俾個獎你

好激動唔寫唔得, 因為星期一竟然喺北京無心插柳地食咗餐本年度個人認為最好食嘅一餐 [ vs. 2024 年度旅遊 : 意大利 . 瑞士 . 泰國 . 日本 . 上海 ], 仲要係齋都得咗先勁喎 ( 係人都知我唔食齋 😆😆😆) !

一直鍾意北京多過上海, 不過今年一月 + 九月去完上海又覺得而家嘅上海好似仲正.  正當以為自己移情別戀, 十一月頭一個北京快閃之旅, 又令我重新 🩷 上北京, 仲要係沉船嗰隻.

其實北京 trip 嚟得有啲突然, 加上 covid 多年冇去已經唔知而家有乜好嘢食, 臨急抱佛腳, 出發前上網 + 大眾點評發功狂摷.  原來除咗米芝蓮, 大陸自己都有類似評分機制叫 '黑珍珠指南', 上去𥄫吓, 發現咗間 蘭齋 Lamdre https://www.instagram.com/lamdre_beijing/?hl=zh-hk 植物料理, 攞一 💎 ( 明明黑珍珠榜, 點解唔係俾 '珠' 而係俾 💎 ?? 奇怪...... ), 由北京素菜天花板 [ 京兆尹 ] 前大廚主理, 哇 ~ 好吸引 😍  同埋睇相餐廳裝修似乎非常有品味, 所以決定破天荒食一次齋 ! 萬一唔 likey 最多咪以後唔去囉 😂

蘭齋位處北京三里屯一個僻靜地帶, DiDi 駛入餐廳範圍冇耐, 門口已經有人問我係咪郭小姐, 哇 ! 真係好多年都未試過有人咁接待.

秋冬 menu 有三款, pre-order 最 cheap 每位 RMB 980 嘅 lunch set, 唔係俾唔起, 而係其他兩款超級多嘢食實食唔晒, 無謂浪費啦. 

北歐 + 日系簡約風包廂坐低, waiter 話有 green monday promotion 原本個 set 家陣 RMB 790 就得, 即係打八折, 抵 !!

講真, 食齋冇期望, 點知驚喜一浪接一浪. 

好多米芝蓮, 好靚, 好好食好好招呼, 但多數食完印象模糊, 實際有幾好味, 點好招呼呢 ? 唔記得 😏  靚裝修除外, 因為我係外貌協會會員嘛 😅 

講番間餐廳. 雖然係素菜, 每道菜個性極之鮮明, 口味結構濃烈 ( 關乎食材配搭, 唔係調味多少 ). 最勢估唔到係佢出臭豆腐呢招, 完全 out of the box ! 💪💪💪

服務超級細緻, 精準到位, 完全唔會做啲多餘嘢, 連洗手間阿姨都笑容滿面. 加分 !

 

 

 

 

 

食食吓, 朋友同我講個 waiter 幾靚仔, 原本一直冇留意, 而家佢 highlight 咗, 望真, 又真係幾好樣喎 😍  

心心眼, 一於撩吓佢, 問佢生得咁靚仔做乜唔去選美 😂😂 呵呵 ~ 應該冇嚇親佢掛 😆

Post 張服務我哋嘅靚仔侍應相做個記認先 😂

冇架子米芝蓮

九月喺上海嘆過啲高質中菜, 食到個咀刁晒, 返香港食乜中餐都覺得好似掙咁啲, 仲要貴到得人驚, 早兩日同同事喺太古坊 lunch 飲茶, 68 蚊籠點心得嗰 3 粒燒買. 成 22 蚊一粒燒買 ! 又唔係乜驚為天人貨式, 咩世界 ?! 所以要暫時逃離現場, 香港中餐擺埋一面, 過吓冷河先.  

尋晚朋友慶祝生日, 知道唔係中菜, 簡直鬆一口氣.  

米芝蓮 3 星 https://www.tavie.com.hk/ , 其實 2015 已經開咗, 只係一直冇機會去, 日廚法菜日本周街係, 香港就真係唔多.  3 星 ? 上網起底, 睇吓有幾勁先.   

網上睇廚師個樣有啲 cool, 原來真身非常平易近人, 成晚親自落場招待客人毫無架子, 知客 / 上菜樣樣做齊. 餐廳日本團隊侍應, 講日本口音英文, 真係聽到一頭霧水 😂  

秋季 tasting menu 連甜品 7 道菜, 全部都好好好食, 注意 : 係全部 !  因為食到用熱情做出嚟嘅菜. 

不過最最最最最最欣賞, 非海膽闊條麵同龍蝦小扁豆忌廉雲吞湯莫屬.  

講吓點解咁 like 海膽闊條麵.  第一 : 手工麵非常有咬口;  第二 : 掛係闊條麵上嘅青海苔同鮮海膽, 海水味簡直絕配 !  麵條份量點到即止啱啱好.

至於個湯, creamy 小扁豆湯底同雲吞搶晒風頭,

龍蝦今次終於淪為配角, 但個組合其實恰到好處, 令唔鍾意豆類食物嘅我, 最後都全碟照鏡 😆

兩個甜品原本冇諗住吃, 點知其中一個竟然有薰衣草雪糕, OMG, 簡直完全招架唔到, 無奈破界食埋 ! 😆😆😆😆😆😆

千祈唔好買 display 嘅貨

以前喺香港舖頭買嘢, 睇啱 display 嗰件, 會問吓 sales 有冇新嘅, 成日俾佢哋串 : display 嘅件件都係新貨嚟啦.  近年已經好少喺香港行街 shopping, 唔知而家啲 sales 會唔會好咗, 冇咁大支嘢呢 ?

上禮拜去完上海, 再次證實, 食嘢唔好攞最面嗰件 http://shirliek.blogspot.com/2023/12/blog-post.html, 如果要買埋身肉搏嘅用品, 就一定堅持唔要 display 嘅貨, 必須要求 sales 攞件全新先好買 !

飛到一枱都係嘅指甲

點解咁講 ?

事緣喺南京步行街, 諗住喺某老字號買番把靚較剪返香港剪髮, 係櫃檯𥄫𥄫吓之際, 突然喺近距離聽到一吓一吓清脆嘅啪啪聲.  

轉頭一望, 原來身旁大叔正在同佢夫人一齊人肉測試指甲鉗!  

老婆剪完到老公剪, 旁若無人, 指甲橫飛, 非常嘔心 😤  

最堅抽係最後唔買, sales 就將幾套試用過嘅指甲鉗直接擺番落 counter 度, 完全冇清潔消毒 😱, 飛到一枱都係嘅指甲亦冇人清理 😱😱

跟住下個客又輪迴再剪再試......

嘔!

唔唱 K

好怕喺香港食川菜, 遷就港人口味調教到三不像, 毫無層次可言.  

前晚朋友請客, 知道食四川嘢心已經涼咗一截, 跟住佢 send 咗個菜單 draft 我睇, haha...... 酸菜魚...... 以前做 project 喺成都重慶住成個月都冇見過酸菜魚呢啲物體 😂   仲話因為有人唔食得辣, 全部都 order 唔辣或小辣, 唔係掛 ? 唔食辣嘅人做乜春去食四川嘢 ?! 最後喺我堅持下加咗個中辣 [ 毛血旺 ], 先似番啲樣.

網上圖片 ( 當晚嬲得滯一張相都冇影 )

去到餐廳 6/F 門口完全冇人接待, 企咗陣, 收到朋友短訊, 佢哋上咗 8/F 爆房.  等唔到𨋢行樓梯上兩層, 防煙門都未開就已經聽到恐怖歌聲, 原來係朋友正在房內唱 K.

以為佢哋因為未齊人唱住等, 點知到開飯都死霸住支咪唔放起勢咁唱, 歌藝已經唔係好, 點嘅歌又難聽, 伴唱開到爆炸咁大聲, 最難頂係音響唔靚喇叭拆, 喳喳聲嘅 !   

唔唱 K

成晚俾佢兩個咪霸精神虐待, 喺佢哋大嗌之下燥底咗, 冇心情乜都食唔落 😡.

所以唔好問間嘢好唔好食, 我唔知, 因為成餐飯我都西面發脾氣, 16 道菜凈係夾咗三樣嘢食 : 皮蛋, 紅蝦多士, 毛血旺裡面兩塊午餐肉. 

其實我覺得唱 K 係 ok 的, 但絕對唔可以一路食一路要聽住人哋唱, 真係好煩好困擾.  下次如果再有人請客, 一定會問清楚個局係咪有唱 K 環節, 有嘅話就 thanks but no thanks, 唔好預我.

太天真 . 太傻

 

早排網購化妝品, 收到品牌邀請去佢哋個香水 Masterclass.  虛榮 + 好奇心驅使下報名, 因為免費, 事前網上 fact check 活動喺其他國家舉辦嘅情況, 評價似乎相當正面, 最重要冇強迫消費.

工作坊為銅鑼灣渣甸坊路口一個做乜執乜嘅巨型吉舖, 場地佈置手工簡陋感覺臨時 ( 可能係職業病, 其他人應該唔覺 ).

除咗我同朋友, 另外兩位參加者素顏村姑 look, 打扮鄉土味十足, 自稱用開品牌香水 😆, 唔係掛......

如果以為呢個真係大師班, 應該會失望, 不過可以認識品牌香水歷史, 了解佢哋香水製作背後故事, 有得玩有得試, 道具又靚, 都算 ok.  

 

 

活動 Part 2 一望個 set up 就知伏.

話就話個人化香水諮詢服務, 其實叫參加者喺 10 幾款香氣中揀出 5 款, 美妝師喺後欄做個唔夠 30 秒分析, 出番嚟同參加者捽吓手仔整個象徵式 hand massage, 接住 hard sell 每人兩款, 每支售價成三千幾嘅香水, 話買就會送套值過千 gift set 喎.

嘩 6 千幾, no la...... 第一, 品牌香水太女性化唔啱口味.  第二, 最怕 impulse shopping 冷靜落嚟後悔買咗.  第三, 為贈品而買唔想要嘅嘢, 窮人思維.

朋友答 " 考慮吓先 ", 我說話比較直接 : " 今日冇諗住喺度買 ". 嗱, 呢句應該得罪咗, 美妝師西面行開.

正當我哋討論緊活動係咪已經結束可以走人之際, 美妝師再次現身, 俾咗兩個白色盒仔我哋, 雖然萬般不願意, 但都要解釋係品牌送俾參加者嘅記念手繩.  

最 sad 係品牌 policy 要送客 ( 包括冇幫襯嘅茂利 ). 工作坊出口係條向下嘅行人自動電梯, 就算唔識讀心術, 我都 read 到美妝師內心嘅怨氣, 送到電梯口嗰陣, 直頭想一腳伸我哋兩條強迫唔到消費嘅茂利落樓 😂

條 made in China 嘅記念手繩我擗咗, 因為一望就聯想起美妝師個西樣 😆  

查實我太天真, 以為人哋會無條件付出.  太傻, 踩人個場, 諗住可以唔駛幫襯空手而回 !  經過今次教訓, 再有類似活動, 真係咪搞, 費事又不歡而散.

東京大食のon99試酒

東京 2024 新落成地標 : 最高大樓 Azabudai Hills 麻布台之丘. 雖然朋友細佬預警冇嘢睇, 但一場嚟到東京, 點都要去湊吓熱鬧打吓咭掛......

地方隔涉冇地鐵, 好在渋谷坐 88 號巴士可以直達, 更加好彩嘅係我有兩手準備, book 咗個 wine pairing session, 就算個場真係無嘢行, 我哋都仲可以有啲細藝, 唔駛立即掉頭走咁 on 居 😅   

結果, 我哋真係好快行晒個場 😄

酒舖來頭不少, 有日本唯一 WM ( wine master ) 加持.

我哋報名參加嘅活動查實叫 Component Pairing, 客人可以從 [ 20 款美酒 | 配對小食 ] ( 每月不同 ) 組合中揀選 2-3 個, 再喺 tasting counter 30 分鐘內立食品嚐. 每個組合都只不過 30-50 蚊港紙, 平到開巷, 如果香港有呢類賣大包活動, 我一定擔凳仔霸頭位參加 ! 

好明顯, 個品酒活動暫時仲未被外地遊客得知, 酒舖非常好奇點解我哋會識搵到嚟 😂   又因為冇乜 staff 可以用英文溝通, 最後都要由可以完整英文對答嘅白頭型佬 / 叔招待我哋 😅 

話要先食嘢後試酒, Component Pairing, 我選擇如下 :

#1. 田中六五 6513 Sake | 白乳酪 x 昆布碎

 

 

 

 

 

 

 

 

 

 

 

 

 

#2. 日本白酒 Hokushin Chardonnay Unwooded 2019 Chateau Mecian | 帶子刺身 x Mozzarella x 柚子醋

#3. 意大利紅酒 Brunello di Montalcino 2018 Banfi | 日本叉燒 x 印度 Masala 綜合香料

配搭新鮮, 份量點道即止 ( = 好少 😂 ), 見好就收. 

而我最喜愛嘅組合係 #2 😍😍  

因為試嗰隻日本 chardonnay 係 creamy x 酸味化身, 同 mozzarella x 柚子醋簡直係水乳交融, 而帶子刺身嘅爽口質感鮮味更將整件事昇華 !  好嘢, sommelier pairing 勁有功力 💪

東京大食の走後門

同蘇民峰前後腳去東京, 佢嬲豬喺 fb 投訴某米芝蓮 3 星只得 7 樣嘢食, 食佢唔飽 😆

就個人經驗而言, 米芝蓮星愈多就愈冇驚喜, 通常 1 星嗰啲仲靠得住, 因為班人仲有團火去 make bigger efforts,  施展混身解數希望擇更多星, 反而 3 星嗰啲已經上晒神檯, 穩穩陣陣唔做唔錯 keep 住唔跌 watt 就得.

今個 trip 至好食, 係間喺東京車站對面 Midtown 八重洲 3/F, 乜星都冇嘅壽司店.  2023 年從千葉搬到東京, 貴精不貴多每晚只做 6 個客, 壽司師傅好手勢之餘價錢合理, 至少可以一定吃飽先 !

同枱兩 pair 日本人, 咁啱得咁橋都係 [ 有米 50+老男 x 周身名牌 20+嫩口靚女 ] 組合, 我哋兩條衣衫襤褸茂利坐中間做電燈膽 😂.  8pm - 10:30pm 兩個半鐘食足 20 道菜, 份量十足, 師傅手勢實在一流, 調味非常出色, 引爆魚生鮮味 !  

雖然早在 9pm 已經飽到上天花, 但咁好食唔食晒佢又對唔住自己, 同埋個師傅企正喺面前望住, 想搏大霧俾 friend 食埋自己嗰份都唔得.  所以 9:05pm 之後上嘅每一度菜, 我都用意志 💪 去 KO, 結果成功食晒全部 😆😆😆

餐廳設計相當搞嘢, sushi counter 旁有道半高暗門, 原來係餐廳人客通往商場廁所嘅捷徑, 其實行餐廳正門都去到廁所, 不過就要行多 20 步 😄😄   見啲日本人捐得咁過癮, 我哋死跟捐吓囉, 哈哈.