高手在民間

 

唔知有冇人聽過 [ 觀塘老母 ]  ( 因為觀塘勁塞車, 啲人入親去就問候老母 😂 ) 呢個大名呢 ? 我有.  

諗都冇諗過, 自己會喺觀塘返工, 好彩之前上過朋友開源道嘅 office 幾次, 對觀塘都有啲概念.

返咗新工半個月, 可能因為已作最壞打算, 暫時覺得還 ok, 觀塘人多車多啲街立立亂 ? 係㗎, 不過紐約都係咁啦, 幻想自己喺 NYC 返緊工咪得囉 😆😆😆😆😆😆   同埋觀塘嘢食比港島商業區差不多平成半, 搭 MTR 時間同車費仲慳好多, 計落都唔太差啫.

遲啲摸熟咗就試吓揸車行捷徑, 睇吓來回有冇得再快啲 💪

Office 幾條友還可以吧, 雖然 local 啲但都屬正常人類別, 除咗個 admin 女人, 我唔識相人但一望佢對眼就知係 [ 小家怕事, 但又要死雞撐飯蓋 ] 嗰隻.  果然不出所料好快見真章, 事緣大陸老闆想攞香港車牌, 問香港 office 同事借屋企地址作運輸處寄件之用, 其實問題不大, 但要借埋香港身份證副本就唔 ok, 點知啲經手人會唔會攞個身份證副本去亂用㗎 ?!

我哋點解會咁機智識得唔借身分證副本 ?  就係全靠admin 女人一輪咀 bili~bala 咁提醒囉 ! 😆   玩大咗, end up 搞到冇人肯借交唔到功課, admin 女人可能因此俾老闆個秘書 '拮' 咗幾句, 條氣好唔順, 大大聲喺自己位連續鬧足兩粒鐘 !!!!!! , 內容狂 loop 重複重複重複又重複兩粒鐘 !!!!!! : [ 呢到唔係大陸, 係香港囉 ! ], [ 自己咪俾錢去搵小紅書囉, 大把中介 ! ], [ 大陸人知唔知乜嘢係個人私隱呀 ? ].  

好 Q 煩 😠😠😠   喺觀塘遇到呢啲 ' 高手' 不禁入鄉隨俗講咗句 [ xx 老母 ] ! 😂   最怕人得把聲, 唔滿意咪同人當面對質囉, 又鵪鶉唔敢 !  不斷糾結, 騷擾到其他人, 旁人只會見到佢嘅教養同埋低水平.

肥胖之都

今日剛剛拜完年食飽飽 + jet lag ( 尋朝喺意大利返 ) --> 好眼瞓 😴, 但大年初一又唔可以午睡喎, 唯有寫個 blog 分散吓注意先.

經過今次, 相信除非公幹, 我一定唔會再揀一月去意大利, 凍就預咗, 但冇諗過 8 日 trip 竟然會落足 7 日 🌧 !  嬲 😡😡😡

好在今次 trip 特別安排咗個從未去過嘅新地方 :  BOLOGNA, 仲要去嗰日係唯一嘅天晴 !!  由 Florence 搭高速火車只需半粒鐘, 仲快過我由火炭出香港 😆  雖然 Bologna 以美食聞名有 "肥胖之都" 之稱, 不過今次去嘅目的唔係食而係觀光一日遊, 下次啦, 下次一定約埋 friend 去食餐飽.

舊同事介紹 Bologna 山上有個叫 Santuario delle Madonna San Luca https://monasteriemiliaromagna.it/en/monastero/2767-chiesa-della-madonna-di-san-luca 嘅地方好靚, 從市中心行條 3.8km 嘅迴廊上山, 行個幾鐘就到. 

唔係掛...... 個幾鐘 😱😱 ?! 唔囉.  

打算喺火車站打的一嘢過車上去就算, 但又想一嘗本土風味, 所以決定搭巴士. 錯信 Google Map 搭 21 號巴士, 去到山腳落車再步行 15 分鐘就到.  點知到站落車後 Google Map 指示竟然完全特變, 話要行 45 分鐘, 哇 ~ 老點 😓 ?!  既徬徨亦憤怒, 當刻就算想打的都冇得周街截, 好彩有 uber 救我一命 ( 唔係廣告 ), 全程斜路, 司機揼行油都要 8 分鐘先上到. 

因為有下一個行程, 匆匆參觀完畢就要急步走 4 百 70 幾樓級落山, 一路遇見上山客個個都氣來氣喘 hur hur 聲, 大部份仲要上咗年紀, 真係佩服佢哋嘅體能 💪, 比我就一定唔得啦. 

落番地平線已經係 1 小時後, 好彩仲啱啱趕得切去限時預約咗嘅歐洲最古老大學 Archiginnasio https://www.archiginnasio.it/lang/en 舊址 ( 現為市立圖書館 ) 參觀. 

戲肉係二樓嘅 [ 解剖劇院 ] -  世界第一個人體解剖實驗室.

[ 解剖劇院 ] 設計非常古典, 室內散發陣陣舊木香味, 欣賞途中, 凝望中央白色雲石解剖床之際, 雲遊太墟忽然跳制, 想像學生重重包圍教授, 睇佢一刀刀劏屍, 當年個場冇電冇去水冇冷氣, 充斥奇怪味道......  好想立即撇, 但行落山行到腳軟好攰下半身郁唔到, 唯有再坐吓. 

跟住景點係雙子 ( 斜 ) 塔 Asinelli & Garisenda Towers https://en.wikipedia.org/wiki/Two_Towers,_Bologna , 高 100m 之嘛而家冇乜特別啦, 但如果係中世紀幾百年前已經可以起得咁高, 就一啲都唔野少. 

仲要, 呢兩條係以前 Bologna 百幾條高塔之中拆剩嘅 4 條其中之兩條, 意大利人, 真係可以好巔 !

開齋

變咗喇. 

講緊, 係我嘅口味. 

最近除咗戒牛肉, 尋日仲主動提議食齋, 嚇了朋友一跳 !  間餐廳 '圓 yuan' https://lubuds.com/yuan/ 其實開咗已經一年多, 評價超高但一直冇考慮去, 點解 ?  因為係食齋囉 😆

不過自從上年喺上海 / 北京食過啲好食嘅齋後, 介心已經放下不少, 冇理由去上海/北京食但又唔俾香港一個機會㗎 ?  再加上睇咗馬德鐘 youtube channel 介紹 https://www.youtube.com/watch?v=XBiHa4vm7lo&t=481s 好似幾得喎, check 咗仲有酒賣添 🍷, 所以決定試吓. 

又係嗰句 : 唔鍾意咪最多以後都唔去囉 😂😂😂

唔係跟馬德鐘口水尾人云亦云, 實地測試又真係覺得 '圓 yuan' 烹調方法特別能夠展現到各種蔬菜食材原味, 完全唔係香港一般中式齋舖, 勁打芡乜都炸, 碟碟一樣味, 多油多汁仲要扮肉嘅煮法.

我哋叫 express lunch set, 話就話 3-course, 其實唔計個 welcome drink, 加加埋埋都有成 6 碟嘢.

NUTS | 醬油漬 | WASABI 腰果

擺碟精緻不在話下, 份量啱啱好, 見好就收嗰隻. 味道配合濃淡得宜, 基上每道菜都俾到或大或小嘅驚喜.

柚子醋蓮霧海葡萄 | 山胡椒粉萵苣 😍 | 八寶茶

欖菜 MOUSSE 螺絲卷 😍

 

 

 

 

 

 

松茸豆腐清湯 😍😍

野菌烤焗茄子

砵仔飯 😍😍😍😍😍

至愛係主食 '砵仔飯', 混合 : 雞樅菌脆脆, 蓮藕粒, 藜麥, 卜卜脆青豆, 海苔絲, 軟硬兼施仲帶非常深度嘅辛辣, 美味程度爆燈攞滿分, 照晒鏡 😍😍😍

餐廳餐牌一年跟春夏秋冬季轉 4 次, 今次食冬季食譜, 遲的一定會再幫襯, 試埋其他季節系列.

曼谷食力 II

曼谷的第二天.

之前一整晚暴食鮑到嘔, 上床瞓覺唔夠 5 粒鐘, 又要走出街食 mum mum, 目的地係今年年頭新開嘅朝聖之地  Gaggan x LV.

餐廳面積唔大一眼睇晒, 設計 laid back 得嚟又帶點 "法式優雅", ok 靚嘅, 不過就冇乜 wow factor.

午餐 9 道菜, 係之前嗰晚份量嘅 1/3, 今次應該可以食晒 lu 掛 😄

餐巾套俾你睇吓㗎咋, 冇得攞走 😒

👅 LICK IT UP 👅

以前食過 Gaggan http://shirliek.blogspot.com/2018/11/one-night-in-bangkok.html, 佢有個 iconic dish 叫 LICK IT UP ( 客人用脷𦧺碟上面嘅汁 ). 果然, 而家 LV 都可以𦧺 👅👅.  

CHARCOAL

介紹吓其中幾道菜先.

CHARCOAL - 舊黑炭上面係粒炭烤穴子 ( 日本海鰻 ), 十分脆口, 可惜面頭擺咗啲我唔鍾意食嘅黑松露, 扣分 !

WORLD MAP

WORLD MAP - 地球入面有 3 個菜系嘅美食 : 日本 otoro 壽司, 印度香料鵝肝 waffle, 泰國小河蝦透明米餅. 

壽司 . waffle . 米餅

啱啱先話 2024 年內唔會再食魚生, 點知一見舊 otoro 就已經忍唔住秒殺 daap 咗. 呢啲咪正宗姣婆守唔到寡攞 😝.

MOMO

MOMOS - 一黑一白蘑菇餡料印度餃子, 餃皮極度彈口, 混合香檳 bearnaise sauce 泡泡食, 兩個字 : 驚喜 !

PATURI - Gaggan 名物, 木烤香蕉葉鱸魚, 據聞係廚師媽媽住家菜味道.  上枱時塊印有 LV momgram 嘅檀香木仲著緊火 🔥, 儀式感十足, 蕉葉一打開, 鮮魚味洶湧澎湃. 咬落去, 魚肉嫩滑多汁, 至好食係呢個 👍

PATURI

RICE & WINTER MUSHROOM - 最後一個冬菇煲仔飯點解又係黑松露㗎 😨 ?!  試咗啖, 頂唔順, 唔食.

總括對整體用餐體驗相當滿意, 但又未去到驚為天人地步, 所以試過一次就夠了.

曼谷食力 I

2024 年十二月係考驗食力嘅時間, 剛剛去完東京, 曼谷之旅又嚟喇.  友人從三方各地 ( 香港 . 上海 . 東京 ) 飛往曼谷, 喺指定時間到達預約好嘅餐廳, 坐低開飯 😄.

集合地點係曼谷潮區 Thonglor 嘅 CANVAS https://www.canvasbangkok.com/  :  美國人廚師, 連續 6 年攞米芝蓮一星, 食物賣相勁靚, 一於試吓.

非常精美的 menu

廚師除咗煮嘢叻, 仲會畫畫, 將 tasting menu 28 道菜畫成 28 幅畫, 好靚 😍😍😍   多口問廚師, 原來佢冇學過畫畫, 只係 Covid 時期冇嘢撈, 無師自通自學而成.  

怒髮衝冠的廚師 😆

成28 道菜咁多, 點食得晒 ?  餐廳經理叫我唔駛擔心, 因為食物份量其實唔多, 每樣都只係 one bite. 不過佢忘記咗廚師係美國人, american size 嘅 one bite = 我嘅 10 bites 呢 😂😂. 

唔好講咁多, 去片, 睇我食咗啲乜.

 

係咪堅多呢 ? 😆😆😆

食材配搭相當豐富 / 有創意, 造型擺碟更加係天花板級別 ( 特別訂造嘅陶瓷碟絕對功不可沒 ) !  廚師好明顯可以食得好辣, 因為有啲組合真係連我都覺得非常非常之辣.

同埋佢應該有超多靈感, 想一次過曬冷. 不過成晚味蕾連續被不停轟炸 28 次, 真係宇宙大爆炸 ! 若然知道食物份量會係咁豐盛, 我真係要早一日就開始絕食, 饑荒咁款先 KO 到囉 😆

成晚印象最深刻, 係下圖呢個由 227 粒牛心, 牛脷, 蒜頭, wasabi, 蔥, 鹹蛋黃, etc. 砌成嘅 227 Forms of Wagyu. 食法係要將呢 227 粒嘢撈埋, 組合成一匙羹, 然後一啖過食, 好癲呀 😲 

東京大食の魚生等我呀

Merry Christmas 🎄🎅🎅🎄

一直好鍾意食魚生, 每次食日本料理都必定會叫 sashimi.  

但年紀大咗開始偏食, 衰格乞人憎 : 初期只係唔食三文魚 ( 比蔡瀾影響, 話三文魚勁多記生蟲日本人都唔會食 ! ) ;  之後怕腥 skip 晒有銀色皮嘅魚 ;  近期仲進化到連北寄貝, 赤貝, 魷魚, 八爪魚 ( 全部都冇牙咬 ) 同帶子 ( 唔鍾意 texture ) 都上埋榜.

平時食去一般日本餐廳還 ok , 因為可以唔點自己唔食嘅嘢, 但一到 omakase, 尤其係廚師會問有乜唔食嗰啲, 就出大事 😒   除咗上文提及嘅三文魚, 銀色皮魚, 北寄貝, 赤貝, 帶子, 魷魚, 八爪魚, 其實仲有其他嘢唔食 : 包括超級 no no 嘅白子, 鮑魚, 蠔 ( 熟 ), 螺及一切肝類. 

好難服侍, 通常廚師聽到我呢個 long list 都會立即皺眉頭.  Oh sorry...... 真係非常之唔好意思 🙏  但話明係廚師發板, 又駛 Q 理我呢類西客嘅感受吖, 總之想煮乜就煮乜, 對吧 ?!

以為今次十二月東京大食之旅, 凍冰冰, 唔會主打魚生啦, 但唔知點解, 食吓食吓又食咗好多喎, 仲多過七月夏天嗰次.  尤其第二晚, 熟食應該只佔整體食物份量不足 30% 😆, 不過要澄清, 餐廳真材實料, 魚生係新鮮靚嘢嚟架 👍 

食得咁開心, 緊係要強吻 💋 廚師, 一表謝意啦 !!  不過今次食咗勁多生魚, 物極必反 ( 原來食魚生都會滯 😂 ), 返香港呢排都係想食番啲熟嘢先, 應該要等到 2025 年先開齋再食 sashimi 了.

冬至郊遊遊

早排睇鬼王潘聰個靈異節目 https://youtu.be/M01NZ6nKxAI?si=pqKoCy5Qaq-tjn4d , 拍攝地點係鯉魚門 [ 海防博物館 ] ( 現己改名為 [ 香港抗戰及海防博物館 ] ), 都係嗰啲啦, 話嗰度猛, 當更食蕉晚黑見到日軍之類.

回憶突然番晒嚟, 記得廿幾年前博物館剛開館時曾到此一游, 因為建築設計係香港建築署 ( ASD ) 難得唔樣衰嘅傑作之一.

BEFORE & AFTER

2024 冬至大日子, 久別重逢再次到訪 ( 醉翁之意不在酒, 當然另有目的 ).

喺展館某處牆上 cap 咗張 BEFORE (上) and AFTER (下) 鳥瞰圖 : 舊鯉魚門炮台 vs 改建後嘅博物館.

舊鯉魚門炮台張圖成塊人面咁, 兩隻眼, 仲擘大口有牙添 !  望落真係得人驚. 

雖然博物館地點歷史背景有啲驚嚇, 但光天化日又 feel 唔到有特別異樣 ( 除咗 1 號地下彈藥庫, 落到去非常有壓迫感 + 例牌起雞皮 + 左耳耳鳴 ), 其他地下室同軍事遺蹟又正常喎.

但唔排除, 喺其他唔係咁陽光普照嘅日子到訪, 個場會變另一回事都唔出奇 👻.

從 [ 香港抗戰及海防博物館 ] 山頂遠眺將軍澳, 山環水抱景色宜人 🩷🩷

不過當年打仗, 原來九龍半島位處炮台射程範圍呢 😧.

行勻成個山頭終於要到戲肉, 出發去一個 [ 秘景 ] 踩場 ! 

由 64 米 ( 博物館 ) 山頂一步一步, 落落落...... 落落落落...... 走到一處同維港海平面只差 2 米嘅地方 : 魚雷發射基地.  

鯉魚門海峽靚景一覽無遺, 不過 [ 秘景 ] 就好似同海面有啲近, 當日只不過有小小風浪, 企近岸邊嘅我就已經淆底, 幻想打大風之時, 一個浪捲埋嚟, 嘩 ~~~~~ !