,300, 真係好抵 !  成班玩得盡興, 雖然對部份談話內容自己已經冇晒印象 😂

消失的好地方

呢刻行雷同暴雨, 夠晒氣氛懷念吓香港已經消失嘅靚餐廳.

M at the Fringe

M at the Fringe - 第一份工返中環蘭桂坊 California Tower, 對附近一帶特別有情意結, 藝穗會 ( Fringe Club ) 百年歷史建築, 地面層又有名牌傢俬店 Le Cadre Gallery 進註加持, 成為 90 年代設計文化人士流連之地.   

藝穗會 M/F 嘅 M at the Fringe : 有啲跣嘅實木地板 + 意大利藝術批盪油漆 + 牆身若隱若現裸男素描 + 每盞造型不同嘅黃銅燈飾, 古典得嚟又帶點 raw, 個人認為真係靚到不得了 !  基本上幾廿年後喺香港根本再搵唔到任何地方可以媲美, 可惜網上圖片少之又少, 幸好找到 [ KC 賞味隨筆 ] 嘅 blog 俾大家參考. https://gourmetkc.blogspot.com/2009/11/m-at-fringe-m.html

Green T House . 我當年用爛鬼手機影嘅相 😜

第二個地方係數碼港 Green T House 紫雲軒 - 佢哋 2000 年代喺北京好火, 火到要過嚟香港開分店.

餐廳 4 千幾呎環境闊落, 但做生意竟然只得一張長枱, 其餘傢俬都係 display, 冇實際用途 😂.

fb 版面用求籤靈雀做標記 😂

全白天地牆, 飄逸絹幕窗紗外無敵海景, 周圍都係白蠟燭, 仲擺籠雀喺度唱 live, 有人話似靈堂, 我就覺得呢啲叫做仙氣 😆. 

食物 details 實在冇乜印象, 只記得係茶道 + 擺碟好靚嘅精緻西餐. 佢哋某啲餐具亦可以買走, 我買咗隻好似 " 揸皺咗嘅紙 " 造型嘅碗, 用到而家.

" 揸皺咗嘅紙 " 造型碗

數碼港地方隔涉隱世, 山長水遠盡咗力兩年只係去到三次, 同埋每次都包場, 得我哋一枱客, 點維皮呢......?

另一個充滿異國情調嘅好地方, 係石澳 Black Sheep ( 舊址 ).

出盡九牛二虎之力, 先喺網上摷到兩張未搬去斜對面之前嘅相.  最大特式, 就係間舖只得幾盞燈, 照明全靠枱上 / 街邊行人路上點滿嘅白蠟燭 🕯🕯🕯🕯, 有人會話大吉利是, 但我就覺得滿場燭光不同節奏地閃爍, 非常夢幻同非常靚.

去過嘅人, 印象最深刻一定係隨麵包奉上嘅焗蒜頭, 香氣四溢入口即溶, 問餐廳侍應做法, 原來好容易, 將成個蒜頭打橫切半, 灑啲橄欖油加啲黑椒粉喺面, 再入焗爐烤到金黃就得. 

五月之暴食 IV

泰國咁熱唔打邊爐唔係人啦, 38-40C 仲要冇冷氣大汗疊細汗嗰隻先至過癮.

臨別秋波, 曼谷最後一夜, 我哋決定一試之前嗰日幫趁過 [ 鴨店 ] 對面間火鍋.

https://www.facebook.com/people/TANG-JEK-WU-%E0%B8%81%E0%B9%8B%E0%B8%A7%E0%B8%A2%E0%B9%80%E0%B8%95%E0%B8%B5%E0%B9%8B%E0%B8%A2%E0%B8%A7%E0%B9%80%E0%B8%99%E0%B8%B7%E0%B9%89%E0%B8%AD/100078735347368/?paipv=0&eav=Afa5-SQ4qSh8TC3ApoYs1tqmRGuk1lBKRpzQ0wmDfrnNrmlPFFd-bcVEFk8BOy2I7hA&_rdr 

其實都唔知係乜料, 見佢門面怪雞一於試吓.  

因為員工唔識英文, 我哋溝通雞同鴨講, 但感覺非常良好, 指指吓都叫到嘢食.

Super Combo 火鍋套餐 : 湯底連菜 + 六碟牛 =  490 baht ( 110 hkd ) 😱 !  

我哋三條友夾埋都係 110 hkd, 真係有啲樣衰同唔好意思 ......  唯有狂叫泰啤充數. 雖然幫趁咁少 $, 但啲員工竟然完全冇俾面色我哋睇 ( 香港一早死得好慘啦 😕 ) , 招呼仲好周到 tim.

佢個廚房真係極度簡約, 車仔麵檔 setup, 所有材料一眼睇晒, 得 16 樣, 即叫即煮.
 

講真, 味道一般但風味搭夠, 隔離枱熟客可謂非等閑之輩, 其中一個謝老四咁款, 成班友傍實仲有兩條煙駁煙嘅中女左右逢源, 吋到擺埋籠鬼殺咁嘈嘅鸚鵡上枱一齊打邊爐, 一般客人應該唔得囉 😂

五月之暴食 III

雖然泰國有好多米芝蓮餐廳, 但今次我哋醉翁之意不在酒, 大家一早有共識主打土炮地踎嘢. 

朋友的朋友推介一間基本上冇乜遊客識嘅 [ 鴨店 ], 地點隔涉但又唔算太偏遠.  

 https://www.facebook.com/BanthatThongRoastDuck/menu/

去完 JJ Market 有人話想 heah 兩 heah 嘆杯咖啡先, 所以到達 [ 鴨店 ] " 食 lunch " 已經過咗下晝 4 點, 真係好 Q 餓, 好想發爛, 但餓到連黑面嘅氣力都冇, 所以朋友先得以逃過一劫.

廚師同伙記們全部年青人, 可能半落場狀態, 好 relax, 一路揈機一路跟住唱一路煮菜, 望住佢哋咁合拍咁 enjoy 搞到自己都覺得好開心.

去 [ 鴨店 ] 當然要叫鴨啦, 細細隻冇乜肥膏, 先落鑊油炸, 後炭火燒烤, 皮脆肉香啖啖汁, 點啲辣醬隊兩支大啤, 人間極品.  

驚死唔夠, 除咗鴨每人各叫咗一碗湯 ( 共三碗 ), 睇個餐牌以為細細碗, 點知嚟到先知大鑊, 三碗份量應該叫三 " 盤 " 先啱 😆😆😆   

值得一提我點嘅 spicy beef soup ( 辣牛湯 ), 估唔到係牛雜, 香味四溢辣勁十足, 一路飲一路流汗兼流眼淚, 實在太好飲.

五月之暴食 II

 

好慶幸, 今次曼谷之旅同行都係大膽之輩, 所以可以食到地踎嘢.

主打牛雜邊爐, 但亦有小量豬雜供應, 我哋好癲 38-40 度熱屎辣辣走去 lunch hotpot, 但原來同我哋同類嘅痴漢都不少, 差不多成兩點都竟然要排長龍, 好彩最後唔駛等好耐就有枱. 

嗰度應該已經黃咗, 香港遊客有幾枱 ( 包括我哋 ), 另一半就係當地泰國人, 各人目標一致 : 風味炭爐火鍋 😙 

我哋點嘅牛肉湯底好似檸茶咁清徹, 一啲都睇唔出原來味道非常濃厚, 但同時又散出陣陣泰式香料幽香, 實在令人無法抗拒, 邊爐都未開始打就飲咗 1/3 😂 

佢啲豬牛雜配料最貴都係 HKD 15 碟, 粉麵一碗 HKD 2.5, 好似話近期已經加咗價之前仲平. 

講真, 嘢食真得, 而家都仲記得佢牛肉湯底個味. 

地方殘但一啲都唔污糟, 仲有 girl 造型齊陰髮型哥哥仔熱情招待, 呢間係會推薦俾 ( 唔怕熱同唔怕地踎 ) 朋友嘅, 個名叫 [ 王春盛 ], 自己搵啦 !

五月之暴食 I

自從轉 team 做澳洲 project, 一日到黑開 call, 成日坐搞個人肥 Q 晒, 胃腩肥腰一發不可收拾, 諗住五月尾去泰國前作最後衝刺, 減吓肥等著泳衣嗰陣冇咁羞家, 不過唔駛講都知結果徹底失敗咗啦.

同行友人以前喺曼谷住過幾年, 今次食殘廢餐, 任由佢哋全程擺佈租車四圍去.  太耐無玩點到點旅遊, 差啲忘記咗成件事可以有幾正👍 : 唔怕熱因為唔駛曬, 唔怕攰因為唔駛行, shopping 更加要盡情發揮, 因為唔駛再扐住啲重嘢行九條街搭車返酒店.

曼谷除咗食玩瞓買, 我哋仲出城去咗春武里府 Chonburi + 芭堤雅 Pattaya 一日遊.

Friend 話喺 Chonburi  book 咗食 omakase, 吓...... ?  

原來係好嘢, 餐廳喺一間位處沙灘對住大海木屋嘅二樓, 非常有特色, 我未食都已經比咗 70 分佢 😆.  

入到去一望個 sushi bar, OMG !!! 180 度 panorama 全海景, 點解可以咁㗎, 激動到差啲嗌咗出嚟.  我見識少, 喺咁環境食 omakase 咁大個人真係第一次.

可能希望客人由頭到尾欣賞日落景緻, 餐廳要求所有人 5:30pm 入座, 對我哋嚟講真係有啲早, 下晝嗰餐都未落隔.  

𥄫吓餐牌, 哇 ~~ 16 個菜 😅 以我當刻飽脹程度頂多食到 10 個, 搞唔掂嗰啲唯有靠朋友幫手食埋.  

開頭懷疑會唔會靠個海景嚟分散客人注意, 啲嘢食就求求其其.  哈, 我錯, 完全錯, 泰國人師傅做嘅各種壽司都非常正宗, 魚生又新鮮, 個人覺得甚至可以媲美日本師傅 ( 除咗頭盤, 意粉, 甜品, 應該係助廚做, 所以口味好似爭少少 ).

大約 7:10pm 啱啱天黑所有菜已經上齊, 美女侍應開始同各人埋單 😂😂 , 真係有啲早.  成個配套加埋食物環境招呼, 原本比 90 分, 咁趕而家扣 5 分, 點知望吓張單每人只係 1,011 港紙, 實在太抵食, 又要加番 10 分.

結果呢個地方我比 95, 好高分. 

https://www.instagram.com/sushi_kaijou/

法國五月

好懶, 五月過咗成大半先嚟寫 blog, 今次再講飲食連環不幸事件.

話說尋晚喺上環差館上街食法蘭西菜, 裝修骨子地方細細, 頂籠得 16 個位. Chef's counter 最佳位置望住廚師們搏鬥本應十分過癮, 可惜餐廳兩部冷氣壞咗一部, 我哋座位近貼廚房爐火, 唔夠幾分鐘已經熱到底褲都濕埋.

5 度菜 tasting menu 口味過分豐富, 每碟至少用到 8-12 種不同食材, 天花亂墜太 complex, 不過最後回味, 都算好味可以收貨嘅, 但食過今次就真係冇回頭, 點解 ? 因為條西面侍應囉 ! 

前因係當日公司附近食晏, 瀨嘢叫咗條勁難食嘅炭燒北海道花魚, 炭都未燒紅就夾硬擺條魚落去燒, 燒到唔生唔熟, 魚肉苦兼超級腥, 搞到成個下晝都有啲反胃. 

法國廚師示範單眼

後果咪夜晚無福消受法國佬嗰個 tasting menu, 食到第 3 碟已經開始食剩, 點知比條八婆侍應用質問語氣問我點解唔食晒, 仲西晒面好嬲咁收走隻我碟 😡 !  

餐廳食剩嘢要同侍應交代真係第一次, 廚師成晚企正我面前都未出聲, 條八婆都唔知嬲乜春.  超 ~ 你嬲, 我都識嬲囉, 同枱朋友見勢色唔對暴風雨前夕, 出口制止我發圍, 叫我由得佢, 話條女之前 serve 佢哋都經已係目無表情黑口黑面.

影低佢個厭世 look

今次, 又再多一個理由令我離棄法國.