老酒

一直都覺得酒可以陳年呢件事, 係好神奇嘅, 世上唔係有好多飲品, 可以擺幾廿年後, 仲飲得落口.  如果有罐兩年前生產嘅可樂, 要你飲, 你都會猶豫啦.

前晚好榮幸, 有機會飲到支1937 年 Chateau Leoville Payferre, 75歲嘅老酒, 個侍應好好好小心咁開瓶, 我都戥佢緊張, 驚驚. 

 

 

雖然個客口口聲聲話開爛咗冇所謂 (但又一路望實喎) , 若果真係出事, 一定黑面! 好在最後個塞都冇爛.

老實講, 我從來都冇飲過咁老年份嘅酒.

第一啖入口, 好酸, 有啲dilute 咗嘅櫻桃味, 仲帶少少鐵銹, 跟住就唔識形容喇.....  再breathe 咗陣, 都冇乜好變化, 只係冇咁酸, 睇嚟都係快飲快着.

大龍鳳

好怕住隔離嗰兩條 "les", 一時糖黐豆, 一時水溝油.  最鍾意friday night 或者星期日下晝嗌大交.

我住嗰度隔音好, 從來冇比隔離屋啲聲嘈過, 除咗佢哋!
個 <老公> (唔知點形容, 總之係男嗰個啦) 嗌起交上嚟把聲又大又"拆", 有佢講冇人講, 鬧人內容重覆又重覆, 好煩.

前晚10:45pm 返屋企, 一開𨋢門就聽到佢哋嗌緊大交, 跟住睇陣電視, 12 點瞓覺, 佢哋都仲係吵得好激烈.

夜半4 點, 窗外忽然傳嚟陣陣好"拆"嘅凄厲叫聲 : "唔好呀...... 唔好呀......" .  望落去, 見到啲管理員企晒喺草地望上嚟!  妖~~~~ 唔係嘛, 玩跳樓!

頓時心感不安 : '啱啱先覺得住得好好地, 你一跳, 呢度咪變凶宅?!'  但與此同時, 又精神分裂 :  '妖, 成鬼日嗌交, 係就快啲跳, 喺度嘈生晒, 搞到周圍啲狗狂吠, 成村人冇覺好瞓!'

"唔好呀...... 唔好呀......" 再嗌咗 10 分鐘, 消防到. 
正當我諗緊喺草地啲消防可以幾快set up個救生氣墊之際, 另一隊已經帶齊架生上咗嚟,  3 秒內用鐵筆撬門入屋!

跟住啲救護警察管理員嚟哂, 條走廊變得人聲沸騰, 一個鐘後兩條"les"被送院, 之後全部人收隊.

啲消防真係好man, 由細到大, 我都好鍾意消防員. 

記得4歲嗰陣讀幼稚園參觀北角消防局, 有得試坐<長臂猿> (見左圖), 幾個同學都係自己上車. 而我, 就發姣, 張開雙臂, 要消防員抱我上車, 厲害!

跑東北

 

呢期驛馬星動, 狂飛 5日, 包括兩日大東北 : 哈爾濱 + 瀋陽.

出發前都收到風, 會好凍, 不過冇諗到會凍到咁盡, 落機嗰吓, 竟然零下29C!




嗰仲感覺, 日光日白都好似喺freezer裡面咁, 但係請記住, 唔係開雪櫃嗰吓, 係要想像 "困咗喺裡面, 冇得走嗰隻" !

哈爾濱鄰近俄羅斯, 所以好多建築都好有俄羅斯風格.

一心諗住去到可以試吓哈爾濱菜, 點知原來業主個GM係香港人, 帶咗我哋去港式茶餐廳食晏!  不過佢都好嘢, 冰天雪地搵到隻燒鵝嚟食.

吃完仲有時間睇風景, 去到 <蘇菲亞教堂>, 司機問要唔要落車參觀, 哇~ 唔啦! 








當日傍晚再去瀋陽, 好啲, 有-18C, 不過因為天黑, 風又大, 感覺仲凍.

第朝起身, -28C, 但超勁, 成街人, 點解咁凍嘅地方, 可以做大城市嘅?!

嗰晚返香港, 17C, 舒服晒......原來香港真係幾好㗎.

二十年後

我曾經係日本迷, 痴起條筋, 一年去3 次東京.

 

記得第一次去日本, 係 21年前, 即1991, 嗰日好搞笑, 一上的士去機場, 個司機問我係唔係 <帶guide>, 我問乜係 <帶guide>, oh, 原來係導遊.

 

呵呵, 其實嗰次係我人生第一次出trip, 原來我個樣似<帶guide>......  之後好彩, 第一次坐飛機就比人upgrade去business, 當年日航空姐, 真係好靚㗎, 仲記得啲饅魚飯, 好好味.

 

不過去到東京當晚, 情況有啲恐怖, 一落的士都未攞行李, 就有個醉酒佬扒咗喺車頭嘔!  之後行去旅館, 街邊啲男人喺度屙尿. 

 

跟住仲經歷咗人生第一場 4.2 級地震.  當時瞓係床睇電視, 忽然見到牆邊幅畫拍拍吓, 以為咁猛有鬼!  之後聽到街啲車猛響銨, 停晒喺度, 電視新聞特別報告, 先知咁樣原來係地震. 

 

當年覺得日本人好有禮貌, 好認真,  啲嘢好靚, 好精緻同埋好貴!! 曾經好有衝動去日本讀書, 讀乜?  都係啲日文設計之類嘅無謂嘢啦, 老豆冇反對, 但係佢要我喺大阪讀, 因佢有個friend 喺嗰度, 但係大阪?! 都唔係東京.....?  No 啦.

 

上星期去大阪快閃公幹, 晚機去早機返, 最把炮係食到個正式日本魚生飯set dinner, 頂佢, 香港嗰啲, 真係冇得揮, 啲魚生好Q鮮㗎!

 

 

成個餐唔計魚生飯, 前前後後嚟咗7小碟, 又海膽又和牛 (當然係細細份), 仲包埋咖啡甜點, 都唔駛HKD370, 講都冇人信!

個魚生飯加咗芝麻, 年藕, 香草同黑魚子, 口感豐富有層次, 賣相又精美, 實在令人太回味!

小圈子

 

呢排做嘢好濕滯, 搞到個人好燥. 

尋日外賣lunch 仲比條潮州魚蛋佬激到彈起, chok 住度氣, 足足一日先順得番.

 

今朝騎馬, 隱約聽到教練提起, 下年香港有個馬術盛會 (CSI 5), 喺機場博覽搞, 啲國際級高手, 跳欄會跳 1.6M!!

 

 

妖......  香港就係咁喇, 自誇 <World City> ,  到今時今日, 乜乸嘢事, 都係搞小圈子, 淨識口耳相傳!    

 

想搵啲盛會資料, 成晚摷爆個馬會 (HKJC) 同馬術協會 (HKEF)個網, 竟然隻字不提, 唔通有sponsor, 即係商業活動, 唔可以講?!

 

個馬術協會, 又話個會成立目的係促進馬術活動, 我呸!!  入會幾年, 除咗夏天到期交會費嗰陣會出信嚟催, 其餘日子, 簡直零交流! 

 

原來交錢, 就係馬術活動.

 

 

辦公室風水禁忌

 

噢~~   太耐冇寫Blog 了.

 

因為呢個月返工忙到不得了, 如果有個偷拍鏡頭影住, 一定會見我青根暴現, 成面油, 生頭瘡, 喺電話講埋晒啲超核突國語嘅恐怖樣.

 

諗番起, 都係咎由自取, 想升官發財, 學人搞辦公室風水, 擺埋啲乜駿馬圖.  唔擺尤自可, 一擺即癩嘢!  啲嘢突然排山倒海, 做到趴喺度.

 

其實我都好快醒覺不妙, 晨早搣走張嘢, 點知請鬼容易送鬼難, 到而家都仲係做到仆街.

 

所以風水陣千萬咪亂擺.

 

有冇理人感受

我知好多人好享受, 但由細到大, 我對裸露呢樣嘢, 唔係咁enjoy. 

無論以前學校泳池, 抑或做yoga, 更衣室總有人一絲不掛, 坦蕩蕩四圍行.  唔知佢哋乜心態, 可能覺得大家都係女人, 無所謂.  不過我好介意, 又唔係super model身材, 奇形怪狀, 睇到真係會頭痛.

 

騎馬嗰度, 都有個成日赤條條喺更衣室heah.  平時騎完入changing room, 聽到水聲知佢沖緊涼, 我都會以極速執晒啲嘢走人!  驚驚......  點解?

 

因為有次佢沖完, 唔知搞乜, 唔抹身企正喺我面前, 當時我坐喺度着緊鞋冇留意, 一兀起身, 塊面就對正佢個

 

妖~  你話邪唔邪?!

黑心小家男

 

上禮拜連環出trip, 4 日跑 <上海 - 廣州 - 東莞 - 新加坡 - 馬來西亞> , 連weekend 都蝕埋.

 

同行 3 個外籍人士嘅所為, 真係完全 remind 我 of 2006 年嘅一個經歷!

 

當年同老闆及另外一條 "木咀" 去台北開會 .  (點解係木咀?  因為佢明明係中國人, 香港出世, 之不過細個移民澳洲, 而家大咗 竟然話自己係鬼佬, 唔係中國人!)   搭的士到目的地, 要比錢, 嗰兩條 PK 竟然同時攞起部電話打, 妖 ~有冇咁啱呀?!  結果要我呢個低級職員找數.

 

呢次呢 3 個外籍男人, 喺大陸咁多地方, 無論打的, 食飯, 都完全冇人意圖攞個銀包出嚟找數, 次次都係我比.   最後仲比我發現, 佢哋根本連人民幣都冇, 咁同出街食飯唔帶 $ 嘅心態有乜分別?  即係一早旨意人請!

 

最最最 cheap 兜, 係其中一條法國佬, 喺新加坡要早大隊一晚走, 終於露出破綻, 話冇坡紙打的去機場, 望住我, 想我比 $ 佢, 我啋佢都傻, 叫佢去找換店搞掂啦, 點知佢原來身上連一蚊都冇!

 

我明明有, 都唔比佢.

 

結果佢搞到要 book 酒店車, 用 credit card 找數, 正粉腸!

 

小人

「小人」相法, 好準!
鼻歪 :


 

 唯利是圖，心術不正，說話言過其實，好辯歪理，為求取利益不擇手段，詆譭別人。鷹鼻或骨凸更加犀利，攞人著數，最靠唔住。



咀歪 :

喜歡造謠生事，搬弄是是非非，喜理人閒事，順口開河經常找朋友胡亂講別人的不是，是最麻煩的人。

 

呢兩條蛇頭鼠眼, 無惡不作, 欺人太甚. 

 

尋晚食橋底辣蟹, 之前順路走去鵝頸橋打小人.

 

早有準備, print 定佢兩條木咀張相比神婆打, 目標明確, 香港大把同名同姓, 無謂傷及無辜, 打錯人.

 

公價 $50 打一個, 兩個一舊.

神婆瞭解咗個case後, 立即手起屐落, 念念有詞, 出盡力一吓吓打落木咀張相度, 啪啪聲極為響亮! 

唔好意思, 當刻我真係覺得好涼快, 忍唔住笑......

成個儀式大約 10 分鐘, 步驟如下:

http://orientaldaily.on.cc/cnt/lifestyle/20110305/00315_004.html

錯愛

 

呢個黑色"Po - Fold" (portfolio),  對啲好似我咁嘅年紀, 而又做design 嘅老餅, 一定唔會陌生.     皆因讀設計嗰陣, 人人都會非常渴望擁有一個.  

當年, 個個着到成身黑色, 攞住個"Po-Fold" 通街走, 驚死人唔知你係designer 咁, 好鬼膚淺! 

畢業做嘢, 先知係送圖員先會用 "Po-Fold" 送圖, designer 唔用㗎, haha.......    不過黑色, 始終係 "型' 同 "專業" 嘅代表, 又可以著瘦人, 所以咁多年, 我都不離不棄, 一半以上嘅衫, 都係黑色.

人到中年, 諗住調補吓, 前幾日走咗去睇同事們口中一個幾堅嘅中醫.  

個醫師除咗識醫人, 仲識術數, 把脈嗰陣, 有啲驚......  唔知會唔會話原來有啲乜乜物物跟住......

好彩把完脈, touch wood, 冇乜大鑊嘢.  

醫師講咗啲有趣玄機, 仲話黑色衫根本唔啱我, 叫我唔好再著!

既然佢咁講, 好, it's time for change!  所以尋晚執晒啲黑衫出嚟, 今朝捐去救世軍.

辭職事件

講開辭職, 諗起成十幾年前舊公司發生嘅一件超騎呢事件.

咁啱得咁蹺, 同時間有兩個同事 (一男一女) 想劈炮唔撈, 但又怕死, 唔敢直接見老闆遞辭職信.

結果拖到禮拜六, 等老闆嗰日唔返office, 臨收工走入老闆房擺低封信就算.

唔知點解, 後來個男同事無端端走番入房, 攞咗女同事嗰封信出嚟, 掟番比佢, 話 :  "喂!  你唔好同我同一日辭職喎, 你下個禮拜啦!"

個女仔係粗魯型, 不甘示弱, 即刻衝入老闆房攞男同事封信出嚟掟落地! 

跟住佢哋互相爆粗, 擺明想開拖, 我哋見勢色唔對, 就叫佢哋收嗲, 放工走人.  等𨋢嗰陣已經眼啤啤, 點知一入𨋢, 佢哋竟然打起上嚟, 互踢!!  仲踢到個𨋢"澎澎"聲.

落到地下大堂, 佢兩個停咗手, 一開𨋢門, 個看更好驚咁望住我哋.  行咗出大廈門口, 佢哋一左一右, 分道揚鑣, 但就喺告士打道不斷回頭大罵對方 : " X你XX!"

呢一幕, 到而家都歷歷在目! 諗番起都好好笑.

夏日寒風

唔係我辭職......

 

正所謂 <福無重至, 禍不單行>.  

 

今個夏天, 我老闆經歷咗佢事業上最黑暗嘅日子, 因為部門兩個要員, 突然喺兩個禮拜內相繼辭職!  

 

冰封三尺, 非一日之寒.   佢獨裁專制, 自以為是, 喜怒無常, 同事已經忍得佢耐. 

 

哈~~ 壯士斷臂.   嚟緊嗰個超級黑鑊 project, 就算佢分身複製幾個自己, 都未必舞得掂.   仲叫我介紹朋友嚟做, 人工又唔係勁, 孭鑊之餘仲要比佢燥狂發洩, 我真係冇咁PK, 明知死路都點人.

 

最搞笑係佢想留人, 但又放唔低樽鹽(尊嚴), 同人傾條件, 竟然講埋晒啲尖酸刻薄說話.  

 

打個比喻, 冇錢走去問人借錢, 竟然本末倒置, 同債主講  : 

"而家你借 $ 比我, 係你榮幸, 我叫你借十蚊, 你最好比夠一千, 但我最多只會還一蚊喎!   出面啲人好衰, 比着第個, 你一毫字都收唔番, 自己諗吓啦! "

 

咁搞都仲借, 正一大白痴!   聽到啲咁嘅說話, 同事當場死咗心, 唔同佢玩.

 

意外收鑊

幾年冇去巴黎lu......

耐唔耐都有D 衝動去走轉.   但一諗起啲機票咁貴, 連埋酒店成幾皮嘢, end up 冇去.

份新工上咗冇耐, 知道要去巴黎總部考察, 心中不禁暗喜...... 

唔駛自己比錢, 剛好大減價, euro又創新低, 今次發達喇!






上機當日同事仲興奮過我, 同我下午茶餞行, 乜都噏一餐, 話我喺機上會有艷遇.

有.

坐我隔離條靚妹囉!






坐開CX 轉坐法航好唔慣, 機艙設備真係差幾皮, 好彩食物同酒都有啲水準. 

喺機上, 仲察覺到一個違忘咗好耐嘅fact : <法國男人衣著非常講究>.

可能呢期興頸巾, 個個法國佬頸上都有條"巾", 勁滑稽.   當刻諗, 我而家衫著實在太casual!  唔得, 返香港要搞過個look, 悉心打扮, 回復當年水準.

點知返到嚟, 又酷熱又潮濕,  look鬼咩?

落機得13度, 好開心, 因為勁鍾意凍.   我個人好心急, 喺酒店擺低行李沖個涼就出擊, 連續行咗5個鐘.  第朝一早去flea market, 買心頭好.

夜晚約咗個久違嘅朋友, 喺餐廳, 發生咗件超 "娘" 嘅事.

睇睇吓個餐牌, 我問  :  [咦, 點解冇價錢嘅?]    之後先猛然醒起, 法國高級餐廳男人唔會要女人比錢, 所以男人嘅餐牌先會show價錢......   唉, 我擺明少食好嘢, 未見過大蛇嘔水啦.

毀容

呢幾日收咗皮.

上禮拜五飛完我 <復出之旅> ,  返到屋企成身散晒,  諗住瞓個覺冇事,  點知第朝起身wing wing 吓, 又瞓過鐘喎,  所以 "dum" 快兩步,  飛車去騎馬.

點知都未出屋企停車場, 轉最後個灣轉得早得滯, 左邊車身炒埋牆角!!

'蹦' 一聲, 嗰刻個人先真正瞓醒.

妖...... x#yz@...... 花晒.......  車身成條 bar 飛甩咗.  

點可以喺全港數一數二闊嘅停車場炒車㗎??  最搞笑係, 個個朋友聽到之後, 都問 : "哇, 你飲醉酒呀?"  頂~  就係冇......

返到馬場, 騎完馬啲人無聊, 開咗個盤, 估整番要幾多錢.  

有人覺得好小事, 3-4千搞掂;  有人估 $5000;  有人認為 7-8千走唔甩;  又有人估要過萬.

答案 ---->>   $8,500

Blackberry 之復生

返番工成個禮拜, 原來都唔係想像中咁差啫.  公司樓下有油站, 有萬寧, 有街市, 有花檔, 有燒臘舖, etc.....   以前唔覺咁正, 搬咗入新界後, 至知呢啲係寶!

鳥倦知還  :  玩足成年, 錢又用得8899, 再搵唔到工, 咁大開支, 分分鐘屎都冇得食!  

呢份工, 舊老闆擺明益我  (雖然有人話一定會揀我, 因為我好似啲馬咁, 有往績).

正所謂你敬我一尺, 我敬你一丈.    所以, 我決定作出調整, 鎖定大清早騎馬, 唔駛成日心思思, 戒除 <遲到早退, 返工飲酒, 唔接電話> 呢啲惡習.

公司唔知搞乜, 返工第一日, 張枱空空如也 : 電腦, 電話, blackberry, email account...... 竟然連電話號碼 (!!!!!!!!), 乜都冇!  真羞家.

今日, 終於出到部 blackberry 喇!  Laptop 話星期三有喎, 慢慢啦.

自由的最後一天

聽日, 我要工作了.

千萬個唔願意, 好在今日冇落雨, 可以四周走, 如果唔係, 真係喊得出. 

望住片天, 心情就好似要入冊咁沉重......  唉, 為咗錢, 冇辦法, 要重返鰂魚涌呢個魔域.

上年比人'昆',  喺長沙灣返過工之後, 我嘅對工作地點嘅要求, 已經降低咗好多, 變得非常普及化.  

其實鰂魚涌都好, 起碼日日返工唔使著得咁行, 中環人哋放工去IFC / SOHO happy hour, 我就可以去附近街市買餸.

回頭草

[ 好馬不吃回頭草, 好草不怕回頭吃 ]

呢句, 係騎馬高手知我會返舊公司做而贈我嘅.  表面支持, 實為暗串.

記得上年呢個時候, 理直氣壯寫blog鬧爆舊公司, 懶有吉士.

http://blog.yahoo.com/squirl/articles/11686/category/Work

嗰陣諗住食老本, 先休息半年, 跟住接freelance做.  開頭放風, 好多friend都話有projects介紹比我, 係就係, 不過最終都係煲水多, 做得成嘅, 10%都冇! 

換句話說, 我用咗成半年不斷去做埋啲胎死腹中嘅 proposals, 又冇錢收.  唔係路, 都係打番工好. 

所以四月尾, 我開始搵工, 搵足兩個月, 其間見工 (連headhunters), 不下30次!  真可怕.

搞搞震, 連番轉接, 最後都係食回頭草.  不過headhunter friend話有得吃, 不妨吃, 因為舊公司叫得你返去, 即係代表你好喎, 我覺得佢老點......

僭建

僭建 - 無處不在.

身邊唔少朋友同事, 無啦啦失蹤一個禮拜, 返嚟個樣有啲唔同咗, 明顯執過.

最驚嚇有次去韓國公幹, 大塞車, 又熱又曬, 同車翻譯小姐, 一望佢側面, 太陽打落嚟, 啲光竟然可以通過佢鼻樑!  哇~ 裝假狗.

講起僭建, 諗起10幾年前一單傑作.

當年年初三赤口同男友吵大鑊分手, 返屋條氣唔順, 諗起佢間餐廳有僭建, 初四即刻打去屋宇署舉報, 整佢一鑊!

屋宇署冇而家咁忙, 好有效率.  我哋初十好番, 男友話餐廳比人查, 收到清拆令, 要佢拆晒個僭建玻璃屋, 問我有冇裝修師傅介紹.

有! 緊係有啦!  結果個工程使咗佢五皮幾, 拆咗玻璃屋, 少咗地方做生意, 每日做少四枱客 x 3 rounds. 

哈, 抵死! 分手吖嗱?

人品我又品

成半個月冇寫blog了,  除咗忙住搵工之外, 仲要為品酒考試溫習.  
我呢種唔見棺材唔流眼淚嘅人, 早啲讀係會死嘅!!  一定要將啲書留到最後嗰刻讀先舒服.

尋晚考試, 一早估到會出啲陰濕問題, 但諗唔到真係咁陰, 問埋晒啲 "智利"  "阿根廷", 你估世界杯咩?  唔識啦.

Blind tasting 嗰 part仲衰, 唔奢望會有靚嘢試, 點知佢衰到試美國澳洲酒, 試到一半已經開始頭痛.

唉算了, 個試考完喇, 不過尋日考考吓, 望吓前面嘅男同學, 哇~  試兩隻酒啫, 佢個頭經已變成紅色, 唞氣her her聲, 成隻牛咁! 

假若有日你出街食飯, 喺高級餐廳見到個紅色頭嘅品酒師 (下圖右), 你會覺得點呢?

而呢個高端國產品酒師, 你哋又點睇?

我突然間覺得教我嗰個, 都唔係好樣衰啫......

快.狠.準. 試酒

波爾多 Bordeaux 2009 年份被譽為 best Bordeaux vintage in history.
做乜咁靚?   啲造酒師話, 09年天氣係夢幻組合, 提供完美生長同成熟環境, 令葡萄色香味俱全.

前晚Watson's wine 喺紅磡海逸搞嘅Grande Bordeaux tasting, 我都有去.  

比5百幾就可以試晒 Bordeaux大部份1至5級 (Growths / Crus) 酒莊,  09年份80幾隻紅白甜酒, 臨走仲有酒杯送, 抵!






我6點到, 啱啱開閘(開始入場), 啲人好喉擒, 好似跑馬出閘咁, 澎澎聲衝上樓梯, 得人驚.

6 點半未夠, 在場人士好多已經關公上身, 飲到成個頭都紅色.


我同friend 初頭都諗住逐隻逐檔去試, 點知好多酒都係啱啱開瓶, breathe唔夠, 我哋試隻隻個口都比啲單寧(tannin)炸爆!

個場人多, 好侷, 酒店啲人覺得臭, 唔知搞乜噴清新劑, 混埋陣佬味, 攞命.




咁搞法好快收皮, 所以我哋改變策略, 淨係去試貴酒, 唔好浪費quota.

左邊就係我隻"上帝之手", 以前用嚟出貓, 而家用嚟列出過千元嘅酒, 連表都費事揭.

搵唔到食

一連三日喺會展擺嘅Vinexpo, 尋日開始.   攞咗入場證, 以為可以免費試盡世界各國美酒, 不醉無歸. 

去到, 先知個會係為業界人士而設 (同埋一啲龍友, 影吓場內嘅靚女).  

諗住攞個杯走去檔灘講句 thank you 就有得試?   No la.  想飲? 要留步同酒商交談.

所謂嚴師出高徒, 我呢啲咁 '勁' 嘅學生, 一開口就知我冇料到兼阻住做生意啦!   就算比我吹得呃到人, 咁到時人哋問你入幾多, 唔通你話一支咩! 

身為無業游民, 人哋問攞卡片, 我話 : "唔好意思, 派晒."

幾樣衰!

有得睇, 冇得食, 喺場內打咗幾個轉就走人.  臨走同酒樽家族影相留念 (哈哈, 好耐之前, 喺巴黎都影咗張類似嘅相)

2012 HK - Vinexpo Asia-Pacific

2003 Paris - Le Bon Marche'