硬膠

而家整容, 見怪不怪.  記得幾年前有個PR同事, 一入公司做已經成為大家談論焦點, 因為佢對胸實在假得好犀利, 圓到湯碗咁!

有次見佢喺公司樓下, 跑過對面馬路, 咁大, 都完全冇蕩漾嘅感覺, 好硬膠.








呢排薛芷倫好高調, 成日盛裝出動, 每次見佢啲相, 都好驚嚇, 藥物副作用...... 真係會搞到個樣咁咩?

其實佢後生幾靚㗎, 我舊老板以前做電視廣告美指, 其中一個拍<海濤髮型>, 話當時廿歲嘅薛芷倫, 根本係有錢女, 揸posche去片場.

同當年薛芷倫差唔多style, 但冇咁cool 又冇咁倔強嘅, 有夏文汐, 非凡氣質, 一個淡裝都殺死你.

 

而家嗰啲電視劇扮警察, 但又化行裝, 黐行假眼睫毛嘅所謂姐仔? 食蕉啦!

 

 

白色生日

早輪諗住去巴黎過生日, 但check 過啲機票好貴, 孤鬼寒, 都係唔去喇, 點知咁啱公司話要去開conference, 唔駛自己比錢有得去, 實在太好彩喇!

上星期六晚飛, 我比較早上機, 入到去, 個空姐笑笑口話 : "welcome on board, 左手邊第一張就係喇." 

見到左面第一張, 一嘢坐低, 坐咗大約半分鐘, 唔對路...... 點解business class 闊咗咁多嘅?  
望真, 原來我坐錯咗喺first class!
真係超級勁樣衰, 好彩閃得快, 冇比人發現啫.......

成日都想過白色生日, 今年巴黎落大雪, 四周一片白茫茫, 今次真係過晒癮, 絕對得償所願.

 

酒店check-in 後我仲好有興致走去公園獵影, 啲雪好深, 行路似moonwalk, 每吓都要喺雪度拔番隻腳出嚟, 行咗兩嘢已經腳軟.

 

公園除咗洶群而出嘅一家大細, 仲有好多小朋友整嘅雪人, 好得意.

 

 

老酒

一直都覺得酒可以陳年呢件事, 係好神奇嘅, 世上唔係有好多飲品, 可以擺幾廿年後, 仲飲得落口.  如果有罐兩年前生產嘅可樂, 要你飲, 你都會猶豫啦.

前晚好榮幸, 有機會飲到支1937 年 Chateau Leoville Payferre, 75歲嘅老酒, 個侍應好好好小心咁開瓶, 我都戥佢緊張, 驚驚. 

 

 

雖然個客口口聲聲話開爛咗冇所謂 (但又一路望實喎) , 若果真係出事, 一定黑面! 好在最後個塞都冇爛.

老實講, 我從來都冇飲過咁老年份嘅酒.

第一啖入口, 好酸, 有啲dilute 咗嘅櫻桃味, 仲帶少少鐵銹, 跟住就唔識形容喇.....  再breathe 咗陣, 都冇乜好變化, 只係冇咁酸, 睇嚟都係快飲快着.

大龍鳳

好怕住隔離嗰兩條 "les", 一時糖黐豆, 一時水溝油.  最鍾意friday night 或者星期日下晝嗌大交.

我住嗰度隔音好, 從來冇比隔離屋啲聲嘈過, 除咗佢哋!
個 <老公> (唔知點形容, 總之係男嗰個啦) 嗌起交上嚟把聲又大又"拆", 有佢講冇人講, 鬧人內容重覆又重覆, 好煩.

前晚10:45pm 返屋企, 一開𨋢門就聽到佢哋嗌緊大交, 跟住睇陣電視, 12 點瞓覺, 佢哋都仲係吵得好激烈.

夜半4 點, 窗外忽然傳嚟陣陣好"拆"嘅凄厲叫聲 : "唔好呀...... 唔好呀......" .  望落去, 見到啲管理員企晒喺草地望上嚟!  妖~~~~ 唔係嘛, 玩跳樓!

頓時心感不安 : '啱啱先覺得住得好好地, 你一跳, 呢度咪變凶宅?!'  但與此同時, 又精神分裂 :  '妖, 成鬼日嗌交, 係就快啲跳, 喺度嘈生晒, 搞到周圍啲狗狂吠, 成村人冇覺好瞓!'

"唔好呀...... 唔好呀......" 再嗌咗 10 分鐘, 消防到. 
正當我諗緊喺草地啲消防可以幾快set up個救生氣墊之際, 另一隊已經帶齊架生上咗嚟,  3 秒內用鐵筆撬門入屋!

跟住啲救護警察管理員嚟哂, 條走廊變得人聲沸騰, 一個鐘後兩條"les"被送院, 之後全部人收隊.

啲消防真係好man, 由細到大, 我都好鍾意消防員. 

記得4歲嗰陣讀幼稚園參觀北角消防局, 有得試坐<長臂猿> (見左圖), 幾個同學都係自己上車. 而我, 就發姣, 張開雙臂, 要消防員抱我上車, 厲害!

跑東北

 

呢期驛馬星動, 狂飛 5日, 包括兩日大東北 : 哈爾濱 + 瀋陽.

出發前都收到風, 會好凍, 不過冇諗到會凍到咁盡, 落機嗰吓, 竟然零下29C!




嗰仲感覺, 日光日白都好似喺freezer裡面咁, 但係請記住, 唔係開雪櫃嗰吓, 係要想像 "困咗喺裡面, 冇得走嗰隻" !

哈爾濱鄰近俄羅斯, 所以好多建築都好有俄羅斯風格.

一心諗住去到可以試吓哈爾濱菜, 點知原來業主個GM係香港人, 帶咗我哋去港式茶餐廳食晏!  不過佢都好嘢, 冰天雪地搵到隻燒鵝嚟食.

吃完仲有時間睇風景, 去到 <蘇菲亞教堂>, 司機問要唔要落車參觀, 哇~ 唔啦! 








當日傍晚再去瀋陽, 好啲, 有-18C, 不過因為天黑, 風又大, 感覺仲凍.

第朝起身, -28C, 但超勁, 成街人, 點解咁凍嘅地方, 可以做大城市嘅?!

嗰晚返香港, 17C, 舒服晒......原來香港真係幾好㗎.

二十年後

我曾經係日本迷, 痴起條筋, 一年去3 次東京.

 

記得第一次去日本, 係 21年前, 即1991, 嗰日好搞笑, 一上的士去機場, 個司機問我係唔係 <帶guide>, 我問乜係 <帶guide>, oh, 原來係導遊.

 

呵呵, 其實嗰次係我人生第一次出trip, 原來我個樣似<帶guide>......  之後好彩, 第一次坐飛機就比人upgrade去business, 當年日航空姐, 真係好靚㗎, 仲記得啲饅魚飯, 好好味.

 

不過去到東京當晚, 情況有啲恐怖, 一落的士都未攞行李, 就有個醉酒佬扒咗喺車頭嘔!  之後行去旅館, 街邊啲男人喺度屙尿. 

 

跟住仲經歷咗人生第一場 4.2 級地震.  當時瞓係床睇電視, 忽然見到牆邊幅畫拍拍吓, 以為咁猛有鬼!  之後聽到街啲車猛響銨, 停晒喺度, 電視新聞特別報告, 先知咁樣原來係地震. 

 

當年覺得日本人好有禮貌, 好認真,  啲嘢好靚, 好精緻同埋好貴!! 曾經好有衝動去日本讀書, 讀乜?  都係啲日文設計之類嘅無謂嘢啦, 老豆冇反對, 但係佢要我喺大阪讀, 因佢有個friend 喺嗰度, 但係大阪?! 都唔係東京.....?  No 啦.

 

上星期去大阪快閃公幹, 晚機去早機返, 最把炮係食到個正式日本魚生飯set dinner, 頂佢, 香港嗰啲, 真係冇得揮, 啲魚生好Q鮮㗎!

 

 

成個餐唔計魚生飯, 前前後後嚟咗7小碟, 又海膽又和牛 (當然係細細份), 仲包埋咖啡甜點, 都唔駛HKD370, 講都冇人信!

個魚生飯加咗芝麻, 年藕, 香草同黑魚子, 口感豐富有層次, 賣相又精美, 實在令人太回味!

小圈子

 

呢排做嘢好濕滯, 搞到個人好燥. 

尋日外賣lunch 仲比條潮州魚蛋佬激到彈起, chok 住度氣, 足足一日先順得番.

 

今朝騎馬, 隱約聽到教練提起, 下年香港有個馬術盛會 (CSI 5), 喺機場博覽搞, 啲國際級高手, 跳欄會跳 1.6M!!

 

 

妖......  香港就係咁喇, 自誇 <World City> ,  到今時今日, 乜乸嘢事, 都係搞小圈子, 淨識口耳相傳!    

 

想搵啲盛會資料, 成晚摷爆個馬會 (HKJC) 同馬術協會 (HKEF)個網, 竟然隻字不提, 唔通有sponsor, 即係商業活動, 唔可以講?!

 

個馬術協會, 又話個會成立目的係促進馬術活動, 我呸!!  入會幾年, 除咗夏天到期交會費嗰陣會出信嚟催, 其餘日子, 簡直零交流! 

 

原來交錢, 就係馬術活動.